Alkitab Mobile SABDA
[VER] : [KARO]     [PL]  [PB] 
 <<  Lukas 22 >> 

Rencana nangkap Jesus (Mat 26:1-5; Mrk 14:1-2; Yoh 11:45-53)

1Wari Raya Roti la erragi si igelari Paskah nggo ndeher.

2Imam-imam si mbelin ras guru-guru agama Jahudi ndarami dalan guna munuh Jesus, sabap mbiar ia kalak si nterem.

Judas erpadan ndudurken Jesus (Mat 26:14-16; Mrk 14:10-11)

3Judas, si igelari Iskariot sekalak i bas ajar-ajar si sepulu dua kalak, ikuasai Iblis ukurna.

4Emaka lawes ia, jenari arih-arih ia ras imam-imam si mbelin bage pe pengulu Rumah Pertoton kerna kengasupenna ndudurken Jesus man kalak e.

5Meriah kal ukur kalak e janah erpadan ia mereken duit man Judas Iskariot.

6Judas setuju kerna si e. Jenari idaramina me kesempaten si cocok guna ndudurken Jesus alu la ieteh kalak si nterem.

Persikapen guna man-man Paskah (Mat 26:17-25; Mrk 14:12-21; Yoh 13:21-30)

7Seh me Wari Raya Roti si la erragi. I bas wari e kerina kalak nggeleh biri-biri guna man-man Paskah.

8Isuruh Jesus Petrus ras Johanes nina, "To pesikap pangan Paskah man banta gelah ras-ras kita man."

9Nungkun kalak e nina, "I ja atendu isikapken kami?"

10Erjabap Jesus, "Begiken! Seh kenca kam kari i bas kuta ah, jumpa kam ras sekalak dilaki si mbaba lau tare guci. Ikutken ia ku rumah.

11Sungkun kari si mada rumah e, Guru nungkun bandu, 'Kamar si apai banci Kupake ras ajar-ajarKu guna man-man Paskah?'

12Emaka ituduhkenna kari man bandu sada kamar si mbas i datas loteng, si nggo sikap. I je me sikapken kerina si perlu guna ngerayaken Paskah."

13Emaka lawes me Petrus ras Johanes. Idapetina kerina bagi si nggo ikataken Jesus man bana, jenari isikapkenna pangan guna Paskah e.

Lakon Persadan si Badia (Mat 26:26-30; Mrk 14:22-26; 1Kor 11:23-25)

14Kenca seh jam man, kundul Jesus ras rasul-rasul e.

15Nina Jesus man kalak e, "Mesikel kal aku ngerayaken Paskah ras kam ope denga Aku ngenanami kiniseran.

16Sabap lanai bo pagi kupan e seh Wari Paskah si tuhu-tuhu i bas Kinirajan Dibata."

17Jenari ibuat Jesus calung, ItotokenNa ngataken bujur man Dibata, emaka nina man ajar-AjarNa, "Buat enda, jenari bagi-bagiken i bas kam kerina.

18Sabap lanai bo pagi kuinem anggur enda, genduari nari seh ngayak kerehen Kinirajan Dibata."

19Kenca bage IbuatNa roti, ertoto Ia ngataken bujur man Dibata. Icepik-CepikNa roti e jenari IberekenNa man rasul-rasul nina, "Enda me dagingKu (si ibereken man gunandu. Bahanlah bagenda guna peringet-ingeten man bangKu."

20Bage me pe, kenca elah man e ibereken Jesus calung nina, "Arah calung enda Dibata erbahan Padan si Mbaru si iesahken alu darehKu si mambur man gunandu.)

21Tapi, nehenlah! Sekalak si ndudurken Aku i bas meja enda ras Aku.

22Sabap Anak Manusia si isuruh Dibata la banci lang mate bagi si nggo itetapken Dibata. Tapi andiko, cilaka me kalak si ndudurkenca e!"

23Jenari mulai me ajar-ajar e sisungkun-sungkunen ntah ise kin i bas ia si atena erbahan bage.

Perubaten kerna ise si mbelinna

24Turah me perubaten i bas ajar-ajar kerna ise kin si mbelinna i bas ia.

25Nina Jesus kalak e, "Raja bangsa-bangsa si la nandai Dibata erbahan mesui ate bangsana janah si erkuasa ibahan gelarna 'Teman Kalak si nterem.'

26Tapi kam ola bage; kalak si mbelinna i bas kam arus jadi si kitikna, janah si atena jadi peminpin arus bali ras suruh-suruhen.

27Apai kin ergan kalak si kundul man asangken kalak si ngelai ia? Tentu kalak si kundul. Tapi Aku i tengah-tengahndu bagi kalak si ngelai kap.

28Kam nggo ras Aku nggengken kerina kiniseranKu.

29Bali ras Bapa nggo mereken man bangKu Kinirajan e, Kubereken ka pe man bandu Kinirajan e.

30Banci kam ikut man ras minem ras Aku i bas KinirajanKu. Janah man bandu ibereken pagi ingan kundul jadi pemerentah guna ngadili suku Israel si sepulu dua."

Ikataken Jesus maka ipersoken Petrus pagi Ia (Mat 26:31-35; Mrk 14:27-31; Yoh 13:36-38)

31"O, Simon, Simon! Begikenlah! Iblis nggo iijinken ncubai kam kerina bagi kalak si miari gandum.

32Tapi nggo Kutotoken kam Simon, gelah kinitekenndu ola nimpet. Janah adi nggo kam jera, pegegehilah senina-seninandu gelah tetap kinitekenna."

33Ngaloi Petrus, "O Tuhan, aku nggo pang ku bas penjara ntah pe mate ras Kam."

34Ngaloi Jesus, "O Petrus, Kukataken man bandu: Ope tekuak manuk nggo ipersokendu Aku telu kali."

Dompet, ras pedang

35Tole nina Jesus man ajar-AjarNa, "Asum Kusuruh kam mbaru enda lawes alu la maba dompet, gajut-gajut ntah sepatu, lit kin si kurangenndu tupung e?"

36Erjabap kalak e, "La lit kai pe si kurang." Nina Jesus, "Tapi genduari ise lit dompetna ntah gajut-gajutna, babalah. Bage pe ise si langa lit pedangna, idayakennalah uisna guna nukur pedang.

37Kukataken man bandu maka i bas Pustaka Si Badia lit tersurat 'Ia iperseri ras kalak jahat' la baci la jadi man Bangku. Sabap si tersurat i bas Pustaka Si Badia kerna Aku sangana terjadi."

38Nina ajar-ajar, "O Tuhan! Enda dua pedang." Ngaloi Jesus, "Nggo me bias."

Jesus ertoto i Uruk Seton (Mat 26:36-46; Mrk 14:32-42)

39Kenca bage itadingken Jesus kuta e. Bagi biasana lawes Ia ku Uruk Seton ras ajar-AjarNa.

40Kenca seh i bas ingan e nina man ajar-AjarNa, "Ertotolah gelah ola kam kena percuban."

41Jenari iserapken Jesus BaNa i bas ajar-ajar e nari, dauhna asa gegeh mbenterken batu. I je erjimpuh Ia dingen ertoto,

42nina, "O Bapa, adi banci pedauh min calung kiniseran enda i bas Aku nari. Tapi labo peratenKu, PeratenNdulah jadi."

43(Teridah me man BaNa sekalak malekat i Surga nari si pegegehi Ia.

44Perbahan bage getemna PusuhNa, emaka reh gegehna Ia erbebe i bas PertotonNa seh maka PanasNa naktaken ku taneh bagi taktak dareh.)

45Kenca dung Ia ertoto mulihken Ia ndahi ajar-AjarNa. IdapetiNa ajar-ajar e tunduh perbahan cedasa atena.

46Jenari nina Jesus man kalak e, "Ngkai maka kam tunduh? Kekeken janah ertotolah gelah ola kam kena percuban."

Jesus itangkap (Mat 26:47-56; Mrk 14:43-50; Yoh 18:3-11)

47Sanga Jesus ngerana denga, reh sada rombongen kalak nterem. Judas, sekalak i bas ajar-ajar si sepulu dua kalak, mabai rombongen e. Ideheri Judas e Jesus jenari iemana.

48Tapi nina Jesus, "O, Judas, alu ema enda kin kam ndudurken Anak Manusia si isuruh Dibata?"

49Asum idah ajar-ajar ras Jesus kai si nandangi jadi nina man Jesus, "O Tuhan, ilawan kami ia alu pedang enda?"

50Jenari sekalak ajar-ajar e minter ngelawan sekalak suruh-suruhen Imam si Mbelin seh maka retap cupingna si arah kemuhen.

51Tapi nina Jesus, "Olanai." Jenari idadap Jesus cuping kalak ndai jenari IpepalemNa.

52Emaka ngerana Jesus man imam-imam si mbelin, pengulu Rumah Pertoton ras peminpin-peminpin Jahudi si reh ku Ia nina, "Iakapndu kin Aku enda sekalak pengerampok maka reh kam maba pedang ras perpalu?

53Tep-tep wari Aku ras kam i bas Rumah Pertoton janah labo Aku itangkapndu. Tapi enda me paksa si cocok man bandu, asum kuasa kegelapen erkuasa."

Petrus mersoken Jesus (Mat 26:57-58, 69-75; Mrk 14:53-54, 66-72; Yoh 18:12-18, 25-27)

54Jenari itangkap kalak si reh e Jesus janah ibabana ku rumah Imam si Mbelin. Petrus ngikutisa i dauh-dauh nari.

55I tengah kesain lit kalak pegara api janah kundul kalak e i kelewetna cudu. Petrus pe ku je kundul.

56Sekalak juak-juak diberu ngidah Petrus kundul i deher api e. Ipepayona kal jenari nina, "Ia pe teman Jesus kap!"

57Tapi merso Petrus nina ngaloi, "O bibi, la kutandai pe Ia!"

58La ndekahsa kenca si e, lit ka kalak si deban ngidah ia janah nina, "Kam pe TemanNa kap!" Tapi ngaloi Petrus, "Lang teman, aku labo!"

59Kira-kira sada jam kenca si e, lit kalak si deban ngerana alu tegas nina, "Nggo pasti ia pe PengikutNa, sabap ia pe kalak Galilea!"

60Tapi ngaloi Petrus, "La kueteh kai si ikatakenndu e!" Asum Petrus ngerana denga minter tekuak manuk.

61Jenari itulihken Tuhan kempak Petrus. Inget Petrus pe maka nggo ikataken Tuhan man bana, "Ope denga tekuak manuk i bas berngi enda, nggo ipersokenndu Aku telu kali."

62Emaka lawes Petrus ndarat janah tangis ia perbahan ceda atena.

Jesus igombang-gombangi dingen ipekpeki (Mat 26:67-68; Mrk 14:65)

63Kalak si erjaga nggombang-gombangi Jesus dingen mekpeki Ia.

64Itutupina ayo Jesus jenari nina, "Kataken, ise si mekpek Kam?"

65Melala denga pe cekurak si deban ibelaskenna man Jesus.

Jesus i lebe-lebe Pengadilen Agama (Mat 26:59-66; Mrk 14:55-64; Yoh 18:19-24)

66Kenca terang wari pulung me pertua-pertua kalak Jahudi, imam-imam si mbelin ras guru-guru agama. Jenari ibabana Jesus ku lebe-lebe Pengadilen Agama.

67Nina kalak e, "Kataken man kami, Kam kin Raja Penampat si ipadanken Dibata?" Erjabap Jesus, "Adi Kukataken pe man bandu, labo kam tek.

68Janah adi Kusungkun pe kam, labo ka ijabapndu.

69Tapi mulai genduari nari Anak Manusia si isuruh Dibata kundul arah kemuhen Dibata si Mada Kuasa."

70Nina kalak ndai kerina, "Dage, Kam kin Anak Dibata?" Erjabap Jesus, "Bagi katandu e me!"

71Jenari nina kalak e, "Kita lanai perlu saksi! Nggo si begi kai si IkatakenNa."



 <<  Lukas 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel