Dahin Paulus i tengah-tengah si labo kalak Jahudi
1Erdandanken si enda me maka ertoto aku man Dibata, aku Paulus, si ipenjaraken erdandanken Kristus man gunandu kalak si labo Jahudi.
2Tentu nggo ibegindu uga Dibata ngangkat aku jadi SerayanNa guna nehken lias AteNa guna kepentingenndu.
3Dibata nge si petangkassa man bangku maka kuertiken RahasiaNa si terbuni. Kerna si enda nggo kusuratken alu gendek man bandu,
4janah adi iogendu kai si nggo kusuratken e, tentu iangkandu uga bagesna pengertinku kerna rahasia Kristus e.
5Gelgel nari rahasia enda la IpebetehkenNa man manusia, tapi genduari nggo ipetangkas Dibata alu KesahNa man rasul-rasul ras Nabi NabiNa.
6RahasiaNa enda eme: Arah Berita Si Mehuli, kalak si labo Jahudi pe ikut dat bagin kai si nggo isikapken Dibata. Kalak enda nggo ikut jadi ring-ring i bas sada kula, janah ikut pe dat bagin i bas padan si nggo ibahan Dibata i bas Kristus Jesus.
7Aku nggo iangkat jadi serayan Berita Si Mehuli arah PemereNa si khusus, si IberekenNa alu gegeh KuasaNa.
8Aku me si la metunggungna i bas kerina anak-anak Dibata. Amin bage pe erkiteken lias AteNa IberekenNa ka nge man bangku tugas istimewa, eme guna meritaken Berita Si Mehuli man si labo kalak Jahudi kerna kinibayaken Kristus si la ersibar.
9Janah gelah kerina manusia ngidah pelaksanan rencana Dibata si terbuni e. Dibata si njadiken kerina si nasa lit, muniken rahasia enda nai-nai nari.
10Gelah genduari arah perpulungen, kerina peminpin penguasa-penguasa ingan si meganjang meteh kepentaren Dibata si melala tempasna.
11Si enda ibahan Dibata rikutken rencana si kekal, si IdungiNa arah Kristus Jesus Tuhanta.
12I bas kita ersada ras Kristus dingen erdandanken tek kita man BaNa lit hakta guna ngadap ku lebe-lebe Dibata alu la biar-biaren.
13Emaka kupindoken man bandu ula kam biar-biaren kerna kiniseran si kunanami erdandanken kam; si tuhuna kiniseranku enda arus erbahanca megah akapndu.
Keleng ate Kristus
14Erdandanken si emaka aku erjimpuh i lebe-lebe Bapa.
15I bas Ia nari me kerina kinibapan i doni enda ras i Surga ndatken pengesahen.
16Kupindoken man Dibata gelah i bas KinibayakenNa si la ersibar nari IberekenNa man bandu kuasa arah KesahNa guna mpegegehi pusuh peratenndu.
17Janah gelah Kristus ringan i bas pusuhndu erdandanken kam tek man BaNa. Ertoto aku gelah kam rurat dingen erpalas i bas keleng ate.
18Gelah raduken kerina anak-anak Dibata ngasup kam ngangka kuga belangna, gedangna, ganjangna ras bagesna keleng ate Kristus e.
19Tuhu, mbera-mbera ietehndu keleng AteNa e aminna gia keleng AteNa ngelebihi kerina pemeteh, seh maka kam idemi alu biak Dibata si serta.
20Pujin man Dibata si ngasup erbahan kai pe ndauh beliden asangken ngasup kita mindosa ntah pe ngukurisa alu KuasaNa si sangana erdahin i bas kita.
21Kemulian man BaNa i bas perpulungen ras i bas Kristus Jesus, rasa lalap seh rasa lalap. Amin.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel