Alkitab Mobile SABDA
[VER] : [KARO]     [PL]  [PB] 
 <<  Matius 5 >> 

Khotbah Jesus i das uruk

1Kenca Jesus ngidah jelma si nterem, InangkihNa sada uruk. Kenca Ia kundul reh ajar-AjarNa pulung deherken Ia.

2Jenari IbenakenNa ngajari ajar-AjarNa e.

Kemalemen ate si tuhu-tuhu (Luk 6:20-30)

3Nina Jesus, "Malem ate tuhu-tuhu iakap kalak si nggejap maka ia labo kai pe ertina i lebe-lebe Dibata; sabap man bana me Kinirajan Surga.

4Malem ate tuhu-tuhu iakap kalak si erceda ate erkiteken dosa; sabap Dibata me ngapuli ia.

5Malem ate tuhu-tuhu iakap kalak si meteruk ukurna; sabap isehken Dibata me PadanNa man bana.

6Malem ate tuhu-tuhu iakap kalak si muas melihe nehken peraten Dibata; sabap IbesuriNa me ia.

7Malem ate tuhu-tuhu iakap kalak si perkuah ate dingen perkeleng; sabap ia me ngaloken perkuah ate Dibata.

8Malem ate tuhu-tuhu iakap kalak si meciho pusuh peratenna; sabap itandaina me tuhu-tuhu Dibata.

9Malem ate tuhu-tuhu iakap kalak si erbahan perdamen; sabap iakui Dibata me ia AnakNa.

10Malem ate tuhu-tuhu iakap kalak si ngenanami kiniseran erkite-kiteken nehken peraten Dibata; sabap man bana me Kinirajan Surga.

11Malem tuhu-tuhu atendu adi erkite-kiteken kam ajar-ajarKu igombang-gombangi, ipesega-sega dingen ipelawes kalak kam janah alu kata guak ipalitkenna si jahat man bandu.

12Ermengkah dingen meriahlah atendu, sabap nggo isikapken Dibata upahndu si mbelin i Surga; sabap bage me pe nabi-nabi si nggeluh leben asangken kam ipesega-sega kalak."

Sira ras terang (Mrk 9:50; Luk 14:34-35)

13"Bagi sira si seh kal perluna guna pangan, bage pe kam nandangi kerina manusia. Tapi adi sira e lanai masin, lanai banci ibahan masin mulihi. Sira e lanai erguna, emaka iambekken jenari idedehi kalak.

14Bagi terang si seh kal perluna i bas gelap, bage pe kam nandangi doni enda. Kuta si lit i das uruk la banci lang teridah.

15Labo isagani kalak lampu kenca bage itutupina alu tumba; tapi isangketkenna, gelah terang iakap kalak kerina si lit i bas rumah e.

16Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga."

Pengajaren kerna Undang-undang Agama Jahudi

17"Ola iakapndu Aku reh ncedai Undang-undang si ibereken Musa ras si iajarken nabi-nabi. Aku reh labo ncedai, tapi guna nehken si nggo isuratkenna e.

18Ingetlah katangKu enda! Seh masap langit ras doni, sada titik ntah sada bagin si kitikna pe i bas Undang-undang e la bene adi langa kin seh kerina kai si nggo isuratken e.

19Emaka ise la ngikutken si nggo isuratken e, aminna gia bagin si kitikna, janah ibabaina papak kalak si deban, ia me si la mehergana i bas Kinirajan Surga. Tapi ise ngikutkenca janah ibabaina kalak si deban ngikutken si nggo isuratken e, ia me si mbelinna i bas Kinirajan Surga.

20Kukataken pe man bandu maka labo kam banci bengket ku bas Kinirajan Surga adi la kin tutusen atendu erbahan si ngena ate Dibata asa guru-guru agama ras kalak Parisi."

Kerna merawa

21"Nggo ietehndu maka nai ikataken man nini-nininta, 'Ula munuh; kalak si munuh iadili.'

22Tapi genduari Kukataken man bandu: Ise merawa nandangi seninana, iadili pagin, ise si ngisakken kalak, arus iadili i lebe-lebe Pengadilen Agama. Janah ise ngataken seninana motu dingen la terpake, ia pagin itamaken ku api neraka.

23Dage, adi asum atendu nehken persembahen man Dibata ingetndu maka sangkut ukur seninandu nandangi kam,

24tadingkenlah lebe persembahenndu e jenari erdame ras ia. Kenca bage persembahkenlah persembahenndu e man Dibata.

25Adi iaduken kalak kam janah ibabana ku pengadilen, erdamelah ras ia ope denga seh i pengadilen. Sabap adi nggo seh i pengadilen iendeskenna me kam man hakim, jenari iendesken hakim kam man polisi. Kenca bage itamaken polisi kam ku bas penjara.

26Adi kam i bas penjara, lanai kam ipulahina adi langa kin bali utangndu e kerina."

Kerna erlua-lua

27"Nggo ietehndu maka lit ikataken, 'Ola erlua-lua.'

28Tapi genduari Kukataken man bandu: Ise mpernehen sekalak diberu, jenari hilo kerincuhna nandangi diberu e, si tuhuna ia nggo erlua-lua i bas ukurna.

29Dage, adi matandu si kemuhen erbahanca kam erdosa, cungkillah e jenari ambekkenlah! Sabap ulin sembelah badanndu e bene asa kerina iambekken ku bas neraka.

30Adi tanndu si kemuhen erbahanca kam erdosa, keretlah e jenari ambekken! Sabap ulin bene sada tanndu asa kerina badanndu iambekken ku bas neraka."

Kerna ngulihken ndehara (Mat 19:9; Mrk 10:11-12; Luk 16:18)

31"Lit ka pengajaren bagenda, 'Ise ngulihken ndeharana, arus ibahanna surat mulih man ndeharana!'

32Tapi genduari Kukataken man bandu: Ise ngulihken ndeharana labo erdandanken ndeharana e erlua-lua ras kalak si deban, ia si erbahanca ndeharana e erlua-lua adi sereh ia man kalak si deban, janah ji ngempoi diberu e pe erlua-lua."

Kerna ersumpah

33"Nggo pe ietehndu maka i bas nini-nininta nai lit pengajaren bagenda, 'Ola ersumpah kerna si la tuhu, tapi bahanlah kai si nggo isumpahkenndu i lebe-lebe Tuhan.'

34Tapi genduari Kukataken man bandu: Ola ersumpah kerna kai-kai pe, ula ersumpah i bas gelar langit, sabap langit kap ingan kundul Dibata;

35ola ersumpah i bas gelar doni, sabap doni kap ingan NaheNa; bage pe ula ersumpah i bas gelar Jerusalem, sabap Jerusalem kuta Raja Simbelin kap.

36I bas gelar takalndu pe ola kam ersumpah, sabap labo kam erkuasa nalihken selambar buk pe jadi mbentar ntah mbiring.

37Katakenlah, 'ue' adi tuhu janah katakenlah, 'lang' adi la tuhu. Lain asangken si e i bas Iblis nari kap rehna."

Kerna erbalas (Luk 6:29-30)

38"Nggo ietehndu maka nai lit bagenda pengajaren, 'Mata gancih mata, janah ipen gancih ipen.'

39Tapi genduari Kukataken man bandu: Ula erbalas nandangi kalak si nggo ersalah man bandu. Adi iparap kalak kurumndu si kemuhen, bereken parapna kurumndu si kawes.

40Janah adi iaduken kalak kam erkiteken morah atena bajundu, bereken pe ras cabinndu man bana.

41Adi ipaksa kalak kam maba barangna sada kilometer dauhna, babalah barang e dua kilometer dauhna.

42Adi mindo kalak man bandu berekenlah; bage pe ola tulak adi kalak minjam kai-kai pe man bandu."

Ngkelengi imbang-imbang (Luk 6:27-28, 32-36)

43"Nggo pe ietehndu kerna ajaren enda, 'Kelengilah temanndu, janah elem-elemlah man imbang-imbangndu.'

44Tapi genduari Kukataken man bandu: Kelengilah imbang-imbangndu, janah ertotolah man Dibata kerna kalak si erbahanca kam ngenanami kiniseran.

45Alu bage kam nggo jadi anak-anak Dibata. Sabap labo saja man kalak si mehuli ibereken Dibata MatawariNa, tapi pe man kalak si jahat. Bage pe labo saja man kalak si bujur ibereken Dibata udan, tapi pe man kalak si la bujur.

46Sabap adi si ngkelengi kam saja ngenca ikelengindu, man kade Dibata mbalas perbahanenndu e? La kin kalak si muat cuke pe bage ka nge perbahanenna?

47Janah kai kin lainna kam ras kalak si deban adi ras temanndu saja ngenca kam siperkuanen? Kalak si la nandai Tuhan pe bage nge perbahanenna.

48Emaka kam arus serta bagi Dibatandu pe serta."



 <<  Matius 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran