Pengajaren kerna adat si ndekah (Mrk 7:1-13)
1Jenari reh piga-piga kalak Parisi ras guru-guru agama Jahudi ndahi Jesus. Nina man Jesus,
2"Ngkai maka ajar-AjarNdu la ngikuti adat nini-nininta? Ope man la iburihina tanna rikutken adat si dekah."
3Ngaloi Jesus, "Kam pe ngkai maka ilanggarndu pedah Dibata erkiteken, atendu patuh man adat si ndekah saja?
4Sabap nina Dibata, 'Mehamatlah man bapandu ras nandendu.' Ise numpahi bapana ntah nandena la banci lang iukum mate kap ia.
5Tapi nindu ngajar: Adi lit kalak si ngataken man orang tuana, 'Kai si banci ialokenndu i bas aku nari nggo kupersembahken man Dibata,' emaka kalak si bage lanai iarusken enghamati orang tuana e.
6Alu bage lanai meherga man bandu Kata Dibata erkiteken adat nini-ninindu.
7O kalak si pekulah-kulah! Tuhu kal kai si ikataken Nabi Jesaya kerna kam,
8'Nina Dibata, bangsa enda ipujina Aku i bas biberna ngenca, tapi ukurna ndauh sirang i bas Aku nari.
9La lit ertina isembahna Aku, sabap undang-undang agama si ajarkenna eme peraturen-peraturen manusia!'"
Si erbahanca manusia erdosa (Mrk 7:14-23)
10Kenca bage idilo Jesus kalak si nterem e, jenari nina, "Begiken dingen ertikenlah!
11Labo si bengket arah babah erbahanca kalak erdosa, tapi si ndarat arah babahna nari nge erbahanca ia erdosa."
12Jenari reh ajar-AjarNa ndeheri Ia nina, "IetehNdu ka nge maka kitik ukur kalak Parisi megi KataNdu e?"
13Erjabap Jesus, "Kerina si turah, si labo BapangKu si i Surga nuansa iruah nge pagi.
14Labo man ukuren kalak Parisi e. Ia peminpin si pentang. Adi kalak pentang negu kalak pentang tentu duana ia ndabuh ku parik."
15Jenari nina Petrus, "Turiken dage man kami erti perumpaman e."
16Ngaloi Jesus, "Kam pe dage langa denga bo ngerti?
17La iangkandu perumpaman e, maka si bengket ku bas babah jelma terus kap ku bas beltek jenari ipedarat ka?
18Tapi kai si ndarat arah babah, i bas pusuh nari kap rehna; si e me erbahanca kalak erdosa.
19Sabap i bas pusuh nari nge rehna sura-sura si jahat, si erbahanca ia munuh, erlua-lua, erlagu la mehuli, nangko, jadi saksi si perguak dingen numpahi.
20Enda me erbahanca kalak erdosa. Tapi man ope erburih bagi si ikatakenna labo erbahanca kalak la bersih rikutken aturen agama."
Kiniteken sekalak diberu Bangsa Kanaan (Mrk 7:24-30)
21Jenari lawes Jesus ku daerah deherken Kota Tirus ras Sidon.
22I je reh sekalak diberu kalak Kanaan ndahi Jesus nina, "O Bapa, Anak Daud! Mekuah min AteNdu aku sabap anakku iseluki setan. Mekelek kal iakapna."
23Tapi sengkebabah ranan pe Jesus la ngaloi. Emaka ideheri ajar-AjarNa ia, jenari nina, "Pelawes min diberu e, sabap gejek ia arah pudinta."
24Emaka ngaloi Jesus man diberu e, "Bangsa Israel desken biri-biri si nggo lalar kap, janah Aku isuruh Dibata man guna ia ngenca."
25Minter erjimpuh diberu e i lebe-lebe Jesus, jenari nina, "O Bapa sampati min aku!"
26Ngaloi Jesus, "La patut ibuat nakan anak-anak jenari ibereken man biang."
27Nina diberu e, "Tuhu Bapa, tapi biang pe man rimah-rimah si ndabuh i bas meja tuanna nari."
28Emaka nina Jesus man bana, "Kam sekalak diberu si tuhu-tuhu tek man Dibata. Perbahan si e jadi me man bandu bagi sura-surandu." Janah paksa si e minter malem anakna ndai.
Nterem kalak si penakiten ipepalem Jesus
29Itadingken Jesus ingan e, jenari lawes Ia erdalan arah tepi dano Galilea. InangkihNa sada uruk, i je kundul Ia.
30Nterem jelma rehen ndahi Jesus; ibabana kalak si mate serapen, si cempang-cempang, si pentang, si pekak ras erbage-bage penakit si deban. Ipepedemna si penakiten e i lebe-lebe Jesus. Jenari ipepalem Jesus kerina.
31Emaka mamang ate kalak si nterem ngidah kalak pekak nggo banci ngerana, si mate serapen ipepalem, si cempang-cempang nggo banci erdalan alu mehuli, si pentang nggo erpengidah. Jenari ipujina Dibata si isembah kalak Israel.
Ibere man Jesus empat ribu kalak (Mrk 8:1-10)
32Kenca bage idilo Jesus ajar-AjarNa jenari nina, "Mekuah ateKu ngenehen kalak si nterem enda, sabap nggo telu wari ia ras Aku janah genduari lanai lit kai pe i bas ia si man panganna. La ia Kupelepas lawes adi langa kin ia man, sabap banci kari lumben ia i tengah dalan."
33Nungkun ajar-AjarNa, "I bas ingan si melungun enda i ja ibuat pangan guna mesuri jelma si bagenda teremna?"
34Nina Jesus, "Piga lit i bas kam roti?" Erjabap ajar-AjarNa, "Pitu ngkibul roti janah lit piga-piga ikan."
35Emaka isuruh Jesus jelma si nterem e kundul i bas taneh.
36IbuatNa roti si pitu ngkibul ras ikan e, jenari ertoto Ia IkatakenNa bujur man Dibata. Kenca bage icepik-CepikNa, jenari IberekenNa man ajar-AjarNa guna ielaken man kalak si nterem.
37Kerina ia man seh besur. Kenca elah man ipepulung ajar-ajar kerina si iba, buena lit pitu sumpit.
38Teremna si man e lit kira-kira empat ribu kalak, diberu ras anak-anak la ikira.
39Janah kenca isuruh Jesus kalak si nterem e mulih, lawes Ia ku perahu jenari erlayar ku Magdala.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel