Alkitab Mobile SABDA
[VER] : [KARO]     [PL]  [PB] 
 <<  Lukas 11 >> 

Pengajaren Jesus kerna ertoto (Mat 6:9-13, 7:7-11)

1Sekali jadi ertoto Jesus i bas sada ingan. Kenca dung Ia ertoto nina sekalak ajar-AjarNa, "O Tuhan, ajari min kami ertoto bagi Johanes ngajari ajar-ajarna."

2Ngaloi Jesus man ajar-AjarNa nina, "Adi ertoto kam nindulah, 'O Bapa, Terpujilah gelarndu si Badia; Rehlah min KinirajanNdu,

3Bereken min man kami nakan cukup tep-tep wari.

4Alemi min dosa-dosa kami, balira kami pe ngalemi kalak si ersalah kempak kami. Ola min kami ibaba Kam ku bas percuban.'"

5Tole nina Jesus man ajar-AjarNa, "Adi sekalak i bas kam lawes ku rumah temanndu i tengah berngi janah nindu, 'O teman, kupinjam min rotindu telu ngkibul,

6sabap temanku si i bas perdalanen singgah ku rumahku janah la lit si man berenken man bana.'

7Banci jadi temanndu e erjabap i rumah nari, 'Ola ganggundu aku! Pintun nggo ieruk, janah aku ras anak-anakku nggo medem. La terbahan aku keke guna merekenca man bandu.'

8Bage gia, Kukataken pe man bandu, aminna gia ia la keke mereken roti man bandu erdandanken ia temanndu, tapi perbahan la kam mela mindo alu meseksek, keke nge ia, iberekenna man bandu kai si iperlukenndu.

9Perbahan si e Kukataken man bandu: Pindolah tentu ngalo kam; daramilah, tentu idatndu; tuktuklah, tentu italangi pintun man bandu.

10Sabap ise si mindo ngalo kap, janah ise si ndarami idatna kap, bage pe ise si nuktuk pintun italangi kap.

11Tentu la lit i bas kam selaku bapa mereken nipe man anakndu adi ipindona nurung.

12Ntah iberekenndu kacip gelang man bana adi ipindona tinaruh.

13Dagina, adi kam pe kalak si jahat ietehndu mereken si mehuli man anak-anakndu, apai denga ka Bapa si i Surga. Tentu IberekenNa nge man bandu Kesah .Ssi Badia man si mindo man BaNa."

Kuasa Jesus iakap kalak kuasa Balsebul (Mat 12:22-30; Mrk 3:20-27)

14Sekali jadi ipelawes Jesus setan i bas sekalak pekak nari. Kenca ndarat setan e, ngasup ia ngerana. Ngidah si e mamang ate kalak si nterem.

15Tapi piga-piga kalak ngataken, "Balsebul, pengulu setan nge si mereken kuasa man BaNa mpelawesken setan-setan."

16Lit ka deba nidingi Jesus atena, emaka ipindona gelah ibahan Jesus sada tanda sengget si nusur i Surga nari.

17Tapi ieteh Jesus perukuren-perukuren kalak e, emaka nina, "Kerajan si lit i je perpecahen, la banci lang runtuh me kerajan e, jenari runtuhen pe rumah-rumahna.

18Dage, adi kerajan setan erbelah-belah ia sapih-sapih ia, tentu kerajan e la ndekah. Ikatakenndu maka Balsebul nge si mereken kuasa man bangKu guna pelawesken setan-setan.

19Adi bage kin carangKu pelawesken setan-setan, kuga dage teman-temanndu pelawessa? Temanndu e jinelah ertimbang kerna kam.

20Labo Balsebul si mereken kuasa man bangKu, tapi Aku pelawesken setan-setan alu kuasa Dibata si nuduhken maka i tengah-tengahndu nggo ndeher Kinirajan Dibata.

21Adi sekalak si megegeh njagai rumahna alu senjata lengkap, tentu aman kerina erta-ertana.

22Tapi adi reh kalak si gegehen ngelawan ia, italukenna ia janah irampasna me kerina senjata si lengkap si iarapken tuan rumah ndai, jenari ibagi-bagikenna man teman-temanna kai si nggo irampasna e.

23Ise si la mihak Aku si tuhuna ngelawan Aku kap; ise si la ras Aku pepulungken, si tuhuna ia engkerapi kap."

Setan si reh mulihken (Mat 12:43-45)

24"Adi nggo ndarat setan i bas manusia nari, lawes ia, niari kerina taneh gurun pasir ndarami ingan ngadi. Adi la lit idatna ingan ngadi emaka nina i bas ukurna, 'Mulihlah aku ku rumahku si nggo kutadingken.'

25Emaka mulihken ia, idapetina rumah e nggo bersih isapui dingen sikap.

26Jenari lawes ia, idilona pitu setan si jahaten asa ia. Emaka ringan ia kerina i bas rumah ndai seh maka si ibengketi setan e nggo keleken asang si tangtangna ndube."

Kemalemen ate si tuhu-tuhu

27Kenca nggo ikataken Jesus si enda ndai, sekalak diberu i bas jelma si nterem e nari ngerana alu megang nina, "Malem tuhu-tuhu ate diberu si mupus dingen pebelin Kam!"

28Tapi ngaloi Jesus, "Malemen tuhu-tuhu ate kalak si megiken Kata Dibata dingen ndalankenca!"

Pemindon tanda sengget (Mat 12:38-42)

29Asum jelma si nterem ngkeleweti Jesus, IteruskenNa ngerana nina, "Andiko jahatna jelma si genduari! Ipindona tanda sengget, tapi sada pe la ibereken man bana seakatan tanda sengget Nabi Juna.

30Sabap bagi Nabi Juna jadi tanda man kalak Niniwe, bage me pe Anak Manusia si isuruh Dibata jadi sada tanda man bangsa si genduari.

31I bas wari pendungi pagi i lebe-lebe Pengadilen Dibata keke Ratu negeri Selatan nuduhken kelepaken kalak jaman enda. Sabap lako megikenken pengajaren kepentaren Salomo, Ratu ndai nggo reh erdalan i bas tampuk doni nari. Tapi i jenda genduri lit kalak si belinen asangken Salomo!

32I bas wari pendungi pagi i lebe-lebe Pengadilen Dibata keke kalak Niniwe ras bangsa si genduari enda. Iaduken kalak Niniwe me pagi bangsa si genduari, sabap kalak Niniwe jera i bas dosana nari asum ibegina pengajaren Nabi Juna; janah Kukataken man bandu maka si tuhuna lit i jenda si belinen asa Nabi Juna!"

Mata si nerangi badan (Mat 5:15, 6:22-23)

33"Labo lit kalak nagani lampu, jenari itamakenna i teruh ingan si terligen ntahpe nutupisa alu tumba; tapi itamakenna nge ku nahe lampu, gelah sinalsalna nerangi kalak si bengket ku bas.

34Matandu kap lampu i bas badanndu. Adi matandu sehat, kerina badanndu terang; tapi adi matandu la sehat, kerina badanndu gelap.

35Emaka jagalah gelah terang si lit i bas kam ola jadi gelap.

36Adi kerina badanndu terang, lanai lit bagin si gelap, emaka sempurna nge terangna, bali ras isalsali terang lampu kam."

Ipandang Jesus kalak Parisi ras guru-guru agama Jahudi (Mat 23:1-36; Mrk 12:38-40)

37Kenca dung Jesus ngerana, iundang kalak Parisi Ia man ku rumahna. Emaka bengket Jesus ku rumah e, jenari kundul dingen man.

38Mamang ate kalak Parisi e asum iperdiatekenna Jesus la erburih ope denga man.

39Tapi nina Tuhan man bana, "O kalak Parisi, tuhu iburihindu cangkir ras pinggan e arah darat, tapi arah bas dem alu rampasen ras kejahaten.

40O kalak lenge! Ma kin Dibata nge si njadiken si arah darat e bage pe si njadiken si arah bas e?

41Si lit i bas mangkuk ras piringndu e nge arus iberekenndu man kalak musil. Alu bage kerina nggo bersih man bandu.

42Tapi andiko, cilaka kal kam o kalak Parisi: Ipersembahkenndu sepersepuluh i bas ulihndu nuan-nuan nari: jera, sere, ras gulen-gulen; tapi la ibahanndu bujur man manusia dingen la atendu keleng Dibata. Tapi e nge si tuhuna si arus ilakokenndu alu la ngelupaken si debanna.

43Andiko, cilaka kal kam o kalak Parisi! Atendu ngkunduli kursi-kursi si arah lebe i bas rumah persembahen dingen atendu iperkuanken kalak kam i tengah dalan alu mehamat.

44Andiko, cilaka kal kam! Sabap kam bagi kuburen si la ertanda; kalak si erdalan arah datasna la meteh maka e kuburen."

45Ngaloi sekalak guru agama Jahudi nina, "O Guru, alu KataNdu si bage, kami pe nggo IkenaiNdu."

46Ngaloi Jesus, "Kam pe cilaka nge o guru-guru agama! Iberekenndu baban si mberat man kalak seh maka la ngasup ia mbabasa, tapi kam jine alu sada jari pe la kam nggit ngkuitsa baban e.

47Andiko, cilaka kal kam! Ipekena kam kuburen nabi-nabi si nggo ibunuh nini-ninindu.

48Alu bage nggo tangkas maka setuju kam ras si ibahan nini-ninindu nai; sabap nini-ninindu munuh nabi-nabi e janah kam erbahan kuburenna.

49Arah KepentarenNa maka nina Dibata, 'Kusuruh pagi reh nabi-nabi ras rasul-rasul ndahi ia; piga-piga pagi ibunuhna janah si deban isiksana.'

50Emaka bangsa si genduari enda ituntut pagi perbahan dareh nabi-nabi si nggo ibunuh mula-mula tembe doni nari,

51e me pembunuhen i bas Abil nari seh ku pembunuhen Sakaria si ibunuh i kelang-kelang batar-batar persembahen ras Rumah Tuhan. Kukataken man bandu maka kalak jaman enda la banci la iukum pagi erkiteken perbahanenna e.

52Andiko guru Undang-undang, cilaka kal kam! Nggo ibuatndu kunci pemeteh; tapi kam jine la bengket ku bas janah kam jine erbahanca maka kalak la banci bengket ku bas!"

53Kenca lawes Jesus i bas ingan e nari, lalap ia igempang-gempangi guru-guru Undang-undang ras kalak Parisi. Isungkunna erbage-bage soal guna ncubai Jesus.

54I bas si e iusahakenna gelah salah jabap Jesus, maka banci Ia iaduken rikutken KesalahenNa e.



 <<  Lukas 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran