Alkitab Mobile SABDA
[VER] : [KARO]     [PL]  [PB] 
 <<  Kisah Para Rasul 12 >> 

Tole inanami Perpulungen kiniseran

1Asum Herodes jadi raja, ngawan perpulungen ngenanami kiniseran.

2Isuruh Herodes gelah Jakup, senina Johanes, ibunuh alu pedang.

3Kenca ieteh maka kai si ibahanna e ngena ate kalak Jahudi, emaka isuruhna ka kalak nangkap Petrus. (Si enda jadi asum Wari Raya Roti si la erragi.)

4Kenca Petrus itangkap, itamaken ia ku bas penjara. Ia ijagai empat terpuk perajurit; tep-tep terpuk empat kalak. Sura-sura Herodes iadili Petrus i lebe-lebe jelma si nterem kenca lepas wari Paskah.

5Tapi asum Petrus i bas penjara, perpulungen alu tutus ate lalap ertoto man Dibata kerna ia.

Petrus ipulahi malekat i bas penjara nari

6Berngina, ope Petrus ibaba Herodes ku lebe-lebe jelma si nterem, tunduh Petrus i kelang-kelang dua kalak perajurit. Ia iiket alu dua rante besi janah i lebe-lebe pintun lit perajurit erjaga.

7Jenari rempet tedis malekat Tuhan deherken Petrus, janah terang ersinalsal i bas penjara e. Itamaken malekat e tanna ku babo bara Petrus, ingetina ia nina, "Kekekenlah!" Minter mosar rante si ngiket tan Petrus.

8Jenari nina malekat man bana, "Genditkenlah genditndu janah pake sepatundu!" Ikutken Petrus kata malekat e jenari nina ka malekat, "Pake jubahndu jenari ikutken aku!"

9Ikutken Petrus malekat ndarat i bas penjara nari. Amin bage gia labo ia sedar maka kai si ibahan malekat nandangi ia, eme kejadin si tuhu-tuhu. Iakapna maka ia ngaloken sada pengenehenen.

10Ibentasina penjagan si pemena, si peduaken janah seh pe ia ku gerbang besi dalan ndarat. Talang jine gerbang besi e asum ia mentas. Kenca seh i darat erdalan ia duana arah sada gang, jenari rempet itadingken malekat e Petrus.

11Kenca sedar Petrus nina, "Genduari nggo kueteh maka tuhu-tuhu aku nggo ipulahi Dibata. Isuruh Tuhan MalekatNa mulahi aku i bas kuasa Herodes nari bage pe i bas sura-sura kalak Jahudi nari."

12Kenca tuhu-tuhu kal ia sedar, lawes ia ku rumah Maria nande Johanes Markus. I bas rumah e nterem kalak pulung ertoto.

13Asum ituktuk Petrus pintu gerbang reh sekalak juak-juak diberu, gelarna si Rode, guna pepayo ise si nuktuk e.

14Itandai Rode maka sora e, sora Petrus. Perbahan riahna ukurna kiam ia mulihken ku rumah, lanai ingetna pe nalangi pintu gerbang e. Iberitakenna man kalak si pulung maka Petrus tedis i lebe-lebe pintu gerbang.

15Tapi ngaloi kalak e man bana nina, "Adon kam." Tapi igegehi Rode ngatakenca maka tuhu Petrus i darat. Nina kalak e, "Malekatna nge."

16Tapi perbahan la erngadi-ngadi Petrus nuktuki, emaka dungna italangi kalak ndai. Kenca idahna Petrus mamang kal atena.

17Ibahan Petrus tanda alu tanna gelah ula gejek. Jenari iturikenna man si pulung e kuga Tuhan nggo mulahi ia i bas penjara nari. Tole nina, "Beritakenlah si enda man Jakup ras man kerina senina-seninanta." Kenca bage ndarat ia dingen lawes ku ingan si deban.

18Pepagina kenca terang wari, gejek kerina perajurit-perajurit dingen mbiar ia. Nina sapih-sapih ia, "Kai nge si nggo jadi nandangi Petrus?"

19Emaka isuruh Herodes perajurit-perajurit ndarami Petrus, tapi la idatna. Emaka iperiksa Herodes perajurit-perajurit si erjaga jenari iperentahkenna munuh perajurit-perajurit e. Kenca si e lawes Herodes i Judea nari, pindah ia ku Kesarea.

Herodes mate

20Nembeh kal ate Herodes gelgel nari nandangi kalak Tirus ras kalak Sidon. Emaka ersada arihna ndahi Herodes, sabap biasana ia ndatken pangan i bas negeri Raja Herodes e nari. Perlebe itami-tamina Blastus; Blastus eme sekalak kepala pegawai istana raja. Jenari ngadap ia man Raja Herodes mindo perdamen.

21I bas sada wari si nggo itetapken Herodes, ipake Herodes paken kerajanna janah kundul ia i kursi kinirajanna. Jenari ngerana ia man kalak e.

22Kalak si nterem ersurak-surak nina, "Labo manusia si ngerana enda, tapi sekalak dibata kap."

23Minter iparap malekat Tuhan si Herodes, sabap iperajangna kemulian si arusna ibereken man Dibata. Berngan ia, jenari mate.

24Tapi Kata Dibata reh mbarna dingen reh teremna kalak si megisa.

25Barnabas ras Saul mulih i Jerusalem nari kenca idungina dahinna i je. Ikut pe ras ia Johanes Markus.



 <<  Kisah Para Rasul 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel