Alkitab Mobile SABDA
[VER] : [KARO]     [PL]  [PB] 
 <<  Daniel 4 >> 

Nipi Nebukadnesar si peduaken

1Raja Nebukadnesar nenahken berita si tersena arah teruh enda man kerina bangsa, suku ras cakap i bas doni enda, "Mejuah-juah!"

2Mehuli kuakap ibegikenndu turi-turin kerna tanda si mejin ras tanda kuasa si icidahken Dibata si Meganjangna man bangku.

3Mbelin kal tanda si ibahan Dibata, mamang kal ate ngenehen KembisanNa. KinirajanNa lalap lit asa si ndekah-ndekahna, ersundut-sundut Ia tetap erkuasa.

4Senang kuakap nggeluh i bas istanangku, ngenanami kebayakenku si mbelin.

5Tapi sanga aku tunduh lit nipingku si mahanca aku tersengget bage pe pengenehenen si mahanca aku mbiar.

6Kusuruh gelah ibaba ngadap kerina penasehat kerajan Babilon maka banci iturikenna antusen nipi e.

7Kenca bage kerina guru-guru si ngoge nasip, guru permangmang, guru si baso, ras ahli bintang, ibaba ngadap man bangku. Kenca kuturiken nipingku man bana, sada pe ia la ngasup mereken antusenna.

8Kenca bage ngadap me si Daniel. (Ia igelari pe Belsasar, sue ras gelar dibatangku.) I bas ia lit kesah dibata-dibata si badia, emaka kuturiken bana nipingku. Ningku man bana,

9"O Belsasar, kepala guru-guru si ngoge nasip, kueteh maka kesah dibata-dibata si badia lit i bas kam, janah ietehndu kerina rahasia-rahasia. Enda me nipingku; turikenlah antusenna.

10Tupung aku tunduh, lit kuidah i bas pengenehenen sada batang kayu lanai kal langlang belinna i tengah-tengah doni.

11Reh dekahna reh belinna batang kayu e janah dungna seh ku langit dingen kerina kalak i doni enda banci ngidahsa.

12Bulungna mejile, buahna meramis, seh maka bias man pangan kerina doni enda. Rubia-rubia si meliar cilinggem i teruhna, perik-perik rasar i bas dahanna, janah kasa kai si nggeluh atan mangani buahna.

13Tupung aku rukur-rukur i bas pengenehenen e, kuidah malekat nusur i Surga nari, sada malekat penjaga."

14Imomokenna alu sora megang nina, "Tabahlah batang kayu e, tektek dahan-dahanna. Agui bulungna seh keri, kerapkenlah buahna. Gera rubia-rubia e i teruhna nari bage pe perik-perik i bas dahan-dahanna nari.

15Tapi pelepas tongkehna i bas taneh, dingen iket alu besi ras tembaga, i tengah mbalmbal si meratah. Pelepas namur nusur ku ia, pelepas ia nggeluh ras rubia-rubia ras dukut-dukut.

16Pitu tahun dekahna perukurenna lanai bagi perukuren manusia, tapi perukuren rubia-rubia.

17Enda me keputusen i bas kerina malekat penjaga e. Dage ieteh manusia min i japa pe, maka Dibata si Meganjangna erkuasa nandangi kerajan-kerajan manusia janah banci iberekenna man ise atena ngena, subuk man kalak si musilna pe."

18Enda me nipingku ndai nina Raja Nebukadnesar, "Genduari o Belsasar, turikenlah bangku kai antusenna. La lit sekalak pe i bas penasihatku si ngasup nurikenca; tapi kam tentu ngasup, sabap kesah dibata-dibata si badia lit i bas kam."

Ituriken Daniel antusen nipi e

19Megi si e, Daniel, si igelari pe Belsasar, seh kal biarna, emaka la ia ngasup melasken sengkebabah kata pe. Nina raja man bana, "O Belsasar ula pelepas nipi e ras antusenna mahanca kam mbiar." Erjabap Belsasar, "O Raja kerna musuhndu min ndai kata nipi e ras antusenna, ula kerna kam.

20Batang kayu si meganjang, si seh ku langit, si banci iidah kerina kalak i doni.

21Bulungna si mejile, buahna si meramis bias man pangan kerina doni, batang kayu si man ingan cilinggem rubia-rubia si meliar i teruhna, dingen perik-perik i bas dahanna,

22batang kayu e, kam kap e raja, raja si meganjang ras megegeh. Kam nggo jadi meganjang seh ku langit, janah kuasandu seh ku kerina tampuk doni.

23Tupung ipernehen kam, o Raja, lit sada malekat nusur i Surga nari janah nina, 'Tabang batang kayu e, kernepkenlah, tapi pelepas tongkehna i bas taneh. Rempu tongkehna e alu besi ras tembaga, janah pelepas ia i bas mbalmbal ras dukut si meratah. Pelepas namur nusur ku ia, janah berelah ia nggeluh ras rubia-rubia pitu tahun dekahna.'

24Enda kap antusenna si e, o Raja, janah enda kap si ikataken Dibata si Meganjangna nandangi jadi bandu.

25I pedarat me kam i tengah-tengah manusia nari, jenari ringan me kam ras rubia-rubia si meliar. Pitu tahun dekahna kam man dukut bali ras lembu, janah medem i tengah mbalmbal, i ja namur nusur ku kam. Kenca bage iakuindu me maka Dibata si Meganjangna kap si ngaturken kerina kerajan manusia, janah banci IberekenNa man ise atena.

26Isuruh malekat ndai maka tongkeh kayu e itadingken i bas taneh. Enda ertina kam jadi raja ka pagi mulihi kenca iakuindu maka Dibata kap si ngerajai kerina doni enda.

27Dage o raja ikutkenlah nasihatku enda. Ulanai kam erbahan dosa, lakokenlah si bujur, janah mekuahlah atendu man kalak musil. Kenca bage maka tetap senang geluhndu."

28Si ndai tuhu-tuhu jadi man Raja Nebukadnesar.

29Sepulu dua bulan kenca si ndai, tupung ia erdalan-dalan i das loteng tarum istanana i Babil,

30nina, "Nehenlah uga belinna Babil! Kupajekken e jadi ibu kota alu kuasa ras gegehku, guna kemulian ras kehaganku."

31Lenga denga luar pe kata-kata e i bas babahna nari, lit sada sora i Surga nari nina, "O Raja Nebukadnesar, begiken katangku! Genduari kinirajanndu ibuat i bas kam nari.

32Kam ipedarat i tengah-tengah manusia nari, nggeluh kam ras rubia-rubia si meliar, janah dukut jadi panganndu bali ras lembu. Kenca bage iakuindu me maka Dibata si Meganjangna erkuasa nandangi kerajan manusia, janah banci IberekenNa kerajan e man ise AteNa."

33Emaka minter jadi bagi kata ndai, Nebukadnesar ipedarat i tengah manusia nari, ipanna dukut bali ras lembu. Namur nusur ku dagingna, bukna turah seh asa mbulu rajawali gedangna, bage ka pe silu-siluna bali ras silu-silu perik.

Nebukadnesar muji Dibata

34Nina Raja Nebukadnesar, "Kenca lepas si pitu tahun ndai, kutare ku langit emaka nggo jore ukurku mulihi. Kupuji Dibata si Meganjangna, janah kupehaga dingen kupemuliaken Ia si nggeluh rasa lalap. Rasa lalap Ia erkuasa, KinirajanNa tahan asa si ndekah-ndekahna.

35Manusia i bas doni la kai pe AkapNa; malekat i Surga ras manusia i doni Ia ngatursa. La ise pe ngasup ngelawan PeratenNa la ise pe banci nungkun, 'Kai si IbahanNdu e?'

36Kenca jore ukurku mulihi, dolatku, kehaganku, ras kemulianku IberekenNa man bangku mulihi. Pegawai-pegawaiku ras kalak mbelin ngalo-ngalo aku, janah kuasa kerajanku ibereken mulihi man bangku, janah lebihen pe asa dolatku si nggo-nggona.

37Emaka genduari, aku, Nebukadnesar, kupuji, kupehaga, ras kupermuliaken Raja Surga. Kai si IbahanNa benar ras bujur kap, janah ngasup Ia mpeteruk ise si erbahan alu ukur meganjang."



 <<  Daniel 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel