Perumpaman diberu si nggo mbalu ras hakim
1Kenca bage, guna ngajari ajar-ajar gelah ia ertoto rusur maka ola peltep pengarapenna,
2ituriken Jesus perumpaman enda nina, "I bas sada kuta lit sekalak hakim si la erkemalangen man Dibata dingen la erkeleng ate man manusia.
3Lit ka pe i bas kuta e sekalak diberu nggo mbalu. Ia rusur reh ndahi hakim e, janah nina, 'Sampati min aku i bas perkarangku nandangi imbangku.'
4Ndekah la nggit hakim e, tapi dungna nina i bas ukurna, 'Aminna gia aku la erkemalangen man Dibata dingen la erkeleng ate man manusia,
5tapi perbahan rusur aku igangguna, kupejore gia perkarana e; gelah olanai ia reh rusur dingen dungna iraukina ayongku.'"
6Iterusken Tuhan nina, "Begindu kai si nggo ikataken hakim si la bujur e?
7Ma kin ibegiken Dibata nge kalak PilihenNa si erlebuh suari ras berngi mindo penampat man BaNa? Melawen kin Ia nampati kalak PilihenNa?
8Kukataken pe man bandu, pedas nge IberekenNa keadilen man kalak si mindo man BaNa. Tapi asum reh pagi Anak Manusia si isuruh Dibata lit nge pagi IdapetiNa kalak si erkiniteken i doni enda?"
Perumpaman kerna kalak Parisi ras pengalo cuke
9Man kalak si pebujur-bujur bana dingen si erpengakap maka kalak si deban la lit ergana, ituriken Jesus perumpaman enda,
10"Lit me dua kalak si lawes ku Rumah Pertoton guna ertoto. Sekalak e me kalak Parisi janah sekalak nari pengalo cuke.
11Kalak Parisi e tedis janah ertoto ia i bas ukurna nina, 'O Dibata, bujur kukataken man BaNdu, sabap aku la merangap, la nipu, la erlua-lua bagi kalak si deban. Bujur kukataken man BaNdu sabap aku labo bagi pengalo cuke ah.
12Aku erpuasa dua kali seminggu, janah kupersembahken man BaNdu sepersepuluh i bas kerina ulihku erdahin nari.'
13Tapi pengalo cuke tedis ndauh i bas ia nari, janah la ia pang nare ku langit, itemtemina bana janah nina, 'O Dibata, mekuah min atendu aku kalak perdosa!'"
14Nina Jesus, "Kukataken man bandu: Mulih kalak enda ku rumah janah pengalo cuke enda me si ibenarken Dibata, labo kalak Parisi e. Sabap kalak si peganjangken bana ipeteruk Dibata, janah kalak si peteruk bana ipeganjangken Dibata kap."
Ipasu-pasu Jesus anak-anak si kitik (Mat 19:13-15; Mrk 10:13-16)
15Reh me piga-piga kalak orang tua maba anak-anakna si kitik denga man Jesus. Atena gelah ipasu-pasu Jesus anak-anak e. Asum idah ajar-AjarNa, emaka ilarangna.
16Tapi idilo Jesus anak-anak e janah nina, "Pelepas anak-anak e reh ndahi Aku, ola ambati ia. Sabap kalak si bagi enda kap empuna Kinirajan Dibata.
17Ingetlah! Kalak si la ngaloken Kinirajan Dibata bali ras sekalak anak-anak, la ia banci bengket ku bas Kinirajan Dibata."
Kalak bayak (Mat 19:16-30; Mrk 10:17-31)
18Lit me sekalak peminpin kalak Jahudi nungkun man Jesus nina, "O Guru si bujur, kai nge ndia arus kubahan gelah kudat kegeluhen si rasa lalap?"
19Erjabap Jesus, "Ngkai maka ikatakenndu Aku si bujur? Ma ise pe labo bujur seakatan Dibata ngenca?
20Tentu nggo ietehndu pedah Dibata, 'Ola munuh; ola erlua-lua; ola nangko; ola ngataken si la tuhu; ola nipu; mehamat man nande ras bapandu.'"
21Emaka ngaloi ia, "O Guru, kerina pedah e nggo kuikutken kitik-kitikku nari."
22Kenca ibegi Jesus jabapna e nina, "Sada nari kekurangenndu, dayaken erta-ertandu janah duitna bereken man kalak musil, gelah idatndu erta-erta i Surga; jenari reh kam, ikutken Aku."
23Kenca ibegina kata Jesus e gulut ukurna, sabap bayak kal ia.
24Asum idah Jesus bage kal cedana atena, emaka nina, "Tuhu-tuhu mesera kal kalak bayak bengket ku bas Kinirajan Dibata.
25Sukahen sada unta mentas arah lubang jarum asangken sekalak kalak bayak bengket ku bas Kinirajan Dibata."
26Kalak si megi Ia nungkun nina, "Adi bage ise nari nge pagi terkelin?"
27Erjabap Jesus, "Kai si la banci jadi i bas manusia, e me banci jadi i bas Dibata."
28Jenari nina Petrus, "Kami nggo nadingken sikerajangen kami guna ngikutken Kam."
29Ngaloi Jesus, "Tuhu, janah Kukataken pe man bandu maka ise pe si nadingken rumahna ntah ndeharana ntah seninana ntah orang tuana ntah anak-anakna erkite-kiteken Dibata dingen erkite-kiteken dahin Dibata,
30ialokenna nge erganda-ganda i bas jaman enda pe, dingen pagin ialokenna kegeluhen si tuhu-tuhu si rasa lalap."
Petelu kaliken ituriken Jesus kerna KematenNa (Mat 20:17-19; Mrk 10:32-34)
31Idilo Jesus ajar-AjarNa si sepulu dua kalak, jenari nina, "Begikenlah! Genduari kita i bas perdalanen ku Jerusalem. I je me pagi jadi kerina si nggo isuratken nabi-nabi kerna Anak Manusia si isuruh Dibata.
32Sabap Ia pagi iendesken man kalak si la nandai Dibata. Isaling-saling kalak e pagi Ia, igombang-gombangina janah icidurina.
33Iligasina jenari ibunuhna Ia, tapi i bas wari peteluken nggeluh Ia mulihi."
34Bage gia labo iangka ajar-ajar kai si ikataken Jesus. La tangkas man bana erti kata e, emaka labo iangkana maksud Jesus.
Ipepalem Jesus sekalak pemindo-mindo si pentang (Mat 20:29-34; Mrk 10:46-52)
35Asum Jesus nandangi seh i Jeriho, lit me sekalak pentang kundul i tepi dalan mindo-mindo.
36Asum ibegina mentas jelma si nterem, nungkun ia nina, "Kai e?"
37Erjabap kalak man bana, "Mentas Jesus kalak Nasaret."
38Jenari erlebuh ia alu sora megang, "O Jesus! Anak Daud! Mekuah min AteNdu aku."
39Ilarang kalak si arah lebe ia, gelah ola ia gejek. Tapi reh gangna ia erlebuh nina, "O Anak Daud! Mekuah min AteNdu aku."
40Emaka ngadi Jesus erdalan, jenari IsuruhNa kalak negu si pentang e ku Ia. Kenca seh ia i lebe-lebe Jesus, isungkun Jesus ia nina,
41"Kai kin atendu Kubahan man bandu?" Erjabap ia, "O Tuan, ateku min gelah aku erpengidah mulihi."
42Emaka nina Jesus man bana, "Erpengidahlah kam! Kinitekenndu erbahanca kam nggo malem."
43Minter ia erpengidah, jenari ikutkenna Jesus, janah ikatakenna bujur man Dibata. Asum kalak si nterem ngidah si e, kerina ia muji Dibata.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel