1TUHAN mereken peraturen-peraturen enda man Musa:
2Ise erdosa man TUHAN erkiteken la ia nggit ngulihken barang si isimpanken temanna kalak Israel i bas ia, ntah pe itangkona barang temanna e, ntah pe ibuatna barang temanna arah penipun,
3ntah pe idatca barang si bene tapi ersumpah ia alu guak maka nina la lit idatca barang e, maka kalak si bage arus erbahan persembahen man TUHAN.
4Adi lit kalak erdosa alu ngelakoken ntah apai gia bagi si tersena enda ndai arus maka iulihkenna kai si idatna alu dalan si la bujur e. Tupung kesalahenna e terdat, i bas wari e ka pe arus dem igalarina man empuna ndai, janah itambahi ka pe seperlimana nari.
5(Im 6:4)
6Ibabana lah man imam sada bajar biri-biri ntah pe kambing si la lit sitik pe man pandangen, jadi sada persembahen pertebusen man TUHAN. Ergana itetapken rikutken patoken si sah.
7Ipersembahken imam lah persembahan e guna dosa kalak ndai, emaka ialemi me dosana.
Persembahen tutungen
8Iperentahken TUHAN man Musa
9gelah ibereken man Harun ras man anak-anakna peraturen-peraturen kerna persembahen tutungen. Tadingken lah persembahen tutungen sada berngi i babo batar-batar, janah apina arus ijaga gelah tetap gara.
10Kenca bage, alu erpaken jubah lenen ras saluar lenen, imam arus ngagui abu si erminak si tading i babo batar-batar e, jenari itamaken ku deher batar-batar e.
11Kenca bage maka ganti paken ia, jenari ibabana abu e ku darat ingan erkemah, ku ingan si bersih rikutken aturen agama.
12Api i das batar-batar arus ijaga gelah tetap gara janah ula pelepas nimpet. Tep-tep erpagi-pagi imam arus namaken ranting ku je, ngatur persembahen tutungen e i babo ranting, ras nutung tabeh-tabeh persembahen persadan.
13Api arus ijaga maka tetap gara i babo batar-batar, janah ula pelepas nimpet.
Persembahen pangan
14Enda me aturen-aturen kerna persembahen pangan: Sekalak imam i bas kesusuren Harun nari mpersembahken pangan man TUHAN i lebe batar-batar persembahen.
15Kenca bage ibuatna lah tepung e sempukul ras minak bage pe kumenen si i babo tepung e, emaka itutungna i das batar-batar persembahen tandana nggo kerina ipersembahken man TUHAN. Bau persembahen e merim iakap TUHAN.
16Si lebihna arus ipan imam-imam. Tepung e arus ibahan jadi roti si la itama ragi, jenari ipan i bas ingan si badia, i kesain Kemah Perjumpan. Kai si nggo ibereken TUHAN i bas persembahen pangan e nari, jadi bagin imam-imam. Badia kal e, bali ras persembahen dosa ntah pe persembahen erkiteken salah.
17(Im 6:16)
18I bas paksa-paksa si reh enda, apai pe kesusuren Harun si dilaki banci manca selaku baginna i bas persembahen pangan e. Kalak si deban si manca la banci lang isakiti, erkiteken kuasa kebadianna.
19Ibereken TUHAN aturen-aturen enda man Musa,
20guna penangkuhen imam i bas kesusuren Harun nari. I bas wari penangkuhenna iberekenna lah man TUHAN sada kilo tepung (seri buena ras persembahen pangan si tep-tep wari), setengah erpagi-pagi setengah karaben.
21Campurken ras minak, itasakken tare belanga. Kenca bage iripukken, jenari ipersembahken jadi persembahen pangan. Bau persembahen e merim iakap TUHAN.
22I bas paksa-paksa si reh enda pe, persembahen si bagenda arus isehken tep-tep kesusuren Harun si jadi Imam si Mbelin. Persembahen e arus itutung ngayak keri jadi persembahen man TUHAN.
23Persembahen pangan si ipersembahken imam la banci sitik pe ipan, kerinana arus itutung.
Persembahen kerna dosa
24Iperentahken TUHAN man Musa
25gelah iberekenna man Harun ras anak-anakna peraturen-peraturen si arah teruh enda, eme kerna persembahen erkiteken dosa. Asuh-asuhen guna persembahen dosa arus igeleh arah Utara batar-batar persembahen, ingan nggeleh asuh-asuhen persembahen tutungen. Persembahen e seh kal badiana.
26Imam si mpersembahken asuh-asuhen e arus man persembahen e i bas ingan si badia eme i kesain Kemah Perjumpan.
27Ise kalak ntah kai saja si ngkuit daging asuh-asuhen e lanai banci ipergunaken guna pemaken biasa. Asa kai uis si kena dareh asuh-asuhen e arus icuci i bas ingan si badia.
28Asa kai kudin taneh penanggeren daging e la banci la ipecahken, janah adi itangger tare kudin gelang-gelang la banci la igus-gusi, jenari iburihi alu lau.
29Kasa kai dilaki i bas keluarga imam banci ipanna persembahen enda; persembahen e seh kal badiana.
30Tapi adi lit dareh e i baba ku bas Kemah Perjumpan, jenari igunaken i bas lakon pengalemi dosa, daging asuh-asuhen e la banci ipan, tapi arus itutung.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel