Alkitab Mobile SABDA
[VER] : [KARO]     [PL]  [PB] 
 <<  Keluaran 23 >> 

Keadilen ras kinibujuren

1"Ula pebelang berita-berita si la tuhu, janah ula sampati kalak si salah alu mereken bukti-bukti si la tuhu.

2Ula ikutken jelma si nterem si erbahan salah ntah pe si mereken kesaksin guna nutupi keadilen.

3Ula erpendobahen iakapndu kalak musil adi lit perkarana.

4Adi idahndu lembu ntah kelede imbangndu pulah, tangkap janah bereken man bana.

5Adi keledena guling erkiteken baban si mberat, sampatilah ia petedissa; ula kam mentas saja.

6Berekenlah keadilen man kalak musil adi lit perkarana i bas pengadilen.

7Ula bahan-bahan kesalahenna, janah ula munuh kalak si la ersalah, sabap la banci la Kuukum kalak si erbahan kejahaten si bage.

8Ula aloken uang sogok, sabap uang sogok erbahanca kalak lanai ngidah si benar, janah perkara kalak si la ersalah ibalikken.

9Ula erbahan si la bujur nandangi kalak pertandang; nggo itehndu uga nanamna jadi kalak pertandang, sabap kam pe nai kalak pertandang nge i Mesir."

Tahun si pepituken ras wari si pepituken

10"Enem tahun banci isuanindu jumandu janah perani kai si iasilkenna.

11Tapi i bas tahun si pepituken pelepas jumandu e ngadi, janah ula perani kai pe si turah i je. Kai si turah i je ipan kalak musil, janah rubia-rubia si meliar banci mangani kai si tading. Kebun anggurndu ras batang saitun pe bage lah ban.

12Enem wari kam erdahin i bas sada minggu, tapi ula kam erdahin i bas wari si pepituken, gelah budak-budakndu ras kalak pertandang si erdahin ras kam bage pe asuh-asuhenndu banci pekesahken.

13TUHANndu kap si ngerana man bandu e; begiken lah kerina si nggo Kukataken. Ula ertoto man dibata-dibata si deban; ula singetken pe gelarna."

Telu wari raya si mbelin (Kel 34:18-26; Ul 16:1-17)

14"Rayaken telu wari raya setahun guna mereken kemulian man bangKu.

15I bas bulan Abip, bulan tupung kam nadingken Mesir, rayaken Wari Raya Roti si la tama ragi, bagi si Kupedahken man bandu. Ula pan roti kai pe si lit ragina kidekah pesta si pitu wari e. Tep-tep kali kam ersembah man bangKu, la banci la ibabandu persembahenndu.

16Pestakenlah Kerja Rani asum ibenakenndu mperani buah pagendu. Pestakenlah Wari Raya Sapo-sapo i bas pengkeri-kerin tahun, asum iperanindu buah anggurndu ras si debanna.

17Tep-tep tahun i bas wari raya si telu enda ndai, kerina dilaki la banci la reh ersembah man bangKu, TUHAN, Dibatandu.

18Ula ipersembahkenndu man bangKu roti si tama ragi, adi ipersembahkenndu ka asuh-asuhen. Lemak asuh-asuhen si ipersembahken sangana wari-wari raya enda ndai la banci iahanken seh ku pagina erpagi-pagi.

19Tep-tep tahun baba ku Rumah TUHAN Dibatandu buah page si pemena si iperanindu. Ula tanggerken anak biri-biri ntah pe kambing alu lau susu indungna."

Padan ras perentah-perentah

20"Kusuruh sada malekat arah lebendu ngkawali kam i bas perdalanenndu janah mabai kam ku ingan si nggo Kusikapken.

21Perdiateken lah ia janah ikutken lah. Ula lawan ia, sabap nggo Kusuruh ia, janah la lit ampunen adi ilawanndu ia.

22Tapi adi iikutkenndu ia janah ibahanndu asa kai si Kuperentahken, Aku ngelawansa kerina musuhndu.

23MalekatKu erdalan arah lebendu janah ibabaina kam ku taneh kalak Amori, Heti, Peris, Kanaan, Hewi ras Jebusi, janah Aku ngkernepkenca bangsa-bangsa e.

24Ula kam erjimpuh ntah pe ersembah man dibata-dibatana; janah ula iusihndu adat si lit i bas agamana. Kernepken dibata-dibatana, runtuhken kerina tugu-tuguna si badia.

25Adi isembahndu Aku, TUHAN Dibatandu, Kupasu-pasu kam alu mereken pangan ras lau, janah Kuagui kerina penakitndu.

26I bas negerindu la lit diberu si keguguren, la lit si la mupus. Kuban kam nggeluh cawir metua.

27Mbiar imbang-imbangndu kerina Kubahan man bangKu; Kuhuntakken imbangndu erperang, janah Aku erbahanca maka kerina musuhndu kiamen nadingken kam.

28Guntar Kubahan musuh-musuhndu, Kupelawes bangsa Hewi, bangsa Kanaan ras bangsa Heti tupung kam mengketi tanehna.

29Tapi la ia Kupelawes i bas sada tahun; sabap adi bage Kubahan, taneh e nggo kari jadi melungun, janah mbuesa pagi iakapndu rubia-rubia si meliar jadi musuhndu.

30Emaka sitik-sitik ia Kupelawes seh maka nggo cukup teremna kam ngkuasai taneh e.

31Kupebelang baleng negerindu i bas Teluk Akaba nari seh ku Lau Eprat janah i Lawit Tengah nari seh ku gurun pasir. Kubereken gegeh man bandu naluken penduduk negeri e, janah ipelawesndu ia kerina tupung kam bengket.

32Ula ibahanndu perpadanen ras ia ntah ras dibata-dibatana.

33Ula bere bangsa-bangsa e ringan i bas negerindu; sabap adi iberendu, ibabaina kam pagi erdosa man bangKu. Adi isembahndu dibata-dibatana, nggo kam kena siding si erbahanca kam mate."



 <<  Keluaran 23 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran