Diberu-diberu si nampati Jesus
1La ndekahsa kenca si ndai isiari Jesus kota-kota ras kuta-kuta, IberitakenNa Berita Si Mehuli kerna Kinirajan Dibata. Ajar-ajar si sepulu dua kalak ikut ras Ia,
2bage pe piga-piga diberu si nggo IpepalemNa i bas setan ras penakit-penakit nari, e me: Maria (si igelari Magdalena) si nggo ipelawes pitu setan i bas ia nari;
3Johana ndehara Kusa menteri Herodes, Susanna bage pe nterem diberu-diberu si deban. Diberu-diberu enda ndai me si nampati Jesus ras ajar-AjarNa alu erta-ertana.
Perumpaman kerna si ngambur benih (Mat 13:1-9; Mrk 4:1-9)
4Nterem kalak rehen i kuta-kuta nari ndahi Jesus, emaka asum pulung ia kerina ituriken Jesus perumpaman enda nina,
5"Sekalak perjuma lawes ku juma ngambur benih. Asum ia ngambur benih ndai, deba ndabuh ku dalan, emaka idedehi kalak jenari reh perik-perik manganisa seh keri.
6Deba ka ndabuh ku taneh si erbatu-batu, kenca turah, la ndekahsa kerah ia, sabap kerah taneh e.
7Lit ka deba ndabuh ku tengah peren duri; turah raduken peren duri e, tapi iasak peren duri e benih ndai seh mate pe.
8Tapi deba ndabuh ku taneh si mehumur, mehuli perturahna, jenari erbuah seratus kali ganda." Kenca ituriken Jesus si e, emaka nina, "Begikenlah adi lit kin cupingndu!"
Maksud ras tujun perumpaman (Mat 13:10-17; Mrk 4:10-12)
9Emaka nungkun ajar-ajar Jesus man BaNa kerna maksud ras tujun perumpaman ndai.
10Erjabap Jesus nina, "Man bandu nggo ibereken pemeteh kerna rahasia Kinirajan Dibata; tapi man kalak si deban ituriken alu perumpaman, emaka aminna gia ipernehenna, tapi labo idahna, aminna gia ibegikenna tapi labo iangkana."
Iterangken Jesus perumpaman si ngambur benih (Mat 13:18-27; Mrk 4:13-20)
11"Bagenda me antusenna perumpaman ndai. Benih ndai e me kata Dibata.
12Benih si ndabuh ku dalan iandingken man kalak si megiken berita e, ibegikenna, tapi reh Iblis muat kata e i bas ukurna nari gelah ula ia tek dingen terkelin.
13Benih si ndabuh ku taneh si erbatu-batu iandingken man kalak si megiken berita e, ibegikenna dingen ialokenna alu meriah ukur. Tapi la mbages uratna, kentisik ngenca ia tek. Reh kenca percuban minter ia murtad.
14Benih si ndabuh ku peren duri, iandingken man kalak si megiken berita e, tapi aru atena janah jadi kalak bayak atena. Ersenang-senang atena i bas doni enda. Kerina si e nindih ia seh maka buahna la sempat metua.
15Benih si ndabuh ku taneh si mehumur iandingken man kalak si megiken berita e, ibegikenna, ibunikenna i bas ukurna si mehuli dingen tetap, janah megenggeng ia seh erbuah."
Lampu i teruh tumba (Mat 4:21-25)
16"Labo lit kalak nagani lampu jenari itutupina alu tumba ntah pe itamakenna ku teruh ingan medem. Tentu itamakenna ku ingan sangket gelah terang iakap kalak si bengket ku bas.
17Sabap kerina si terbuni teridah nge pagi janah kerina rahasia terbongkar dingen tangkas nge pagi.
18Megermetlah kam kerna kai si ibegindu; sabap kalak si nggo lit i bas ia man bana itambahi tole. Tapi kalak si la lit kai pe i bas ia si iakapna lit i bas ia pe ibuat i bas ia nari."
Nande Jesus ras senina-SeninaNa (Mat 12:46-50; Mrk 3:31-35)
19Nande Jesus ras senina-SeninaNa reh ndahi Ia, tapi perbahan teremna jelma i je, emaka la terbahanca jumpa.
20Tapi lit sekalak si ngatakenca man Jesus Nina "NandeNdu ras senina-SeninaNdu tedis i darat, atena njumpai Kam."
21Emaka nina Jesus man kalak si Nterem "NandengKu ras senina-seninangKu, e me kalak si megiken dingen si ngikutken Kata Dibata."
Ipejeneng Jesus angin meter (Mat 8:23-27; Mrk 4:35-41)
22I bas sada wari idatasi Jesus ras ajar-AjarNa sada perahu, janah nina Jesus man ajar-AjarNa, "Ota ku lepar ah." Emaka berkat ia.
23Asum kalak e erlayar, tunduh Jesus. Rempet rembus angin meter ku dano e, janah mulai bengket lau ku bas perahu si erbahanca kalak e i bas bahaya tuhu-tuhu.
24Emaka iingeti ajar-ajar me Jesus nina, "O Guru, Guru! Cilaka kita!" Keke Jesus, IsergangiNa angin ras galumbang si merawa ndai. Angin ras galumbang e minter jeneng kal.
25Kenca bage nina Jesus man kalak ndai, "Ngkai maka kam mbiar? I ja kinitekenndu?" Tapi mamang ate ajar-ajar dingen mbiar pe ia, janah nina sapih-sapih ia, "Ise kin ndia Ia? IperentahkenNa angin ras galumbang, janah angin ras galumbang e pe patuh nandangi PerentahNa."
Ipepalem Jesus sekalak setanen (Mat 8:28-34; Mrk 5:1-20)
26Terus Jesus ras ajar-AjarNa erlayar ku Gerasa pekepar-kepar ras daerah Galilea.
27Seh kenca Jesus idaraten, reh me sekalak dilaki i kuta nari njumpai Ia. Dilaki enda ndai setanen. Nggo ndekah ia la ruis dingen lanai ia i rumah, tapi ringan ia i tengah-tengah kuburen.
28Asum idahna Jesus serko ia, nembah-erjimpuh i lebe-lebe Jesus janah alu sora megang nina, "O Jesus, Anak Dibata si Meganjangna, kuga AteNdu aku IbahanNdu? Kupindo maka Ola aku IukumNdu!"
29Enda ikatakenna perbahan isuruh Jesus setan e ndarat i bas ia nari. Nggo megati ia ikuasai setan e, seh maka aminna gia ia nggo ipenjaraken janah tanna ras nahena iiket alu rante, banci denga ka nge iretapkenna rante e, jenari ibaba setan ia ku ingan si mesawang.
30Emaka isungkun Jesus ia nina, "Ise gelarndu?" Erjabap ia, "Gelarku Meribu-ribu," sabap melala setan si neluki ia.
31Ipindoken setan-setan e man Jesus gelah Ola ia IpelawesNa ku bas kelbung si mbages.
32I bas mbal-mbal i ture-ture uruk e, lit me sada rarasen babi sangana nungke-nungke. Emaka ipindoken setan-setan e man Jesus gelah ibere Jesus min ia kerina lawes neluki babi-babi e. Pemindonna enda ibere Jesus.
33Kenca bage, ndarat me setan-setan ndai bas dilaki e nari, jenari iselukina babi-babi e. Kerina babi si sada rarasen ndai minter kiamen janah megulang, ndabuhen ku dano mate gedap kerina i je.
34Kenca idah permakan babi ndai kai si nggo jadi e, kiam ia jenari iturikenna kejadin e ku kuta-kuta sekelewetna.
35Emaka rehen kalak ngenehen kai si nggo jadi. Idahina Jesus janah idapetina kalak si nggo itadingken setan ndai kundul i deher Jesus; nggo ruis ia dingen nggo jore ukurna. Emaka mbiar kalak enda ndai kerina.
36Kalak si nggo ngidah kejadin e, nuri-nuri man kalak si reh ndai kuga dalanna maka kalak si setanen ndai nggo malem.
37Emaka kerina kalak si i bas daerah Gerasa e mindo man Jesus gelah ItadingkenNa min daerah e, sabap tuhu-tuhu mbiar ia kerina. Perbahan si e, idatasi Jesus perahu jenari lawes Ia.
38Kalak si nggo itadingken setan ndai mindo man Jesus gelah ia ikut. Tapi isuruh Jesus ia lawes nina,
39"Mulihlah kam ku rumahndu janah beritakenlah kai si nggo ibahan Dibata man bandu." Emaka lawes ia isiarina kuta e janah iberitakenna kai si nggo ibahan Jesus man bana.
Anak Jairus si diberu; bage pe sekalak diberu si ndadap uis Jesus (Mat 9:18-26; Mrk 5:21-43)
40Kenca seh ka Jesus i lepar, ialo-alo jelma si nterem Ia, sabap kerina nggo tertima-tima.
41Emaka reh me sekalak pengulu rumah persembahen gelarna Jairus. Isembahna nahe Jesus janah ipindokenna gelah Jesus reh ku rumahna,
42sabap anakna narus mate. Anakna e diberu, umurna kira-kira sepulu dua tahun janah ia anak sada-sada. Asum erdalan Jesus ku rumah Jairus, siasak-asaken jelma si nterem ndeheri Ia.
43Lit i je sekalak diberu nggo sepulu dua tahun dekahna bluding rusur. Nggo keri erta-ertana guna pertambarna man dokter-dokter, tapi la lit sekalak pe si ngasup pepalem ia.
44Ideherina Jesus i pudi nari dingen idadapna rambu-rambu uis Jesus, janah paksa e pe minter ngadi dareh e.
45Emaka nungkun Jesus nina, "Ise si ndadap Aku?" Perbahan la lit kalak si ngaku, emaka nina Petrus, "O Guru, nterem kap jelma i KelewetNdu janah siasak-asaken ndeheri Kam."
46Tapi nina Jesus, "Lit kap sekalak si ndadap Aku, sabap Kugejap lit kuasa ndarat i bas Aku nari."
47Asum ieteh diberu ndai maka kai si nggo ibahanna e la terbuniken, emaka reh ia ku lebe, nggirgir ia, janah erjimpuh nembah man Jesus. I lebe-lebe jelma si nterem iturikenna kai sabapna maka idadapna Jesus ras kerna penakitna si minter malem e.
48Emaka nina Jesus man diberu e, "O anakKu, kinitekenndu nggo nampati kam, mulihlah alu ermeriah ukur."
49Sanga Jesus ngerana denga, reh me sekalak si mbaba berita i rumah pengulu e nari. Nina man Jairus, "Anakndu ndai nggo mate, man kai nari ngelatihi Guru enda?"
50Tapi kata e ibegi Jesus, emaka nina man Jairus, "Ola kam mbiar, tek sajalah, malem nge kari anakndu e."
51Kenca seh Jesus i rumah, ise pe la iberena ikut ras ia ku bas selain Petrus, Johanes, Jakup ras bapa dingen nande anak e.
52Kerina kalak si i je erceda ate dingen nangisi anak e. Tapi nina Jesus, "Ola kam tangis; anak enda labo mate, tunduh saja nge ia!"
53Itawai kalak ndai Jesus, sabap ietehna nge maka anak e nggo mate.
54Tapi ijemak Jesus tan anak ndai, janah nina alu sora megang, "O beru, kekeken!"
55Emaka erkesah anak ndai mulihken janah minter ia keke. Jenari isuruh Jesus gelah ibere man anak e.
56Jengang orang tuana, tapi ipedahi Jesus gelah ula iturikenna man ise pe kai si nggo jadi e.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel