Alkitab Mobile SABDA
[VER] : [KARO]     [PL]  [PB] 
 <<  Efesus 1 >> 

1Surat enda i bas aku nari, Paulus, si nggo jadi rasul Kristus Jesus rikutken peraten Dibata. Man anak-anak Dibata i Epesus, kalak si tutus i bas kegeluhenna i bas persadan ras Kristus Jesus.

2Lias ate Dibata Bapanta ras Tuhan Jesus Kristus dingen kemalemen ate man bandu gelah.

Pemasu-masun Dibata arah Jesus Kristus

3Terpujilah Dibata Bapa Tuhanta Jesus Kristus! Sabap erdandanken persadanta ras Kristus, nggo ipasu-PasuNa kita, alu erbage-bage pemere pertendin si lit i bas ingan si meganjang.

4Ope denga ijadiken Dibata doni enda, nggo IpilihNa kita jadi SikerajangenNa arah persadanta ras Kristus gelah kita badia dingen la ersalah i lebe-LebeNa. Erdandanken keleng AteNa.

5Nggo ItetapkenNa maka arah Jesus Kristus IalokenNa kita jadi anak-AnakNa. Enda me si ngena AteNa dingen sura-SuraNa.

6Terpujilah Dibata erdandanken KiniulinNa si mulia, si IcidahkenNa man banta arah PemereNa i bas AnakNa si IkelengiNa.

7Sabap erdandanken Kristus nggo kita itebusi, eme dosa-dosanta nggo ialemi Dibata. Seh kal belinna kiniulin Dibata.

8Si IkusekenNa man banta seh riba-iba, alu dem KepentarenNa dingen PengertinNa.

9Rikutken sura-SuraNa, IpetangkasNa man banta sura-SuraNa si terligen, si nggo kin ItetapkenNa guna IsehkenNa arah Kristus.

10Rencana Dibata si IsehkenNa kenca seh paksana e, eme guna mpersadaken kerina si nasa lit, subuk i Surga bage pe si i doni, gelah Kristus jadi kepalana.

11Kerina ibahan Dibata sue ras si ngena AteNa dingen rikutken si nggo ItetapkenNa. Tangtangna nari kita nggo ipilih Dibata sabap Ia ersura-sura gelah kita dat bagin i bas kai si nggo jadi sikerajangen Kristus.

12Janah gelah kita, kalak si pemena erpengarapen man Kristus, nggeluh tama pujin man kemulian Dibata.

13Bage pe kerna kam: Asum ibegindu berita si tuhu-tuhu, Berita Si Mehuli si mbaba keselamaten man bandu, tek kam man Kristus, janah itamaken Dibata cap i bas kam, tandana kam SikerajangenNa, alu mereken Kesah Si Badia si nggo IpadankenNa.

14Kesah eme jadi jaminen maka sialoken me kai si nggo ipadanken Dibata man anak-AnakNa. Kesah e pe jadi jaminen man banta maka la banci lang idungi Dibata DahinNa guna nebusi kita, kalak si nggo jadi SikerajangenNa. Terpuji dingen ermulialah Dibata.

Pertoton Paulus

15Erdandanken si e, kenca kubegi maka kam nggo erkiniteken man Tuhan Jesus, dingen keleng atendu man kerina anak-anak Dibata.

16La aku erngadi-ngadi ngataken bujur man Dibata kerna kam. La aku lupa notoken kam.

17Kupindoken man Dibata Tuhanta Jesus Kristus, Bapa si ermulia, gelah IberekenNa man bandu kesah kepentaren dingen IpetangkasNa DiriNa man bandu gelah itandaindu Ia.

18Kupindo man Dibata gelah ItalangiNa pusuh peratenndu gelah terang pengangkanndu. Alu bage banci ietehndu kai si banci iarapkenndu i bas Dibata si ndilo kam, bage pe gelah ietehndu maka seh kal buena erta-erta si mulia si isikapken Dibata man anak-AnakNa.

19Ras gelah ietehndu maka seh kal belinna Kuasa Dibata erdahin i bas kita si tek man Kristus. Kuasa si erdahin i bas kita e, bali ras KuasaNa si mbelin.

20Si IpakeNa asum Ia mpekeke Kristus i bas si mate nari, janah IpekundulNa Ia arah KemuhenNa i bas ingan si meganjangna.

21Kuasa Kristus e ndauh kal ganjangen asangken kerina kuasa pemerentah ras penguasa si la teridah, dingen ganjangen asangken kerina peminpin ras tuan-tuan si la teridah, janah PangkatNa ganjangen asangken kerina pangkat si terbelasken, subuk i bas paksa enda, bage pe i bas paksa si reh pagin.

22Dibata nameken kerina si nasa lit ku teruh tapak-tapak nahe Kristus, janah ibereken Dibata Ia man perpulungen jadi kepala i bas kai-kai pe.

23Perpulungen eme kula Kristus, janah kula eme si ngkuhi Ia, janah Kristus me si ngkuhi kerina si nasa lit subuk i japa pe.



 <<  Efesus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran