Lawes senina Jusup ku Mesir nukur nakan
1Kenca ibegi Jakup maka i Mesir melala gandum, emaka nina man anak-anakna, "Ngkai maka si nehenen saja kena?
2Nggo kubegi maka i Mesir melala gandum. To lawes ku jah nukursa gelah ula kita mate la man."
3Emaka lawes me sepuluh kalak senina Jusup nukur gandum ku Mesir.
4Tapi Benyamin, eme senina Jusup sada nande, la ipediat Jakup ngikut ras kalak enda, erkiteken mbiar ia ntah lit denggo kai-kai jadi man bana.
5Anak-anak Jakup lawes ras kalak si deban nukur gandum e, erkiteken kelihen e jadi i belang-belang taneh Kanaan.
6Jusup, selaku wakil raja i taneh Mesir sangana ndayaken gandum man kerina kalak si reh i belang-belang doni nari. Emaka reh me senina-senina Jusup nembah mungkuk i lebe-lebena, ayona seh ku taneh.
7Kenca nggo iidah Jusup seninana, itandaina kalak enda, tapi ipekulah-kulahna la itandaina. Alu kasar isungkunina kalak ndai nina, "Ja nari kam?" Nina kalak enda njabapsa, "Kami i Kanaan nari, nukur nakan ate kami."
8Dage itandai Jusup nge seninana e kerina, tapi seninana e la nandai ia.
9Iingetna me nipina gelgel e kerna seninana. Jenari nina, "Mata-mata nge kena. Ndaram-ndarami kelemahen negeri kami enda nge ate kena ku jenda."
10"Lang Tuan," nina kalak enda njabapsa. "Kami budakndu enda kerina reh ku jenda, nukur nakan ate kami.
11Kami kerina sada bapa. Kami labo mata-mata Tuan, kami kalak bujur-bujur nge."
12Nina Jusup man kalak enda, "Labo! Ngenen kelemahen negeri kami enda nge ate kena kerina ku jenda."
13Nina kalak enda, "Kami sepulu dua kalak ersenina Tuan, kerina kami sada bapa; ia ringan i taneh Kanaan; sada i bas kami nggo mate, sada nari eme si nguda tading ras bapa."
14Nina Jusup njabapsa, "Bagi kukataken ndai mata-mata nge kena kerina.
15Bagendam carana kena iuji. I bas gelar raja ersumpah aku, maka la banci sada pe kena lawes jenda nari adi la reh agi kena si nguda ndai ku jenda.
16Sekalak kena ngelegisa, si deban itutup i jenda. Alu bage banci iuji ntah kin tuhu-tuhu kai si ikataken kena e. Adi la tuhu, i bas gelar raja ningku, kena pe kerina pasti mata-mata."
17Kenca bage, itutupna kalak e kerina i bas tutupen telu wari dekahna.
18Petelu wariken nina Jusup man bana kerina, "Aku kalak si mbiar man Dibata. Kupelepas kena nggeluh, la ibunuh, tapi alu sada sarat.
19Metehsa tuhu-tuhu kena bujur, sekalak kena tading i bas tutupen; si debanna banci mulih maba gandum si nggo itukur kena e man keluarga kena si sangana kelihen e.
20Kenca bage arus ibaba kena senina kena si nguda ndai man bangku. Arah e kari tereteh maka tuhu kepe si ikataken kena e, emaka la kena kubunuh." Kai si ikataken Jusup payo akap kalak enda.
21Ngeranai ia sapih-sapih ia, "Salah kap kita kerna perbahanenta man aginta mbarenda; si idah uga suina atena mbarenda asum ia mindo perkuah ateta, tapi la diateta. Em sabapna maka mesui ka ateta genduari."
22Nina Ruben, "Kukataken nge man kena ula uga pe ban anak e ningku, tapi la begiken kena. Genduari kematenna ibalas man banta."
23Ierti Jusup nge kerina ranan kalak enda, tapi la ieteh kalak enda, perban Jusup ngerana erkelang-kelangken kalak si deban.
24Itadingken Jusup kalak ndai, kenca bage tangis ia. Kenca nggo ka ia banci ngerana, mulihken ia. Ipilihna Simeon, janah isuruhna iiket i lebe-lebe kalak ndai kerina.
Mulih senina Jusup ku Kanaan
25Iperentahken Jusup ngisi guni senina-seninana alu gandum ras ngulihken duit seninana e ku tep-tep gunina, bage pe mereken nakan panganna i bas perdalanen. Kerina si enda idalanken.
26Kenca bage iampeken kalak enda gandum si nggo itukurna e ku das kaldena emaka lawes ia.
27I bas ingan kalak enda erberngi, sekalak i bas ia nalangi gunina, sabap mere man kaldena atena. Idahna duit ampar arah das guni e.
28"Senku iulihken," nina man seninana. "Enda i bas guningku!" Debet-debet pusuh kalak enda. Si sungkunen ia sapih-sapih ia alu kebiaren, "Kai nge deba perbahanen Dibata man banta e?"
29Kenca kalak enda seh i Kanaan jumpa ras bapana Jakup, iturikenna bana kerina si jadi.
30Nina kalak enda, "Wakil raja Mesir la mehuli cakapna man kami; ituduhna kami maka imata-matai kami negerina.
31'Labo kami mata-mata,' ningkami, 'kami kalak bujur-bujur.
32Sepulu dua kami senina i bas sada bapa e. Sekalak senina kami nggo mate. Si nguda ras bapa kami tading i Kanaan.'
33Nina wakil raja e, 'Bagenda ku ban dalanna nguji kena kalak bujur ntah lang: Tading kena sekalak ras aku; si debanna maba gandum man keluarga kena si kelihen, janah banci kena lawes.
34Baba agi kena si nguda man bangku. Alu bage kueteh maka labo kena mata-mata, tapi kalak bujur; kuulihken pagi senina kena, janah banci kena tading i jenda dingen erbinaga.'"
35Kenca iuseken kalak enda kerina gunina, sekalak-sekalak ia ndat gajut-gajut senna; sanga idah kalak enda sen e, kalak enda ras bapana mbiar kal.
36Nina bapana, "Ntah merincuh nge kena gelah bene kerina anakku? Jusup nggo bene; Simeon pe nggo bene. Genduari ibaba kena ka ate kena Benyamin. Ateku ngenca mesui!"
37Nina Ruben man bapana, "Adi la pagi kubaba Benyamin mulihken banci ibunuhndu duana anakku si dilaki. Endesken bangku njaga Benyamin."
38Tapi nina Jakup, "La banci lawes anakku ras kena, seninana nggo mate, tading ia naring. Kune kenca jadi cilaka man bana i bas perdalanen banci erkiteken ceda ateku e aku mate sabap aku nggo metua."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel