Alkitab Mobile SABDA
[VER] : [KARO]     [PL]  [PB] 
 <<  Kolose 3 >> 

1Kam nggo ipekeke Dibata ras Kristus. Emaka darami lah erta-erta si i Surga, i bas ingan Kristus kundul arah kemuhen Dibata.

2Bulatkenlah ukurndu nandangi erta-erta Surga, labo nandangi perkara-perkara doni enda.

3Sabap kam nggo mate janah kegeluhenndu si tuhu-tuhu genduari la iidah doni enda sabap terbuni ras Kristus i bas Dibata.

4Kegeluhenndu si tuhu-tuhu e me kap Kristus, janah asum Ia teridah pagin, kam pe ikut teridah ras Ia, dingen dat bagin i bas KemulianNa.

Kegeluhen si male ras kegeluhen si mbaru

5Dage bunuhlah biak-biak doni si la mehuli, umpamana: erlua-lua, erlagu la mehuli, peraten daging, sura-sura si jahat, bage pe rangap (sabap rangap e me nembah man berhala).

6Sabap erdandanken si emaka reh rawa Dibata nandangi kalak si la ngikutken KataNa.

7Nai kam nggeluh rikutken lagu langkah si la mehuli, e me asum kam ercebah i bas kubang dosa.

8Tapi genduari ambekkenlah kerina si bage rupa: merawa, ngamuk, ras segat ate. Ula cekurak ntah pe melasken cakap melket.

9Ula perbual, sabap nggo itangtangindu manusia si male ras kerina kebiasanna,

10janah genduari nggo ipakendu manusia si mbaru. Kam genduari manusia si mbaru si tetap ipebarui Dibata si njadiken kam rikutken TempasNa jine. Tujunna e me gelah itandaindu alu serta Dibata.

11Emaka lanai bo erndobah kalak Jahudi ntah la kalak Jahudi, si ersunat ntah la ersunat; lanai erndobah suku-suku asing, kalak Sekyt si ianggap hina, budak ntah bebas; sabap Kristus kap kerina. Kristus ersada ras kerinana.

12Kam anak-anak Dibata. Kam ikelengi dingen ipilih Dibata jadi SikerajangenNa. Emaka pakekenlah paken ate perkuah, mehuli, rukur meteruk, lemah-lembut dingen saber.

13Ula kam pergelut dingen si alem-alemen salah adi kitik ukurndu ibahan kalak. Kam arus sialem-alemen salah bagi Tuhan nggo ngalemi salahndu.

14Janah i babo si e kerina, arus kam sikeleng-kelengen sabap keleng ate mpersadaken kerinana alu serta.

15Dame si ibereken Kristus i bas pusuhndu min si ngajari kam i bas erbahan keputusen-keputusenndu. Sabap guna dame kam ipilih Dibata jadi sada kula. Emaka ngataken bujurlah.

16Kata Kristus si dem alu kinibayaken nggeluh min i bas pusuh peratenndu. Siajar-ajarenlah kam alu kepentaren. Endekenlah masmur, ende-enden pujin ras ende-enden pertendin. Rendelah muji Dibata dingen ngataken bujur i bas ukurndu.

17Dage ntah kai gia ibahanndu, subuk i bas ngerana ntah i bas perbahanen, bahanlah e i bas gelar Tuhan Jesus janah ngataken bujur man Dibata Bapa arah Ia.

Erbage-bage pedah man keluarga Kristen

18O, kam ndehara, patuhlah man perbulangenndu, sabap bage me arusna ibahanndu selaku kalak Kristen.

19O, kam perbulangen, kelengilah ndeharandu janah ula kasar man bana.

20O, kam anak-anak, kalak Kristen, patut kam tetap patuh man orang-tuandu sabap bage nge si ngena ate Dibata.

21O, kam orang-tua ula rusursa junguti anakndu gelah ula bene ukurna.

22O, kam budak-budak patuhlah man tuanndu i bas kai pe. Labo saja tupung ia i je tempa-tempa kam ndarami pujin i bas manusia nari saja; tapi bahanlah e alu ukurndu bulat, erkiteken kemalangenndu man Tuhan.

23Kai pe si ibahanndu, dahikenlah e alu tutus, tempa-tempa kam erdahin guna Tuhan, labo guna manusia.

24Ingetlah, i bas Tuhan nari kap upahndu. Ialokenndu me kai si nggo isikapken Tuhan man anak-AnakNa. Sabap Kristus nge Tuanndu si tuhu-tuhu, janah kam BudakNa.

25Janah kalak si erbahan salah, ise pe jelmana iukum rikutken salahna, sabap kerina manusia la erndobah i lebe-lebe Dibata.



 <<  Kolose 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel