Lagu langkah si macik i Israel
1Cilaka kal tuhu! Aku desken sekalak si kelihen si la ndat buah pangan i bas kayu tah pe buah anggur i bas batangna. Kerina buah anggur ras buah ara si entebu nggo iperani.
2Lanai lit sekalak pe si bujur i bas negeri e, la lit si patuh man Dibata. Sekalak-sekalak nimai kesempaten lako munuh. Sekalak-sekalak ngelis-ngelis seninana si sada bangsa.
3Kerina ia cerdik ngelakoken kejahaten. Pegawai-pegawai ras hakim-hakim mindo sogok. Kalak si erkuasa nuriken sura-surana man bana, emaka ras-ras ia erbahan pertakin.
4Subuk si mehulina ras si bujurna kal pe i bas ia bali la terpakena ras peren si erduri. Warina nggo reh Dibata ngukum bangsa e, sue ras si nggo PersingetiNa arah nabi-nabi. Genduari gulut akapna kerina.
5Ula kam tek man temanndu sibalengen, ula kam ernalem man temanndu. Metenget kam kerna kai si ikatakenndu subuk man ndeharandu pe.
6Anak dilaki, motu akapna bapana, anak diberu isimbakna nandena, permain rubat ras bibina; musuhna eme si sada jabu ras ia.
7Tapi adi aku kuperdiateken TUHAN; alu ukur tetap kutimai si ngkelini aku. Ibegiken Dibatangku nge aku.
Ikelini TUHAN nge BangsaNa
8O musuh-musuh kami, ula kam ermeriah ukur ngenehen nasip kami. Tuhu nggo jongkang kami, tapi keke ka nge kami mulihi. Genduari kami i bas gelap, tapi ibereken TUHAN ka nge pagi man kami terang.
9Nggo kami erdosa man TUHAN, emaka genduari arus igengken kami pernembeh AteNa kentisik. Tapi kedungenna IbelaNa nge kami, dingen IberekenNa keadilen man kami. IbabaNa kami ku bas terang; iidah kami me kuga PengkelengiNa kami.
10Kenca bage iidah musuh-musuh kami me si e, emaka mela iakapna, musuh si ngatakenca mbarenda nina, "I ja kin TUHAN Dibatandu?" Iidah kami me ia italuken, iperjaki desken kubang i bas dalan.
11O kalak Jerusalem, reh me paksana majekken tembokndu mulihi. Tupung paksa e pagi daerahndu ipebelangi.
12Bangsandu mulih pagi ku kam i ja nari pe; i Assur nari arah Timur, i Mesir nari i Selatan, i bas daerah-daerah Lau Eprat nari, i lepar lawit nari ras i deleng-deleng nari.
13Tapi doni jadi gurun pasir pagi erkite-kiteken kejahaten kalak si ringan i je.
Lias ate TUHAN man Israel
14Permakanilah BangsaNdu, o TUHAN, bangsa si nggo IpilihNdu, si ringan serap-serap i bas kerangen, i tengah-tengah taneh si mehumur. Berelah ia nggagat i Basan ras i Gileat, bali ras si nai.
15Cidahkenlah tanda KuasaNdu man kami, o TUHAN, bagi si IbahanNdu tupung ItaruhkenNdu kami ndarat i Mesir nari.
16Bangsa-bangsa ngidahsa, janah mela iakapna, aminna pe ia megegeh. Itutupna babahna alu tanna, dingen pasek cupingna.
17Njoler ia i bas abu desken nipe, reh ia i bas benteng-bentengna nari alu nggirgir dingen mbiar. Alu gentar reh ia ndahi TUHAN Dibatanta.
18La lit dibata si deban bagi Kam, o TUHAN; IaleminNdu dosa-dosa BangsaNdu si tading denga. La Kam nembeh rasa lalap, tapi meriah UkurNdu encidahken KekelengenNdu si tetap man kami.
19Mekuah ka AteNdu mulihi kempak kami. Dosa-dosa kami IperjakiNdu, jenari IambekkenNdu ku teruh lawit si mbages!
20IcidahkenNdu KekelengenNdu si tetap ras UkurNdu si la mobah-obah man BangsaNdu, kesusuren Abraham ras kesusuren Jakup, sue ras si nggo IjanjikenNdu alu sumpah i bas paksa si nai nari.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel