Alkitab Mobile SABDA
[VER] : [KARO]     [PL]  [PB] 
 <<  Matius 11 >> 

Persuruhen Johanes Peridiken (Luk 7:18-35)

1Kenca Jesus ngerana man ajar-AjarNa si sepulu dua kalak, lawes Ia ku kuta-kuta si ndeher ngajar meritaken Berita Si Mehuli.

2Johanes Peridiken si lit i bas penjara megi berita kerna pendahin Kristus. Emaka isuruhna piga-piga kalak ajar-ajarna ndahi Jesus.

3Nungkun ajar-ajarna e man Jesus nina, "Kam kin si ikataken Johanes si nggo ndeher e ntah itimai kami dengan kalak si deban?"

4Erjabap Jesus man bana, "Dahilah Johanes Peridiken, turiken man bana kerina si ibegindu ras iidahndu genduari enda;

5kalak pentang erpengidah, si pang-pangen erdalan, si gadamen malem, si pasek erpemegi, si mate nggeluh mulihi janah Berita Si Mehuli iberitaken man kalak musil.

6Malem ate tuhu-tuhu iakap kalak adi la tondel ukurna erkiniteken man bangKu!"

7Kenca lawes ajar-ajar Johanes Peridiken, ibenaken Jesus ngerana man kalak si nterem kerna Johanes nina, "Asum idahindu mbaru enda Johanes Peridiken ku taneh si melungun, kai kin min atendu nehenenndu? Atendu kin ngenehen dukut si iembus angin? Tentu lang!

8Kai dage nehenenndu ku je? Sekalak si mejile uisna? Tentu lang, sabap kalak si mejile uisna inganna i bas istana raja nge.

9Kataken man bangKu, kai nehenenndu ku je? Sekalak nabi? Payo, Kukataken pe man bandu maka si nggo idahndu e lebihen asangken sekalak nabi.

10Sabap kerna Johanes Peridiken nggo isuratken i bas Pustaka Si Badia, 'Kusuruh persuruhenKu leben asangken Kam,' nina Dibata, 'Ia kap nikapken dalan man bandu.'

11Ingetlah! Johanes Peridiken kap si mbelinna i bas kerina manusia si nggo pernah nggeluh. Tapi si kitikna i bas Kinirajan Surga belinen asangken Johanes Peridiken.

12Mulai kin Johanes Peridiken ngajar seh genduari, Kinirajan Surga tetap ilawan kalak janah ikuasaina atena.

13Sabap kerina pengajaren nabi-nabi ras Undang-undang si ibereken Musa ernubuat kerna Johanes.

14Janah adi tek kam kai si ikataken nabi e, Johanes kap Elia si aturna reh.

15Begikenlah, adi lit kin cupingndu!

16Bagi kai nge ndia banci Kuandingken kalak si genduari enda? Kalak si genduari enda bali kap ras anak-anak erguro-guro i tengah kesain. Nina sada terpuk man terpuk si deban,

17'Nggo ipalu kami gendang guro-guro tapi la kam nggit landek. Nggo iendeken kami lagu tangis-tangis tapi la kam nggit tangis!'

18Sabap Johanes la ikut i bas kerja man-man ras minem-minem emaka ikataken kalak, 'Nggo setanen ia!'

19Genduari reh Aku, Anak Manusia si isuruh Dibata, ku kerja man-man ras minem-minem, emaka ikataken kalak, 'Nehenlah! Ia kalak rangap dingen peminem! TemanNa pengalo cuke ras kalak perdosa.' Amin bage gia Dibata pentar kap janah KepentarenNa nggo ibenarken arah kerina PendahinNa."

Kota-kota si la tek (Luk 10:13-15)

20Kenca bage isumpahi Jesus kuta-kuta si i je nggo melala IbahanNa tanda-tanda sengget, sabap kalak kuta e la nggit jera i bas dosana nari.

21Nina Jesus, "Cilaka me kam o Korasin! Cilaka me kam o Betsaida! Bicara i Tirus ras i Sidon min ndai ibahan tanda-tanda sengget si nggo ibahan i tengah-tengahndu, nggo min ndai jera kalak si i je.

22Ingetlah! I bas wari pendungi pagi beraten ukumenndu asangken ukumen kalak Tirus ras kalak Sidon.

23Kam pe, o Kapernaum! Sura-surandu meganjang seh ku langit. Idabuhken nge kam pagi ku neraka! Bicara i Sodom min ndai ibahan tanda-tanda sengget si nggo ibahan i tengah-tengahndu, lit denga min ndai Kota Sodom e seh asa genduari.

24Ingetlah! I bas wari pendungi pagi beraten ukumenndu asangken ukumen Sodom."

Rehlah kam ndahi Aku (Luk 10:21-22)

25Paksa e nina Jesus, "O Bapa, Tuhan si erkuasa i Surga ras i doni! Bujur Kukataken man BaNdu sabap nggo IpetangkasNdu man kalak si la erpemeteh kai si IbunikenNdu man kalak pentar ras erpemeteh.

26O Bapa, enda kap si ngena AteNdu."

27"Nggo ibereken BapangKu kerinana man bangKu. Ise pe la nandai Anak seakatan Bapa, janah ise pe la nandai Bapa seakatan Anak ras kalak si man bana nggo ipetangkasken Anak e."

28"Marilah dahi Aku, o kam si latih maba baban si mberat maka Kubereken pengadi-ngadinndu.

29Tamakenlah pasangenKu ku kudukndu janah erlajarlah i bas Aku nari. Sabap Aku melias janah meteruk ukurKu; alu bage idatndu me kemalemen ate.

30Sabap pasangen si Kubereken man bandu ntabeh mabasa, dingen baban si Kutamaken ku babondu menahang kap."



 <<  Matius 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel