Alkitab Mobile SABDA
[VER] : [KARO]     [PL]  [PB] 
 <<  Filipi 2 >> 

Jesus Kristus jadi usihen

1Kegeluhenndu i bas Kristus erbahanca kam megegeh. Ma kin keleng AteNa e ngapuli kam? Ma rembak kin kam ras Kesah Dibata? Ma kin sikeleng-kelengen kam dingen mekuah atendu sekalak nandangi si debanna?

2Gelah tuhu-tuhu malem ateku, kupindoken man bandu: Ersada min arihndu, sikeleng-kelengen min kam, ersada min geluhndu dingen ersada ukurndu.

3Ula ibahanndu kai pe erpalasken kerangapen, ntah si erpalasken ukur meganjang. Tapi peteruklah ukurndu sekalak nandangi si debanna. Ula kal iakapndu ulin kam asangken kalak si deban.

4Ula keperlunndu saja ngenca iperdiatekenndu tapi perdiateken pe keperlun kalak si deban.

5Perukurenndu bali min ras perukuren Kristus Jesus:

6Aminna gia tetap lit i bas Ia biak Dibata, erkuasa dingen ermulia Ia bali ras Dibata, tapi si enda la IpertahankenNa.

7Arah ukurna jine ItadingkenNa kerina si lit i bas Ia. Jadi seri Ia ras manusia; nggeluh bagi sekalak juak-juak. Janah teridah bagi sekalak jelma.

8Meteruk UkurNa, janah patuh Ia man Dibata seh matena pe; eme mate i kayu persilang.

9Erdandanken si e ipehaga Dibata kal Ia. Ibereken Dibata man BaNa kuasa si meganjangna kal.

10Gelah kerina si enggeluh i Surga, i babo doni ras i teruh doni erjimpuh nembah man BaNa.

11Janah ngakuken maka Jesus Kristus e tuhu-tuhu Tuhan, guna kemulian Dibata Bapa.

Ersinalsal bagi terang i bas doni

12Emaka, o teman-temanku, bagi tetap ikutkenndu katangku, asum aku ras kam, terlebih pe genduari ikutkenlah katangku asum aku ndauh i bas kam nari. Tetaplah erdahin alu mbiar dingen gentar enggenepi keselamatenndu.

13Sabap Dibata pe tetap erdahin i bas kam gelah kam nggit dingen ngasup ndalanken si ngena AteNa.

14Dahikenlah kerina dahin alu la jungut-jungut ntah nimbak.

15Gelah kam la ersalah dingen la erpandangen selaku anak-anak Dibata si serta si nggeluh i bas doni kalak si jahat dingen erdosa. Ersinalsal min kam i tengah-tengahna bagi bintang-bintang nerangi langit.

16Asum iberitakenndu Berita Kegeluhen e man bana. Adi bage ibahanndu lit pagi dalanna megah kuakap kerna kam i bas Wari Kristus reh mulihken, sabap si e nuduhkenca maka kerina usahangku ras pendahinku la sia-sia.

17Banci jadi mambur me darehku jadi persembahen i babo persembahen si ipersembahkenndu man Dibata alu kinitekenndu. Adi bage meriah ukurku, janah kerina kam kubahan ngenanami keriahenku e.

18Bage pe min kam, meriahlah min ukurndu, janah bahanlah maka aku pe ngenanami keriahenndu e.

Timotius ras Epaproditus

19Tek aku maka arah penampat Tuhan Jesus banci pedas kusuruh Timotius ndahi kam, gelah alu megi berita kerna kam reh tetapna ukurku.

20Timotius ngenca ngangka ukurku dingen si tuhu-tuhu nggit rukur kerna kam.

21Kalak si deban ngukurken urusenna saja, labo dahin Jesus Kristus.

22Kam jine pe ietehndu nge kuga Timotius nggo ncidahken kengasupenna, kuga ia ras aku, bagi sekalak anak ras bapa, ras-ras erdahin erdandanken Berita Si Mehuli e.

23Emaka ngarap aku maka banci minter ia kusuruh ndahi kam, kenca kueteh kuga pagi keputusen perkarangku.

24Tek aku maka alu penampat Tuhan, aku pe banci pagi minter reh ndahi kam.

25Perlu pe kuakap kusuruh seninanta Epaproditus ndahi kam, si nggo erdahin janah erjuang ras aku dingen nggo isuruhndu erdahin nampati aku.

26Mesikel kal ia jumpa ras kam kerina janah ndele atena sabap ibegindu berita kerna ia sakit.

27Tuhu sakit ia mbaru enda, janah menam pe mate. Tapi mekuah ate Dibata ia; janah labo saja ia, tapi aku pe mekuah ka nge ate Dibata, IpulahiNa aku i bas ceda ate si mbelin e nari.

28Reh tetapna ukurku nuruh ia ndahi kam gelah meriah mulihi ukurndu kenca kam jumpa ras ia, janah lesap pe ceda ateku.

29Emaka meriahlah ukurndu ngalo-ngalo ia, bagi sekalak senina i bas Tuhan.

30Mehamatlah man kalak si bagi ia, sabap ia nggo ngasamken kesahna janah menam pe mate, erdandanken dahin Kristus, guna mereken penampat man bangku si la kam ngasup merekenca man bangku.



 <<  Filipi 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran