Kerja man-man si ibahan Belsasar
1I bas sada berngi Raja Belsasar ngundang kalak si mbelin-mbelin seribu kalak, ku kerja man-man si meriah, dingen minem-minem lau anggur ras-ras.
2Tupung minem-minem ndai Belsasar nuruh kalak ngelegi cangkir emas ras pirak si iangkat bapana Nebukadnesar i bas Rumah Pertoton si i Jerusalem nari. Isuruh raja ngelegi cangkir-cangkir e kerina gelah ia ras kalak si mbelin-mbelin ras ndeharana kerina, bage pe gundik-gundikna banci minem tare cangkir e.
3Minter ibaba kalak cangkir emas ras pirak e ku bas, emaka minem anggur ia kerina taresa,
4dingenna muji dibata-dibata si ibahan i bas emas, pirak, tembaga, besi, kayu ras batu nari.
5Rempet reh sada tan manusia, ndarat i bas dingding istana, i ja terang lampu seh kal harharna. Raja ngidah tan ndai sangana nurat.
6Mbulan ayo raja perban biarna, tiwenna nggirgir.
7Serko ia nuruh kalak gelah ngelegi guru permangmang, guru si baso, ras ahli bintang. Kenca bengket guru-guru e nina raja man bana, "Ise beluh ngoge ras ngataken erti surat enda man bangku, ia kuuisi alu jubah si meherga dingen mehaga, iburai alu rante emas, dingen man bana ibereken kuasa si peteluken i bas kerajan enda."
8Emaka rehen guru-guru si jadi penasehat raja e, tapi la lit sada pe beluh ngogesa tah ngataken ertina man raja.
9Perban biarna, reh mbulanna ayo Raja Belsasar. Kalak si mbelin-mbelin si ras ia pe lanai itehna kai si man bahanen.
10Nande raja megi sora gejek si ibahan raja ras kalak si mbelin-mbelin ndai, emaka bengket ia ku ingan man-man e. Nina, "Rasa lalaplah raja nggeluh! Ula min gulut ukurndu janah ula sambar ayondu.
11Lit sekalak dilaki i bas kerajanndu enda si lit i bassa kesah dibata-dibata si badia. Tupung bapandu mbarenda nggeluh denga, kalak si kukataken enda ndai nggo encidahken pengertinna ras kebeluhenna si mehuli, ras kepentaren si seri ras kepentaren dibata-dibata. Emaka bapandu Raja Nebukadnesar ngangkat ia jadi kepala guru-guru si ngoge nasip, guru permangmang, guru si baso, ras ahli bintang.
12I bas ia lit kecerdiken si luar biasa, janah pentar dingen beluh kal ia ngertiken nipi, njabap kuning-kuningen ras nerangken rahasia-rahasia. Emaka dilolah dilaki e, eme si Daniel, si ibahan raja gelarna Belsasar, maka iturikenna man bandu kai ertina si enda."
Daniel nuriken erti surat e
13Emaka ibaba minter Daniel ngadap man raja nina raja man Daniel, "Kam kin si Daniel, kalak Jahudi buangen si ibaba bapangku ku jenda i Juda nari?
14Nggo kubegi maka i bas kam lit kesah dibata-dibata si badia, janah kam tuhu-tuhu cerdik, beluh dingen pentar.
15Penasehat-penasehat ras guru-guru permangmang nggo ibaba ku jenda lako ngoge surat ah janah nuriken kai ertina bangku, tapi la datca ertina.
16Tapi nggo kubegi maka kam ngasup ndatken erti si terbuni dingen nuriken kai si rahasia. Adi beluh kam ngoge surat ah ras ngataken ertina man bangku, iuisi me kam alu jubah si meherga dingen mehaga, janah iburaken i bas kerahungndu rante emas, dingen man bandu ibereken kuasa si peteluken i bas kerajan enda."
17Ngaloi Daniel nina, "Man bandulah pemerendu e, di lang bereken man kalak si deban. Amin bage pe kuogeken nge man bandu kai si nggo tersurat janah kuturiken kai ertina.
18Dibata si Meganjangna erbahan bapandu Nebukadnesar jadi sekalak raja si mbelin janah IberekenNa bana dolat ras kehagan.
19Ia sekalak raja tuhu mbelin, seh maka kerina bangsa, suku, ras cakap, mbiar man bana dingen nggirgir. Ise atena ibunuhna, ibunuhna; ise atena la ibunuhna, ipelepasna nggeluh. Ipehagana tah ipeterukna kalak bagi ate-atena.
20Tapi erkiteken ukurna jadi meganjang, mekeng, dingan kejam, ipelawes ia i bas kursi kinirajanna nari, janah dolatna pe ibuat i bas ia nari.
21Ia ipedarat i tengah-tengah manusia nari, janah perukurenna jadi bali ras rubia-rubia. Ia nggeluh ras kalde si meliar, dukut jadi nakanna bali ras lembu. Ia medem i tengah mbalmbal, dagingna bernak ibahan namur si nusur i langit nari. Kedungenna iakuina maka Dibata si Meganjangna kap si ngaturken kerina kerajan manusia, janah banci IberekenNa man ise pe AteNa.
22Tapi kam, anakna la mpeteruk ukurndu aminna itehndu pe kerina si enda.
23Ilawanndu Tuhan nu langit; ipakendu cangkir ras mangkuk si ibuat i bas Rumah PertotonNa nari; kam, kalak si mbelin-mbelin, ndehara-ndeharandu, ras gundik-gundikndu nginem anggur taresa dingen ipujindu dibata-dibata si ibahan i bas emas nari, pirak, tembaga, besi, kayu, ras batu, eme dibata-dibata si la erpengidah tah erpemegi dingen si la lit kai pe pemetehna. Tapi la ihamatindu Dibata si nentuken pate geluhndu, si ngaturken kerina perbahanenndu.
24Em sabapna maka isuruh Dibata tan e nuratken kata-kata ah.
25Enda me kai si tersurat ah: MENE, MENE, TEKEL, UPARSIN.
26Antusenna eme kap: bilangen, nggo ibeligai Dibata wari-wari kinirajandu, janah IpeltepkenNa;
27timbangen, kam nggo itimbang i bas timbangen, janah teridah maka kam menahangsa;
28pembagin, kerajanndu ibagi-bagiken jenari ibereken man kalak Medi ras Persia."
29Kenca bage minter isuruh Belsasar juak-juakna nguisi Daniel salu jubah si meherga dingen mehaga janah iburaken i bas kerahungna rante emas. Kenca bage iangkatna Daniel jadi kalak si peteluken erkuasa i bas kerajan e.
30I bas berngi e Belsasar, raja Babilon e, ibunuh kalak;
31kerajanna ndabuh ku bas tan Darius kalak Medi, si umurna tupung e enem pulu dua tahun.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel