Alkitab Mobile SABDA
[VER] : [KARO]     [PL]  [PB] 
 <<  Ibrani 12 >> 

Dibata Bapanta

1Dage man banta, nteremkap saksi si ngkeleweti kita. Emaka siaguilah kerina si ngambati i bas perdalanenta, bage pe dosa e si lalap ncerawisi kita. Tutuslah ateta ngikuti perlumban si lit i lebe-lebenta.

2Kempak Jesuslah kita natap, sabap ia me sumbul ras tujun kinitekenta. IgengkenNa ngenanami kiniseran i kayu persilang! Tapi erdandanken keriahen si nimai Ia, lanai IukuriNa mela mate i kayu persilang. Janah genduari kundul Ia arah kemuhen kursi kinirajan Dibata.

3Ukurilah uga belinna kiniseran Jesus ngalaken perlawanen si rehna i bas kalak perdosa nari. Emaka ula kitik ukurndu, dingen ula kam putus asa.

4Sabap i bas kam erbebe ngelawan dosa langa kam seh ngamburken dareh.

5Lanai kin ingetndu pengajaren si ikataken Dibata man bandu selaku anak-AnakNa? "O anakKu, perdiatekenlah adi iajarken Tuhan kam, janah ula kitik ukurndu adi IrawaiNa kam.

6Sabap iajarken Tuhan kalak si IkelengiNa, janah IligasNa tep-tep kalak si IalokenNa jadi AnakNa."

7Gengkenlah kiniseran si reh man bandu. Alokenlah e bagi ajar i bas sekalak bapa nari, sabap kiniseranndu e ncidahken maka ibahan Dibata kam bagi anak-AnakNa. Lit kin sekalak anak si la ididik bapana?

8Adi la kam iajarken bagi anak-AnakNa si deban, labo kam anak si sah, tapi anak haram.

9I doni enda lit bapanta. Bapanta e ndidik kita, janah mehamat kita man bana. Adi bage tentu arus pe lebihen sibahan nandangi Bapanta si i Surga, gelah kita nggeluh.

10Bapanta si i doni enda kentisik ngenca kita iajarkenna, bagi mehuli iakapna. Tapi kita iajarken Dibata guna kiniulinta, gelah banci kita dat bagin i bas KebadianNa.

11Asum kita iajarken, ceda ateta, la siakap meriah. Tapi dungna, kita si nggo terdidik, pengajaren e erbahanca kita nggeluh rikutken si ngena ate Dibata, seh maka malem ateta.

Pedah dingen kata pertenget

12Emaka angkatlah tanndu si kote, janah pegegehlah tiwenndu si la ergegeh!

13Tetaplah kam erdalan i bas dalan si pinter gelah nahendu si tersiher la ersuina, tapi gelah malem.

14Meriahlah ras ise pe, janah usahakenlah nggeluh bagi si ngena ate Tuhan, sabap adi la bage ise pe labo banci ngidah Tuhan.

15Jagalah maka sekalak pe ula surut i bas lias ate Dibata. Jagalah maka sekalak pe ula bagi sinuan-sinuan si pagit uratna, si turah nuhsahi nterem jelma alu racunna.

16Jagalah maka ula sekalak pe erlagu la mehuli ntah la ngergai si meherga iakap Dibata bagi si Esau, si ndayaken hakna selaku anak sintua, erdandanken sada mangkuk pangan.

17Ietehndu maka dungna ersura-sura Esau ngaloken pasu-pasu i bas bapana nari; tapi itulak ia aminna pe ipindona alu iluh mambur, sabap la lit idatna dalan guna ngobah kai si nggo ibahanna.

18Kam labo reh ku Deleng Sinai, deleng si banci idadap; i je lit api si gurlah, gelap mesangat, angin meter;

19sora terompet, Sora Ngerana. Asum ibegi bangsa Israel sora e, mindo ia alu mesangat gelah ulanai min ibegina.

20La ia ngasup megisa sabap lit perentah i bas Sora e nari, "Kasa kai si ndadap deleng e, subuk jelma ntah asuh-asuhen, la banci la ibenteri alu batu seh mate."

21Kai si teridah i je seh kal mejinna, seh maka Musa pe ngerana nina, "Mbiar dingen ngirgir kal aku!"

22Tapi kam nggo reh ku Deleng Sion bage pe ku Kota Dibata si nggeluh, e me Jerusalem si i Surga ras meribu-ribu MalekatNa.

23Kam nggo reh ku perpulungen si meriah, e me perpulungen kerina anak sintua i bas Dibata, si gelarna nggo tersurat i Surga. Kam nggo reh ku Dibata, Hakim kerina manusia, bage pe ku kerina tendi kalak bujur si nggo serta ibahan Dibata.

24Kam nggo reh ku Jesus, e me kelang-kelang padan si mbaru, bage pe ku dareh si ipirpirken, si mbaba berita si ndauh ulin asangken si ibaba dareh Abil.

25Emaka jaga gelah ula la ibegikenndu Si Ngerana e. Adi kalak si la megiken Ia Si Ngerana i Deleng Sinai mbarenda pe la pulah, apai denga ka kita si la megiken Ia si ngerana i Surga nari, tentu la banci pulah i bas Ia nari!

26Paksa si e nai meger doni enda ibahan SoraNa. Tapi genduari nggo erpadan Ia, "Sekali nari ngenca pagi Kuugur, labo saja doni enda, tapi Surga pe."

27Kata "sekali nari ngenca" ngataken maka kerina si nasa lit si nggo ijadiken Dibata si banci iugur nandangi isambari, gelah tading kai si la terugur.

28Emaka sikataken bujur man Dibata, sabap IberekenNa man banta kerajan si la terugur. Sikatakenlah bujur dingen sisembah Dibata bagi si ngena AteNa, alu mehamat dingen mbiar;

29sabap Dibatanta situhuna api si ngkernepken kap.



 <<  Ibrani 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran