Alkitab Mobile SABDA
[VER] : [KARO]     [PL]  [PB] 
 <<  Lukas 20 >> 

Penungkunen kerna kuasa Jesus (Mat 21:23-27; Mrk 11:27-33)

1I bas sada wari, Jesus ngajar i bas Rumah Pertoton dingen meritaken Berita Si Mehuli i bas Dibata nari man kalak si nterem. Paksa si e, reh imam-imam si mbelin, guru-guru agama Jahudi ras peminpin-peminpin Jahudi,

2jenari nina man Jesus, "Kataken man kami, kuasa kai kin si lit i bas Kam erbahan si enda kerina? Ise mereken kuasa e man Bandu?"

3Erjabap Jesus man kalak e nina, "Kusungkun kam lebe.

4Kuasa Johanes Peridiken mperidiken e reh i bas Dibata nari, ntah i bas manusia nari?"

5Emaka sisungkun-sungkunen ia kerina nina, "Kuga ninta? Adi ninta, 'I bas Dibata nari,' ugapa pe nina, 'Adi bage ngkai maka la kam tek man Johanes Peridiken.'

6Tapi adi ninta, 'I bas manusia nari,' merawa kari kalak si nterem enda janah ibenterina kita alu batu, sabap kalak si nterem tek maka Johanes Peridiken sekalak nabi."

7Emaka erjabap ia man Jesus nina, "La ieteh kami i ja nari rehna."

8Nina Jesus man bana, "Adi bage, Aku pe la Kukataken man bandu alu kuasa kai Kubahan enda kerina."

Perumpaman kerna si newa kebun anggur (Mat 21:33-46; Mrk 12:1-12)

9Jenari ituriken Jesus perumpaman enda man kalak si nterem nina, "Lit me sekalak si nuan anggur i bas kebunna. Jenari lawes ia ku negeri si ndauh. Perbahan ndekah atena i bas negeri si ndauh e, emaka isewakenna kebun anggur e.

10Kenca seh paksa peranin buah anggur, isuruhna sekalak juak-juakna ndahi si newa kebun anggur e, guna mindo sikerajangenna. Tapi ipekpeki si newa kebun anggur juak-juak ndai jenari isuruhna mulih alu la maba kai pe.

11Emaka isuruh tuan si mada kebun anggur juak-juak si deban. Tapi ia pe ipekpeki si newa e, igombang-gombangi janah isuruhna mulih alu la maba kai pe.

12Jenari isuruh tuan si mada kebun anggur juak-juak si peteluken. Ia pe ipekpeki si newa e seh luka janah iambekkenna ku darat kebun e.

13Emaka rukur tuan si mada kebun anggur nina, 'Kai nge ndia arus kubahan? Kusuruh me anakku si kukelengi enda; tentu mehangke kari ia.'

14Tapi kenca idah si newa kebun anggur anak tuan e nina sapih-sapih ia, 'Enda kap anak tuan si mada kebun anggur enda. Sibunuhlah ia gelah man banta kebunna enda!'

15Emaka iambekkenna anak tuan e ku darat kebun, jenari ibunuhna." Jenari nungkun Jesus nina, "Kenca bage kuga nge ibahan tuan si mada kebun anggur nandangi si newa e?

16Tentu reh ia, ibunuhna kerina si newa kebun anggur e, jenari isewakenna kebun e man kalak si deban." Megi kata e nina kalak si nterem, "Mbera-mbera ola bage!"

17Itatap Jesus ia kerina janah nina, "Adi bage, kai nge erti kata si tersurat i bas Pustaka Si Badia enda? 'Batu si iambekken tukang, nggo jadi batu palas.'

18Ise si ndabuh ku batu e getem me ia, janah ise si idabuhi batu e meripuk me ia."

Penungkunen kerna nggalar pajak (Mat 22:15-22; Mrk 12:13-17)

19Paksa si e pe guru-guru agama Jahudi ras imam-imam si mbelin ersura-sura nangkap Jesus. Sabap ietehna maka ia nge tujun perumpaman si ituriken Jesus ndai. Tapi mbiar ia kalak si nterem.

20Emaka idaramina kesempaten si deban. Isogokna piga-piga kalak gelah ipekulah-kulahna bana bujur. Kalak enda isuruhna ncubai Jesus alu penungkunen-penungkunen, gelah alu bage banci iendeskenna Jesus man gubernur gelah itutup.

21Nina kalak enda ndai man Jesus, "O Guru, ieteh kami maka kai si ikatakenndu ras si IajarkenNdu e tuhu. La erpilihen TemanNdu ngerana. La IpernehenNdu pangkat manusia, tapi IajarkenNdu kerna kai si tuhu-tuhu ngena ate Dibata ibahan manusia.

22Kataken dage man kami, rikutken aturen agamanta banci ntah lang galar pajak man Kepala Pemerentah Roma?"

23Tapi ieteh Jesus kai tujun ranan kalak si pekulah-kulah enda, emaka nina,

24"Cidahken lebe man bangKu sada duit pirak. Gambar ras gelar ise kin lit i bas duit e?" Erjabap kalak ndai, "Gambar ras gelar Kepala Pemerentah Roma."

25Emaka nina Jesus, "Adi bage, berekenlah man Kepala Pemerentah Roma kai sikerajangen Kepala Pemerentah Roma janah bereken man Dibata kai sikerajangen Dibata."

26La ngasup kalak ndai nidingi cakap Jesus i lebe-lebe jelma si nterem. Mamang pe atena megi jabap Jesus, emaka sinik nari nge ia.

Penungkunen kerna kekeken i bas si mate nari (Mat 22:23-33; Mrk 12:18-27)

27Reh me piga-piga kalak Saduki ndahi Jesus. Kalak enda la tek maka kalak mate nggeluh mulihken. Isungkunna Jesus nina,

28"O Guru, man banta nggo isuratken Musa Undang-undang enda, 'Adi sekalak dilaki mate nadingken ndeharana, janah la lit pupusna, emaka diberu si nggo mbalu ndai arus ilakomangani senina si mate e gelah ipupusna anak jadi gancih senina si nggo mate ndai.'

29Lit me pitu kalak dilaki si ersenina. Sintua nggo empo, janah mate ia, la lit pupusna.

30Emaka ilakomangani seninana si nomor dua diberu e,

31jenari seninana si nomor telu ngelako manganisa. Bage me jadi man pituna si ersenina ndai -- kerina ia mate, sada pe la nadingken anak.

32Dungna diberu ndai pe mate ka.

33Adi bage, kenca nggeluh kerina si mate ndai i bas wari kekeken, si apai nge perbulangen diberu ndai? Sabap pituna ia nggo pernah erjabu ras diberu e."

34Ijabap Jesus kalak ndai nina, "Kalak si nggeluh i bas paksa enda sereh dingen empo.

35Tapi kalak si metunggung ngaloken kegeluhen si mbaru kenca ipekeke i bas si mate nari lanai bo ia sereh dingen empo.

36Ia nggo bali ras malekat-malekat janah lanai banci mate. Ia nggo ipegeluh i bas si mate nari, janah enda me tandana maka ia anak-anak Dibata.

37Kerna si mate nggeluh mulihi nggo tangkas ituriken Musa i bas bagin turi-turin kerna rambah si gara. I je ikataken maka Tuhan e, e me Dibata si tetap isembah Abraham. Dibata si tetap isembah Isak ras Dibata si tetap isembah Jakup.

38Enda ertina maka Ia Dibata kalak si nggeluh labo Dibata si mate, sabap i bas adep-AdepenNa kerina jelma nggeluh."

39Megi si enda nina piga-piga guru-guru agama Jahudi, "Payo kal JabapNdu e Guru!"

40Emaka lanai ia pang naungkun kai pe man Jesus.

Penungkunen kerna Raja Penampat si ipadanken Dibata (Mat 22:41-46; Mrk 12:35-37)

41Nina Jesus man kalak e, "Kuga banci ikataken kalak maka Raja Penampat si ipadanken Dibata e, e me kesusuren Daud?

42Sabap Daud jine ngatakenca i bas kitap Masmur, 'Nina TUHAN man TuhanKu Kundulken arah kemuhenKu

43seh Kutamaken imbang-ImbangNdu i teruh tapak-tapak NaheNdu.'

44Daud jine ngatakenca maka Ia Tuhan. Kuga banci maka Raja Penampat si ipadanken e kesusuren Daud ka?"

Ipersingeti Jesus gelah metenget nandangi guru-guru agama (Mat 23:1-36; Mrk 12:38-40)

45Asum kalak si nterem pe megiken Ia nina man ajar-AjarNa,

46"Metengetlah nandangi guru-guru agama Jahudi, si megati erdalan-dalan erbaju gedang, si atena ihamati i gedang-gedang dalan ras itiga. Ia nggit kal kundul arah lebe i bas rumah persembahen. Idaramina ingan si mehamat i bas kerja-kerja.

47Ibuatna keuntungenna i bas kalak si nggo mbalu nari ras ngerampasi rumah diberu balu-balu. Ibahanna pertoton si gedang alu pekulah-kulah. Kalak si bage pasti iukum alu ukumen si seh kal beratna."



 <<  Lukas 20 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel