Alkitab Mobile SABDA
[VER] : [KARO]     [PL]  [PB] 
 <<  Ayub 29 >> 

Perkatan Jop si pendungi kerna perkarana

1Iterusken Jop ngerana nina,

2"Bicara bagi si mbarenda ka min mulihi geluhku; tupung si e Dibata tetap ngkawali aku.

3La erngadi-ngadi IsampatiNa aku; adi aku erdalan arah gelap, IberekenNa terang bangku.

4Bage me nai asum aku senang denga, i ja erkiteken Dibata temanku, jabungku IkawaliNa.

5Sanga si e si Mada Kuasa nemani aku, anak-anakku pulung i sekelewetku.

6Lembu ras kambingku, la teralang bue susuna; janah aminna gia i bas taneh si erbatu-batu, batang saitunku melala minakna.

7Adi pulung tua-tua i bas kuta, janah reh aku kundul ku tengah-tengahna,

8minter nisi kalak si nguda ngidah kerehenku, tedis kalak si metua enghamati aku.

9Peminpin-peminpin bangsa e minter ngadi ngerana,

10kalak si mehagana pe, sip kerina.

11Kalak si ngidah tah megi kerna aku, kerina mujiken perbahanenku.

12Sabap adi nderkuh kalak musil si tertindas minter kupulahi, janah anak melumang si la ersima-sima, kusampati.

13Kalak si narus bene i bas kesusahen, ipujikenna aku, janah erkiteken penampatku ersurak meriah diberu balu-balu.

14Nandangi kerina manusia, bujur dingen adil perbahanenku.

15Aku me gelgel mata man kalak si pentang, dingen nahe man si cempang-cempang.

16Nandangi kalak musil, aku desken bapana, janah kalak pertandang si kesusahen, tetap kukapiti.

17Kuasa kalak jahat kupenggelken, janah kupulahi kalak si nggo ibenekenna.

18Erkiteken si e ngarap aku umurku nggedang, janah mate i bas rumahku alu ukur senang.

19Aku desken batang kayu si mbur, uratna erlau, dahanna bernak ibahan namur.

20Aku tetap ipujiken kalak, janah gegehku pe lalap la urak.

21Kerina kalak sinik di aku ngerana mereken nasehat, janah kai si kubelasken itinggalkenna alu megermet.

22Kenca aku dung ngerana, lanai lit perlu si man tambahen, kata-katangku ngersap desken lau udan.

23Kerina kalak ermeriah ukur ngaloken kai si kukataken, bali ras perjuma tuhur ngalo-ngalo udan dung erdangen.

24Adi ndele ate kalak, kuciremi ia, janah ngidah ayongku siang, ergiah-giah minter ukurna.

25Aku me jadi penguluna; kutuduhken dalan si man dalanenna. Kupinpin ia bagi sekalak raja minpin tenterana. Kuapuli ia adi ceda atena.



 <<  Ayub 29 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel