Sepuluh Pedah Dibata (Ul 5:1-21)
1Ngerana Dibata, janah enda me KataNa,
2"Aku kap TUHAN Dibatandu, si maba kam ndarat i Mesir nari, inganndu iperbudak.
3Ula isembahndu dibata-dibata si deban, tapi sembah lah Aku.
4Ula ibahanndu gana-gana tah gambar-gambaren kerna kai pe si lit i datas langit, i doni, ntah pe si i bas lau i teruh doni.
5Ula kam erjimpuh man gana-gana ntah pe ersembah ku je, sabap Aku kap TUHAN Dibatandu si percemburu. Asa kai kalak si ernembeh ate man bangKu Kuukum ia, ras anak-anakna, seh ku kesusurenna si peteluken ras si peempatken.
6Tapi tetap Kukelengi kalak si engkelengi Aku ras si ngikutken undang-undangKu, seh kempak meribu-ribu kesusuren.
7Ula ipakendu gelarKu guna tujun si jahat, sabap Aku TUHAN Dibatandu, la banci la ngukum asa kai kalak si nalah gunaken gelarKu.
8Inget wari Sabat janah pebadiaken lah wari e.
9Enem wari arus kam erdahin guna ndahiken dahinndu;
10tapi wari si pepituken eme sada wari pengadi-ngadin si man persembahenken man bangKu saja. I bas wari e, ise pe la banci erdahin: kam, anak-anakndu, budak-budakndu, asuh-asuhenndu, bage pe kalak pertandang si ringan i bas negerindu.
11Sabap i bas enem wari Aku TUHAN nggo njadiken doni, langit, lawit, ras kerina isina, tapi i bas wari si pepituken ngadi Aku. Em sabapna maka Kupasu-pasu wari Sabat janah Kupebadiaken wari e.
12Mehamatlah man bapandu ras nandendu, gelah banci kam ndekah nggeluh i bas negeri si Kubereken man bandu pagi.
13Ula munuh.
14Ula erlua-lua.
15Ula nangko.
16Ula ibahan-bahanindu salah kalak.
17Ula mengga atendu rumah kalak; ula mengga atendu ndeharana, budakna, lembuna, keledena, ntah kai gia sikerajangenna."
Mbiar bangsa Israel (Ul 5:22-33)
18Kenca ibegi kalak Israel sora lenggur ras sora trompet si megang e janah idahna kilap ras deleng si erdipul e, nggirgir ia kerina ban biarna emaka idauh-dauh nari ia tedis.
19Nina bangsa e man Musa, "Adi kam ngerana man kami nggit kami megikenca; tapi adi Dibata ngerana man kami mbiar kami mate IbahanNa."
20Nina Musa erjabap, "Ula mbiar; nguji kam saja kap ate Dibata reh, gelah kam tetap mbiar man BaNa, maka ula kam erbahan dosa."
21Tapi kalak Israel tetap tedis i dauh-dauh nari, emaka Musa ngenca lawes ndeheri ingan Dibata i bas embun si mbiring e.
Undang-undang kerna batar-batar
22Isuruh TUHAN me Musa gelah ikatakenna man bangsa Israel bagenda, "Nggo idahndu uga Aku, TUHAN, ngerana man bandu i langit nari.
23Ula ibahanndu dibata-dibata pirak ntah emas jadi tambahen sembah-sembahenndu, tapi Aku ngenca banci isembahndu.
24Bahanlah sada batar-batar taneh ingan persembahen man bangKu, janah persembahken lah i babona biri-birindu ras lembundu jadi persembahen tutungen ras persembahen perdamen. I bas tep-tep ingan si Kuserapken man bandu jadi inganndu ersembah man bangKu, reh Aku ndahi kam janah Kupasu-pasu kam.
25Adi ibahanndu batar-batar batu man bangKu, ula bahan e i bas batu si nggo ipahat nari, sabap adi ibuatndu batu e, lanai patut ipake man bangKu.
26Ula ibahanndu man bangKu batar-batar si ertangga; adi bage ibahanndu, teridah kam kari bagi si majang-anjang tupung kam nangkih arah tangga e."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel