Alkitab Mobile SABDA
[VER] : [KARO]     [PL]  [PB] 
 <<  Kisah Para Rasul 3 >> 

Sekalak si pangpangen ipepalem

1I bas sada wari tupung jam ertoto, eme jam telu karaben, berkat Petrus ras Johanes ku Rumah Pertoton.

2I bas gerbang Rumah Pertoton si igelari Gerbang si Mejile, lit sekalak dilaki pangpangen mulai kin tubuhna nari. Tep-tep wari ia ilanja ku gerbang e guna mindo-mindo man kalak si bengket ku bas Rumah Pertoton e.

3Asum idahna bengket ate Petrus ras Johanes ku Rumah Pertoton e, ipindona perkuah ate kalak e duana.

4Itatap Petrus ras Johanes ia, jenari nina Petrus man bana, "Nehenlah kami."

5Emaka inehenna kalak e duana alu pengarapen ngaloken perkuah atena.

6Tapi nina Petrus man bana, "La lit duit i bas aku, tapi kai si lit i bas aku kubereken man bandu: I bas gelar Jesus Kristus, kalak Nasaret, kukataken man bandu, dalankenlah!"

7Kenca bage ijemak Petrus tan kemuhen si pangpangen e jenari isampatina tedis. Minter megegeh nahena ras mata-mata nahena.

8Lompat ia janah erdalan kujah-kujenda. Jenari bengket ia ku Rumah Pertoton ras kalak ndai; erdalan ia janahna lompat-lompat ipujina Dibata.

9Kerina kalak si nterem ngidah ia erdalan dingen muji Dibata.

10Jengang ia kerina kenca itandaina maka ia kap si biasa mindo-mindo i Gerbang si Mejile i Rumah Pertoton e. Mamang atena ngidah kai si nggo jadi man kalak si mindo-mindo e ndai.

Petrus ngerana man kalak si nterem i Rumah Pertoton

11Ngidah kalak si nggo ipepalem ndai ngikutken Petrus ras Johanes, mamang ate kalak si nterem. Emaka rehen kalak si nterem e ndahisa ku serambi si igelari "Serambi Salomo".

12Ngidah jelma si nterem e, ngerana Petrus nina, "O kalak Israel, ngkai maka mamang atendu dingen ipernehenndu kal kami? Iakapndu kin maka ibahan kami ia erdalan alu kuasa kami ntah pe erkiteken kami kalak si tutus nandangi Dibata?

13Dibata si isembah Abraham, Isak ras Jakup, Dibata si isembah nini-nininta nggo mpehagaken Jesus, PersuruhenNa, si nggo iendeskenndu man peminpin-peminpin kalak Jahudi janah itulakndu Ia i lebe-lebe Pilatus aminna gia ipulahi Pilatus atena Jesus.

14Ia kalak bujur dingen rembak ras Dibata. Tapi itulakndu Ia janah ipindokenndu man Pilatus gelah pemunuh ipulahi man bandu.

15Ibunuhndu Ia si mabai manusia ku kegeluhen si tuhu-tuhu. Tapi Ia nggo ipekeke Dibata i bas si mate nari janah kerna si enda tuhu-tuhu nggo idah kami.

16Kuasa Jesus nge si erbahanca erdalan kalak si itandaindu enda. Kai si nggo idahndu enda ibahan erdandanken kiniteken i bas GelarNa; kiniteken i bas Jesus me si erbahanca ia malem bagi kerina kam ngidahsa.

17O Senina-senina, kueteh maka labo ietehndu ertina kai si nggo ibahanndu ras peminpin-peminpinndu nandangi Jesus.

18Tapi alu bage maka nggo isehken Dibata kai si nggo IkatakenNa nai arah nabi-nabi. Eme kerna Raja si ipadanken Dibata e arus ngenanami kiniseran.

19Emaka erkadiola dingen jeralah kam gelah dosandu ialemi Dibata.

20Gelah ibereken Tuhan man bandu paksa kemalemen ate dingen IsuruhNa Jesus, eme Si Engkelini si ipadanken Dibata si nggo ItetapkenNa man gunandu.

21Ia ringan i Surga seh warina ibahan Dibata kerina jadi mbaru, bagi nggo ikataken Dibata nai arah Nabi NabiNa si badia.

22Bagi ikataken Musa, 'Iangkat Tuhan Dibatandu pagi sekalak nabi man gunandu, i tengah-tengahndu nari, bali ras aku nggo IangkatNa. Begikenlah kai si ikatakenna man bandu.

23Ise si la megiken kata nabi e ipeserap pagi i bas bangsa Dibata nari janah iukum.'

24Janah kerina nabi-nabi si isuruh Dibata ngerana, termasuk Samuel ras nabi-nabi si arah pudina, nggo ernubuat kerna kai si terjadi i bas paksa enda.

25Padan si nggo ibereken Dibata nai arah nabi-nabi man nini-nininta, man bandu kap. Bagi IkatakenNa man Abraham, 'Arah kesusurenndu pagi kerina bangsa i doni enda Kupasu-pasu.'

26Emaka man bandu lebe isuruh Dibata Persuruhen si IangkatNa, guna nehken pasu-PasuNa alu ngajari kam sekalak-sekalak gelah kam jera i bas si jahat nari."



 <<  Kisah Para Rasul 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel