Alkitab Mobile SABDA
[VER] : [KARO]     [PL]  [PB] 
 <<  Matius 13 >> 

Perumpaman kerna si ngambur benih (Mrk 4:1-9; Luk 8:4-8)

1I bas wari si e berkat Jesus i rumah e nari ku tepi dano. I tepi dano kundul Ia guna ngajar.

2Perbahan nterem kal kalak pulung ngkeleweti Ia, emaka IdatasiNa sada perahu. Kundul Ia i datas perahu e, janah kalak si nterem tedis i daraten, i tepi dano.

3Jenari ituriken Jesus man kalak e erbage-bage pengajaren alu perumpaman. Nina Jesus, "Lit me sekalak perjuma lawes ku jumana ngambur benih.

4Asum ia ngambur benih e, lit ndabuh ku dalan, jenari reh perik-perik manganisa.

5Lit ka ndabuh ku taneh si erbatu-batu, si la mbages tanehna, emaka minter turah benih e.

6Tapi kenca reh las matawari, minter melus dingen kerah sabap la mbages uratna.

7Lit ka pe ndabuh ku tengah peren duri, turah benih e, tapi talu ibahan peren duri.

8Tapi lit pe ndabuh ku taneh si mehumur, mehuli perturahna seh erbuah; lit si seratus buahna, lit si enem puluh janah lit si telu puluh.

9Begikenlah adi lit kin cupingndu!"

Kerna tujun perumpaman (Mrk 4:10-12; Luk 8:9-10)

10Jenari reh ajar-ajar nungkun man Jesus nina, "Ngkai maka alu perumpaman Kam ngerana man kalak si nterem e?"

11Erjabap Jesus, "Man bandu nggo ibereken Dibata kengasupen guna meteh rahasia Kinirajan Surga, tapi man kalak enda lang.

12Sabap man kalak si lit i bas ia itambahi gelah reh buena i bas ia; tapi man kalak si la lit, si lit i bas ia e pe ibuat i bas ia nari.

13Aku ngerana man kalak e alu perumpaman sabap: aminna gia inehenna tapi la idahna, janah aminna gia idengkehkenna tapi la ibegi dingen la iangkana.

14Alu bage nggo seh Kata Dibata si isuratken Nabi Jesaya, nina: 'Idengkehkenndu tapi la iangkandu; ipernehenndu tapi la idahndu.

15Sabap nggo batu-batun ukur kalak enda; nggo pasek cupingna, ipit-pitkenna matana. Sabap adi la bage tentu erpengidah nge mata ras erpemegi nge cuping kalak enda, janah ukur kalak enda tentu erpengangka, emaka reh kalak enda ndahi Aku, nina Dibata, janah Kupepalem me kalak enda.'

16Tapi melem tuhu-tuhu atendu, sabap matandu erpengidah dingen cupingndu erpemegi.

17Ingetlah! Nterem nabi bage pe nterem kalak si patuh man Dibata, merincuh ngidah kai si iidahndu genduari e, tapi la banci, janah merincuh ia megi kai si ibegindu, tapi la dorek."

Iterangken Jesus kerna perumpaman si ngambur benih (Mrk 4:13-20; Luk 8:11-15)

18"Begikenlah dage, kai ertina perumpaman enda.

19Kalak si megi Berita kerna Kinirajan e, tapi la iangkana bali kap ia ras benih si ndabuh ku tepi dalan. Si jahat reh nangko berita si nggo iamburken ku bas pusuhna e.

20Benih si ndabuh ku taneh si erbatu-batu bali ras kalak si minter ngaloken Berita e alu meriah ukur asum ibegina.

21Tapi la mbages janah kentisik ngenca i bas ia. Adi ia ngenanami kesusahen ras iayak-ayak erdandanken Berita e, minter tondel ukurna.

22Benih si ndabuh ku tengah-tengah peren duri bali ras kalak si ngaloken Berita e; tapi aru atena kerna geluhna ras merincuh kal ia bayak emaka kicat Berita e, janah eme erbahanca la erbuah.

23Tapi benih si ndabuh ku taneh si mehumur bali ras kalak si megi Berita dingen iangkana, jenari erbuah pe; lit si erbuah seratus, lit si enem puluh, lit si telu puluh."

Perumpaman kerna sesa si turah i tengah-tengah page

24Jenari ituriken Jesus ka perumpaman man kalak e nina, "Adi Kinirajan Surga e banci iandingken ras kalak si nuan benih si mehuli i jumana.

25Tapi i bas sada berngi, asum kerina kalak nggo tunduh, iamburken musuhna ku juma e buah sesa.

26Kenca turah page e dingen kenca rumpah teridah me sesa ndai.

27Emaka isungkun si erdahin i bas juma e perjuma ndai nina, 'O tuan, ma benih si mehuli nge mbaru enda isuanndu i jumandu e? I ja nari nge rehna sesa e?'

28Erjabap tuan e, 'Musuh nge si ngamburken benih sesa ku je.' Jenari nina si erdahin e, 'Iruahi kami dage sesa e?'

29Erjabap tuan e, 'Ola, sabap adi iruahindu sesa e, banci jadi page e pe ikut meruah.

30Pelepas saja sesa e turah ras page seh rani. I bas paksa peranin e pagi kusuruh kalak si rani mpepulung sesa lebe, jenari iberkisi gelah iambekken ku bas api. Kenca si e kusuruh ipepulungna page ku bas lumbungku.'"

Perumpaman kerna benih (Mrk 4:30-32; Luk 13:18-19)

31Ituriken Jesus ka perumpaman si deban nina, "Kinirajan Surga banci iandingken ras sengkebuah benih sawi si isuanken kalak i bas jumana.

32Tuhu benih sawi benih si kitik i bas kerina benih sinuan-sinuan. Tapi kenca turah, batangna si galangna i bas batang gule-gulen si debanna. Bagi batang kayu kap sawi e seh maka perik-perik pe banci rasar i bas dahan-dahanna."

Perumpaman kerna ragi (Luk 13:20-21)

33Ituriken Jesus ka perumpaman si deban nina, "Kinirajan Surga e banci iandingken alu ragi. Ibuat sekalak diberu me ragi e, jenari iadukna ras telu tumba tepung seh niar jadi kembang."

Kai sabapna Jesus ngerana arah perumpaman? (Mrk 4:33-34)

34Kerina enda ipeseh Jesus man kalak si nterem alu perumpaman. Adi la arah perumpaman labo kai pe ikataken Jesus man kalak si nterem e.

35Alu bage seh me kai si ikataken Dibata arah nabi nina, "Alu perumpaman-perumpaman me Aku ngerana ras kalak e; Kuturiken me kai si terbuni mula tembe doni nari."

Iterangken Jesus perumpaman benih sesa

36Jenari mulih Jesus, ItadingkenNa kalak si nterem e. Idahi ajar-AjarNa Ia, jenari nina man Jesus, "Turiken min man kami erti perumpaman sesa si turah i juma e."

37Ngaloi Jesus, "Si ngambur benih si mehuli e, eme Anak Manusia si isuruh Dibata;

38juma e, eme doni enda; benih si mehuli e, eme kalak si nggo ngendesken dirina man Dibata. Sesa e, eme kalak si ikuasai si Iblis;

39musuh si ngambur benih sesa e, eme Iblis. Paksa peranin, eme kedungen doni enda, janah si rani eme malekat-malekat.

40Bagi sesa ipepulung kalak si rani jenari itutungna, bage ka me pagi i bas pendungi doni enda.

41Isuruh Anak Manusia eme malekat-MalekatNa mpepulung i bas KinirajanNa nari kerina si mabai manusia erdosa bage pe kerina manusia si erbahan jahat,

42jenari IambekkenNa me kerina ku api. I bas api e, tangis me kerina dingen seh kal suina atena.

43Tapi kalak si ngelakoken si ngena ate Dibata ersinalsal bagi matawari i bas Kinirajan Bapana. Begikenlah, adi lit kin cupingndu!"

Perumpaman kerna erta-erta si terbuni

44"Kinirajan Surga e banci iandingken ras erta-erta si terbuni i tengah juma. Idat kalak erta e, jenari itamburina mulihi. Meriah kal ukurna, emaka lawes ia, idayakenna kerina erta-ertana, jenari itukurna juma e."

Perumpaman kerna mutiara

45"Adi Kinirajan Surga e banci iandingken ras sekalak perbinaga si ndarami mutiara si mejilena.

46Kenca jumpa ia mutiara si mejile e, lawes ia, idayakenna kerina si lit i bas ia, jenari itukurna mutiara ndai."

Perumpaman kerna jala

47"Kinirajan Surga e banci iandingken ras jala si iamburken ku lawit. Erbage-bage nurung ku bas jala e.

48Kenca dem jala e, irintak penjala me ku duru, jenari kundul ia milihi nurung e. Si mehuli itamakenna ku bas tong, janah si la mehuli iambekkenna.

49Bage pe i bas wari pendungi pagi: reh me malekat-malekat nerapken kalak jahat i bas kalak si ngelakoken si ngena ate Dibata.

50Kalak jahat e iambekkenna ku api. I bas api e tangis me ia kerina dingen mesui kal atena i je."

Aturen agama si mbaru ras si ndekah

51Jenari isungkun Jesus ajar-AjarNa e nina, "Iangkandu nge perumpaman enda kerina?" Erjabap kalak e, "Iangka kami."

52Emaka nina Jesus, "Bageme tep-tep guru Undang-undang si nggo jadi murid i bas Kinirajan Surga bali kap ia ras sekalak tuan rumah mpedarati erta-ertana si meherga si mbaru ras erta-ertana si nggo ndekah."

Jesus la ialoken i Nasaret (Mrk 6:1-6; Luk 4:16-30)

53Kenca dung ituriken Jesus perumpaman e, lawes Ia i bas ingan e nari ku KutaNa.

54Kenca Ia seh i KutaNa, ngajar Ia i bas rumah persembahen kalak Jahudi man anak KutaNa e. Mamang ate kalak nina, "I ja nari nge PemetehNa e dingen i ja nari nge KuasaNa erbahan tanda-tanda sengget e?

55Ma Anak tukang kayu kin Ia? Ma Maria kin NandeNa, janah Jakup, Joses, Simon ras Judas nge SeninaNa?

56Ma TurangNa pe i jenda nge kerina?"

57Emaka la ialoken kalak Nasaret e Jesus. Perbahan si e nina Jesus man kalak e, "Sekalak nabi ipehaga kalak nge i japa pe; tapi i kutana ras i tengah-tengah keluargana lang."

58Perbahan la tek anak kuta e man Jesus, emaka la piga ibahan Jesus i je tanda-tanda sengget.



 <<  Matius 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran