Penungkunen kerna wari Sabat (Mrk 2:23-28; Luk 6:1-5)
1La ndekahsa kenca si e, tupung wari Sabat kalak Jahudi, mentas Jesus arah perjuman gandum. Iputikken ajar-AjarNa gandum e, jenari igugutna sabap melihe iakapna.
2Ngidah si e nina kalak Parisi man Jesus, "Nehenlah, ajar-AjarNdu erbahan kai si la banci ibahan i bas wari Sabat rikutken Undang-undang Agama."
3Ngaloi Jesus, "Langa kin pernah iogendu i bas Pustaka Si Badia kai ibahan Daud asum melihe ia ras teman-temanna?
4Bengket ia ku rumah Dibata, ibuatna roti si nggo ipersembahken man Dibata, jenari ipanna ras teman-temanna. Rikutken Undang-undang Agama, imam-imam ngenca banci man roti e.
5Langa kin iogendu i bas Undang-undang si isuratken Musa maka i bas tep-tep wari Sabat si tuhuna imam-imam ngelanggar Undang-undang wari Sabat i bas Rumah Pertoton, tapi la ia ersalah?
6Tapi ingetlah, maka i jenda lit si lebihen asa Rumah Pertoton.
7Lit kap tersurat i bas Pustaka Si Badia, 'Ate keleng nge si Kuperluken, labo asuh-asuhen si ipersembahkenndu.' Adi tuhu-tuhu kin iertindu kata enda, labo iukumndu kalak si la ersalah.
8Sabap Anak Manusia si isuruh Dibata, Ia kap Tuhan si engkuasai wari Sabat e."
Sekalak mate serapen tanna sembelah (Mrk 3:1-6; Luk 6:6-11)
9Kenca bage, lawes Jesus ku rumah persembahen kalak Jahudi.
10I rumah persembahen e lit sekalak sembelah tanna nggo kesip perban mate serapen. Piga-piga kalak si i je ersura-sura ndarami kesalahen Jesus. Emaka isungkunna Jesus nina, "Rikutken Undang-undangta, banci kin ipepalem kalak sakit i bas wari Sabat?"
11Ngaloi Jesus nina, "Adi lit sekalak i bas kam ndabuh biri-birina ku bas lubang si mbages i bas wari Sabat, tentu itangkapna dingen ipedaratna biri-birina e.
12Manusia ergan nge asa biri-biri! Emaka rikutken Undang-undangta mehuli nge nampati kalak i bas wari Sabat."
13Jenari nina Jesus man si mate serapen tanna e, "Pepinter tanndu." Ipepinterna tanna, jenari minter malem bagi tanna si sembelah nari.
14Ndarat kalak Parisi e, arih-arih ia guna munuh Jesus.
Persuruhen pilihen Dibata
15Kenca ieteh Jesus sura-sura kalak Parisi e, lawes Ia i bas rumah persembahen kalak Jahudi e nari. Nterem kalak ngikutken Ia. IpepalemNa kerina kalak si penakiten,
16jenari IpersingetiNa gelah man ise pe ula ituriken kerna Ia.
17Si enda jadi gelah seh kai si nggo ikataken Dibata arah Nabi Jesaya nina,
18"Enda me persuruhenKu si nggo Kupilih, Ia me si Kukelengi dingen si ngena ateKu. Kubereken me KesahKu man BaNa, janah Ia me si meritaken kebujurenKu man kerina bangsa.
19Tapi labo Ia pagi rubat ntah serko bage pe labo Ia ngerana alu sora megang i pasar si meriah.
20Buluh si nggo mbeltuk la IpenggelkenNa, lampu si midep-idep la InimpetiNa, la Ia erngadi-ngadi seh menang IbahanNa keadilen e.
21Janah i bas Ia me kerina bangsa-bangsa erpengarapen."
Jesus ras Balsebul (Mrk 3:20-30; Luk 11:14-23)
22Jenari itaruhken kalak man Jesus sekalak pentang dingen lanai beluh ngerana perbahan iseluki setan. Kenca Jesus mpelawes setan e, beluh ia ngerana dingen erpengidah.
23Mamang ate kalak si nterem nina sapih-sapih ia, "Banci jadi Ia nge Anak Daud si ipadanken e."
24Asum ibegi kalak Parisi kata enda ngaloi ia nina, "Balsebul pengulu setan nge mereken kuasa man BaNa mpelawes setan e."
25Ieteh Jesus perukuren kalak Parisi enda emaka nina, "Kerajan si erbelah-belah kugapa pe sontar nge. Janah kuta ntah rumah tangga si erbelah-belah kugapa pe sontar nge.
26Bage pe adi Iblis pelawes Iblis, erbelah-belah kap ia. Adi bage ma sontar kerajanna?
27Dage, adi Balsebul kin mereken kuasa man bangKu, ise dage mereken kuasa man teman-temanndu mpelawes setan-setan e? Teman-temanndu e lah ertimbang kerna cakapndu e.
28Erkiteken Kupelawes setan-setan alu kuasa Kesah Dibata, e tandana maka Kinirajan Dibata nggo reh man bandu.
29Ise pe labo banci bengket ku rumah si mbisa ngerampasi erta-ertana, pala iketna lebe kalak si mbisa e. Kenca bage maka banci irampasina erta-erta si lit i bas rumah e.
30Ise si Ia mihak aku ngelawan Aku kap; ise la ras Aku pepulungken, ia engkerapi kap.
31Emaka Kukataken man bandu: Kerina dosa ras cakap si encurnahen Dibata banci ialemi; tapi kalak si encurnahen Kesah Si Badia la ialemi Dibata ndigan pe.
32Kalak si encurnahen Anak Manusia si isuruh Dibata banci ialemi Dibata; tapi kalak si encurnahen Kesah Si Badia lalap ia la ialemi Dibata."
Kerna batang ras buahna (Luk 6:43-45)
33"Guna ndatken buah si mehuli arus lit batang si mehuli; adi batang la mehuli tentu buahna pe la mehuli. Sabap batang itandai arah buahna kap.
34O, kalak jahat! Kuga nindu ngataken si mehuli adi ukurndu pe jahat nge? Sabap kai si ibelasken, e me si erburak i bas pusuh nari.
35Kalak bujur tentu teridah i bas ia nari si mehuli, ndarat i bas pusuh peratenna si mehuli nari; janah kalak jahat ndarat me si jahat i bas pusuh peratenna si jahat nari."
36"Tapi ingetlah! I bas wari pendungi pagi kerina si la mehuli si nggo ibelaskenndu arus ipertanggung-jawabken.
37Sabap arah kai si nggo ibelaskenndu me kam iadili."
Pemindon tanda sengget (Mrk 8:11-12; Luk 11:29-32)
38Jenari ngerana piga-piga guru agama ras kalak Parisi man Jesus nina, "O Guru, merincuh kal kami ngidah tanda sengget i bas Kam nari."
39Ngaloi Jesus, "Andiko, jahatna jelma si genduari enda! Kam kalak jahat mindo maka Kubahan tanda sengget? Labo Kubahan! La ibereken sada tanda sengget pe man bandu seakatan tanda sengget Nabi Juna ngenca.
40Sabap bagi Nabi Juna telu wari telu berngi dekahna i bas beltek nurung galang, bage ka me pagi Anak Manusia si isuruh Dibata e telu wari telu berngi dekahna i bas beltek taneh enda.
41I bas wari pendungi pagi i lebe-lebe Pengadilen Dibata tedis kalak Niniwe ngaduken kam, sabap ia jera i bas dosana nari kenca ibegina Nabi Juna ngajar; janah si tuhuna i jenda lit beliden asa Nabi Juna!
42I bas wari pendungi pagi i lebe-lebe Pengadilen Dibata tedis me Kemberahen i Selatan nari ngaduken kam, sabap ia reh i bas ingan si ndauh nari guna megiken pengajaren Salomo; janah si tuhuna i jenda lit beliden asa Salomo."
Kerehen setan mulihken (Luk 11:24-26)
43"Adi nggo ndarat setan i bas sekalak jelma nari, lawes setan e, isiarina gurun pasir ndarami ingan ngadi. Adi la idatna ingan e,
44nina i bas ukurna, 'Mulihlah aku ku rumahku si nggo kutadingken e.' Emaka mulihken ia, idapetina rumah e nggo bersih isapui dingen nggo sikap.
45Jenari lawes ia, idilona pitu setan si jahaten asa ia. Kerina ia bengket ku bas janah i je me ia ringan seh maka reh kelekna kalak si ibengketina e. Bage me pagi jadina kalak jahat si genduari enda."
Nande ras senina-senina Jesus (Mrk 3:31-35; Luk 8:19-21)
46Asum Jesus ngerana denga, reh NandeNa ras senina-SeninaNa. Tedis ia i darat, sabap atena njumpai Jesus.
47Emaka nina sekalak si i je man Jesus, "I darat NandeNdu, senina-SeninaNdu, jumpa atena ras Kam."
48Tapi ngaloi Jesus, "Ise kin nandengKu? Ise kin seninangKu?"
49Jenari ituduh Jesus ajar-AjarNa janah nina, "Enda kap nandengKu ras senina-seninangKu!
50Ise ndalanken kai si ngena ate Dibata, BapangKu, ia kap seninangKu, turangKu, ras nandengKu."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel