Bangsa Assur ngancam Jerusalem (2Raj 18:13-37; 19:14-19, 35-37; Yes 36:1-22, 37:8-38)
1Kenca kejadin-kejadin si ndai kerina, i ja Raja Hiskia teridah patuh man TUHAN arah perbahanenna, reh Sanherip raja Assur merang Juda. Ikepungna kota-kota Juda si erbenteng jenari iperentahkenna tenterana ngerebutsa.
2Kenca idah Hiskia maka kota Jerusalem pe iserang Sanherip atena,
3Hiskia ras pegawai-pegawaina muat keputusen guna nutup kerina ingan lau i darat kota Jerusalem, gelah alu bage bangsa Assur la dat lau adi ia nggo seh i deher Jerusalem. Ipinpin anak buahna nterem jelma ndarat kota guna nutupi kerina ulu-ulu lau, seh maka lanai nari lit lau erburak i jenari.
4(2Taw 32:3)
5Ipeteguh raja benteng kota alu pekena tembok-tembok si ceda, dingen majekken menara i babo tembok e. Tambah si e ipajekkenna ka pe tembok sada lapis nari arah darat. Jenari benteng si lit i babo taneh tambusen si arah Timur bagin kota Jerusalem si dekah pe, ipekena. Lembing ras ampang-ampang melala kal ibahanna.
6Itamakenna kerina dilaki i bas kota e i teruh perentah puanglima-puanglima tentera. Jenari isuruhna kalak enda pulung i kesain deherken pintu gerbang kota. Nina man si pulung e,
7"Tetapkenlah ukurndu dingen teklah kam. Ula kam mbiar kempak raja Assur e ras man tentera si ipinpinna. Belinen kap gegeh si arah kita asangken gegeh si arah ia.
8I bas ia lit gegeh manusia, tapi arah kita lit TUHAN Dibatanta si nampati kita dingen erperang guna kemenangenta." Tetap ukur rayat megi kata-kata si ibereken rajana.
9La asa kai dekahna kenca si e, asum Sanherip ras tenterana i Lakis denga, itenahkenna kata enda man Hiskia ras man kalak Juda si lit ras ia i Jerusalem nina,
10"Aku Sanherip, raja Assur, nungkun man bandu kerina, kai sabapna maka kam tetap pang tading i Jerusalem si sangana ikepung e.
11Ntah erkiteken ikataken Hiskia man bandu maka ipulahi TUHAN Dibatandu kam pagi i bas kuasa kami nari? Itipu Hiskia kam e, dingen ipelepasna me kam mate la man dingen la minem.
12Ia kap si nggo ngeradasken ingan-ingan nembah man TUHAN ras batar-BatarNa, jenari ikatakenna man kalak Juda ras kalak Jerusalem gelah nembah dingen nutung si merim-merim i bas sada batar-batar saja ngenca.
13La kin ietehndu kai si ibahan nini-niningku dingen si kubahan man bangsa-bangsa si deban? Isampati dibata-dibatana kin bangsa-bangsa si deban e gelah pulah i bas raja Assur nari?
14Pernah kin dibata-dibata i bas negeri-negeri si deban nampati ia gelah pulah i bas kami nari? Dage kai si erbahanca kam rukur maka dibatandu ngasup nampati kam?
15Emaka genduari ula kam nggit itipu Hiskia ntah ibabaina papak. Ula kam tek man bana! Labo nggo lit dibata bangsa-bangsa si deban si nggo pernah ngasup mulahi bangsana i bas kuasa raja-raja Assur nari. Dage ugapa pe dibatandu e labo ngasup nampati kam!"
16Kata-kata si ibelasken utusen-utusen Assur e ndauh denga ka kasaren sanga ihinana TUHAN Dibata ras Hiskia suruh-suruhen TUHAN e.
17Surat si itulis raja Assur e pe tuhu-tuhu ngelawan TUHAN, Dibata Israel. Nina i bas surat e, "Dibata-dibata bangsa si deban la pernah ngasup nampati bangsana i bas kuasangku nari, emaka Dibata Hiskia pe labo ngasup nampati bangsana i bas aku nari."
18Utusen Assur e erlebuh alu sora megang i bas cakap Heber gelah mbiar dingen lanai tetap ukur kalak Jerusalem si lit i datas tembok kota, gelah alu bage lebih mesunah iakapna naluken kota e.
19Dibata si isembah i Jerusalem bali pencakapkenna ras dibata-dibata bangsa-bangsa si deban, eme gana-gana bekas tan manusia erbahanca.
20Kenca bage, Raja Hiskia ras Nabi Jesaya anak Amos, ertoto man Dibata janah erlebuh ia mindo penampat.
21Isuruh TUHAN sada malekat munuhi puanglima-puanglima ras tentera bangsa Assur e. Emaka mulih raja Assur, mela kal iakapna. I bas sada wari sanga raja e lit i bas rumah pertoton dibata-dibatana, piga-piga anakna dilaki munuh ia alu pedang.
22Bage me carana TUHAN mulahi Raja Hiskia ras kalak Jerusalem i bas kuasa Sanherip, raja Assur e, ras i bas musuh-musuhna si deban nari. TUHAN mere Israel nggeluh alu dame ras kerina negeri-negeri sekelewetna.
23Nterem kalak reh ku Jerusalem maba persembahen-persembahen man TUHAN dingen maba pemere man Hiskia. Emaka mulai i bas paksa e nari Raja Hiskia ihamati kerina bangsa-bangsa.
Penakit ras kesombongen Hiskia (2Raj 20:1-3, 12-19; Yes 38:1-3; 39:1-8)
24I bas paksa-paksa si e sakit Raja Hiskia dingen menam mate. Ertoto ia, jenari ibereken TUHAN man bana sada tanda maka penakitna banci malem.
25Tapi perban gombangna Hiskia la ngataken bujur kerna kai si nggo ibahan TUHAN man bana. Erkiteken si e Juda ras Jerusalem terpaksa ngenanami kiniseran.
26Tapi kedungenna Hiskia ras kalak Jerusalem peteruk bana, emaka la iukum TUHAN bangsa e kidekah Hiskia nggeluh denga.
Kebayaken ras kemulian Hiskia
27Raja Hiskia nggo bayak kal, janah kerina kalak mehamat man bana. Ibahanna kamar-kamar man ingan nimpan erta-ertana, eme: emas, pirak, batu permata, rempah-rempah, ampang-ampang, ras barang-barang meherga si debanna.
28Tambah si e ipajekkenna gudang-gudang man ingan nimpan gandum, anggur, ras minak saitun. Karang lembu ras karang biri-birina pe lit ibahanna.
29Seakatan si enda ndai kerina, ibereken Dibata man bana biri-biri dingen lembu bage pe kebayaken si debanna si seh kal buena. Kota-kota pe melala ipantekina.
30Raja Hiskia me si erbahan bendungen i bas ulu Lau Gihon jenari ipalerkenna lau e arah sada terowongen ku sada ingan i bas kota Jerusalem. Hiskia sangap i bas kerina si idahikenna.
31Janah tupung utusen bangsa Babilon reh nungkuni Hiskia kerna kejadin uga maka Hiskia malem i bas penakitna nari secara luar biasa, ipelepas Dibata si Hiskia si sada ngelakoken bagi atena lako nguji ukurna.
Pengkeri-kerin pemerentahen Hiskia (2Raj 20:20-21)
32Kerina si deban si ilakoken Raja Hiskia dingen kekelengenna man TUHAN isuratken i bas Pengenehenen Nabi Jesaya anak Amos bage pe i bas Sejarah Raja-raja Juda ras Raja-raja Israel.
33Mate Hiskia, jenari ikuburken i bas bagin si arah datasna i bas kuburen raja-raja. Kerina kalak Juda ras Jerusalem mereken kehamaten man bana tupung ia mate. Anakna Manase nggantiken ia jadi raja.
<< 2 Tawarikh 32 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel