Kerna ngulihken ndehara (Mat 19:1-12; Luk 16:18)
1Kenca bage itadingken Jesus ingan ndai, lawes Ia ku taneh Judea, ras ku lepar Lau Jordan. I bas ingan e pe nterem jelma reh ndahi Ia. Janah bagi si nggona, iajari Jesus ka jelma si nterem e.
2Reh piga-piga kalak Parisi atena ncubai Jesus. Isungkunna Jesus nina, "Rikutken Undang-undang agamanta, banci kin sekalak perbulangen ngulihken ndeharana? Katakenlah man kami!"
3Ijabap Jesus alu penungkunen ka nina, "Undang-undang si kuga kin nggo ibereken Musa man bandu?"
4Ngaloi kalak ndai nina, "Adi Musa iberena sekalak dilaki ngulihken ndeharana alu erbahan surat mulih."
5Nina Jesus man kalak ndai, "Perbahan kam la terajarken, emaka isuratken Musa Undang-undang e man bandu.
6Tapi mula-mulana ijadiken doni enda, i je pe nggo me ikataken, 'Dibata njadiken manusia dilaki ras diberu.
7Emaka sekalak dilaki arus nadingken nande bapana, ersada ras ndeharana,
8janah si dua kalak enda nggo jadi sada.' Emaka lanai bo ia dua tapi sada nge.
9E me sabapna si nggo ipersadaken Dibata, lanai banci isirangken manusia."
10Kenca Jesus ras ajar-AjarNa nggo ka seh i rumah, isungkun ajar-ajar Ia kerna si IkatakenNa ndai.
11Nina Jesus man ajar-AjarNa, "Kalak si ngulihken ndeharana, jenari erjabu ka ia ras diberu si deban, dilaki ndai erlua-lua nandangi ndeharana e.
12Bage pe sekalak ndehara si nadingken perbulangenna, janah erjabu ka ia ras dilaki si deban, ia pe erlua-lua nge."
Ipasu-pasu Jesus anak-anak (Mat 19:13-15; Luk 18:15-17)
13Lit me piga-piga kalak maba anak-anak man Jesus. Atena gelah anak-anak e ipasu-pasu Jesus, tapi merawa ajar-AjarNa man kalak ndai.
14Sanga idah Jesus e, merawa Ia man ajar-AjarNa nina, "Pelepas anak-anak e reh ndahi Aku, ola ambati ia, sabap kalak si bage nge kap empuna Kinirajan Dibata.
15Ingetlah katangKu enda! Ise si la nggit ngaloken Kinirajan Dibata bagi sekalak anak-anak, kalak si bage labo pagi bengket ku bas Kinirajan Dibata e."
16Jenari IdakepNa anak-anak e sekalak-sekalak, ItamakenNa TanNa ku babona janah ipasu-PasuNa.
Kalak bayak (Mat 19:16-30; Luk 18:18-30)
17Asum berkat ka Jesus nerusken PerdalanenNa, reh me sekalak dilaki kiam-kiam njumpai Ia. Erjimpuh ia i lebe-lebe Jesus jenari nina, "O Guru si bujur, kai nge ndia arus kubahan maka kudat kegeluhen situhu-tuhu si la erkeri-kerin?"
18Ngaloi Jesus nina, "Ngkai maka ikatakenndu Aku bujur? Ma ise pe labo bujur seakatan Dibata?
19Tentu nggo ietehndu pedah Dibata, 'Ula munuh, ola erlua-lua, ola nangko, ola erbual, ola nipu, mehamat man nande bapandu.'"
20Emaka ngaloi kalak ndai, "O Guru, kerina pedah e nggo kuikutken kitik-kitikku nari."
21Itatap Jesus ka ia janah mekuah AteNa. Emaka nina Jesus man bana, "Sada nari kekurangenndu. Laweslah, dayaken kerina erta-ertandu janah bereken man kalak musil gelah idatndu erta-erta i surga; jenari reh kam, ikutken Aku."
22Kenca ibegina kata Jesus e ceda atena, emaka lawes ia. Berjut ia sabap bayak kal ia.
23Jesus mpernehen ajar-AjarNa jenari nina, "Seh kal serana kalak bayak bengket ku Kinirajan Dibata!"
24Sengget ajar-ajar megi KataNa e, tapi Jesus terus ngerana, "O anakKu, tuhu-tuhu mesera bengket ku Kinirajan Dibata.
25Sukahen sada unta mentas arah lubang jarum asa sekalak bayak bengket ku bas Kinirajan Dibata."
26Reh mamangna ate ajar-ajar, emaka sisungkun-sungkunen ia, nina, "Adi bage ise nari nge banci terkelin?"
27Ipernehen Jesus ajar-AjarNa, jenari nina, "Si enda la banci jadi rikutken pengakap manusia, tapi i bas Dibata banci kap. Sabap kai pe banci nge jadi i bas Dibata."
28Jenari nina Petrus man Jesus, "Adi kami, kerina nggo itadingken kami lako ngikutken Kam!"
29Ngaloi Jesus nina, "Kukataken pe man bandu, maka ise pe si nadingken rumahna, seninana ntah turangna, nandena ntah bapana, anak-anakna ntah juma, erkite-kiteken Aku dingen erkite-kiteken Berita Si Mehuli,
30genduari e pe ialokenna buen asa si ndai. Ialokenna seratus kali lipat: rumah, senina, turang, nande, bapa, anak ras juma, aminna gia mesera akapna erkiteken iayak-ayak kalak janah ialokenna pe pagi kegeluhen si tuhu-tuhu si la erkeri-kerin.
31Nterem kalak si arah lebe genduari jadi arah pudi pagi, janah nterem kalak si arah pudi genduari jadi pagi arah lebe."
Petelu kaliken ituriken Jesus kerna KematenNa (Mat 20:17-19; Luk 18:31-34)
32Jesus ras ajar-AjarNa sangana i bas perdalanen ku Jerusalem. Jesus erdalan arah lebe ajar-ajar. Aru ate ajar-ajar bage pe mbiar kalak si deban si ngikutken Ia arah pudi. Sekali nari idilo Jesus ajar-ajar si sepulu dua jenari IturikenNa kerna kai pagi si jadi man BaNa.
33Nina man ajar-ajar e, "Begikenlah! Genduari kita i bas perdalanen ku Jerusalem. I je me pagi Anak Manusia si isuruh Dibata iendesken man imam-imam si mbelin ras guru-guru agama. Iukumna pe rutang kesah. Bage pe iendeskenna man kalak si la nandai Dibata.
34Kalak si la nandai Dibata e pagi nokoh-nokohi Ia, icidurina, iligasina janah ibunuhna pe Ia. Tapi kenca telu wari nggeluh ka Ia mulihi."
Pemindon Jakup ras Johanes (Mat 20:20-28)
35Reh me anak-anak Sebedeus e me Jakup ras Johanes ndahi Jesus, janah nina, "O Guru, lit pemindon kami man BaNdu, ngarap kami gelah IsehkenNdu."
36Emaka isungkun Jesus ia, "Kai kin atendu si Kubahan man bandu?"
37Erjabap kalak si dua ndai, "Ate kami kami min kundul arah kawes ras KemuhenNdu kune pagi Kam erkuasa i bas KinirajanNdu."
38Tapi nina Jesus man kalak ndai, "La kap ietehndu kai si ipindondu e. Ngasup kin kam minem tare calung kiniseran si arus Kuinem e? Ngasup kin kam iperidiken alu peridin si arus Kualoken e?"
39Erjabap kalak ndai, "Ngasup." Nina ka Jesus man bana, "Payo katandu e; kam pe nandangi minem me tare calung kiniseranKu janah kam iperidiken alu peridin si arus Kualoken.
40Tapi kerna ise kundul arah kawes ras arah kemuhenKu labo Aku metehsa. E pagi ibereken Dibata man kalak si nggo ItentukenNa."
41Sanga ibegi ajar-ajar si sepuluh kalak nari kata e, irawaina Jakup ras Johanes.
42Emaka idilo Jesus ia kerina jenari nina, "Nggo ietehndu maka si iakui jadi pemerentah erkuasa nandangi rakyatna janah peminpin-peminpin rate-rate nandangi bawahenna.
43Tapi i bas kam la banci bage. Ise atena i bas kam jadi mehaga, ia arus jadi si ngelai nandangi kam.
44Ise atena jadi si arah lebe, arus maka ia jadi suruh-suruhen temanna kerina.
45Sabap Anak Manusia si isuruh Dibata reh labo guna ielai, tapi guna ngelai. Janah IendeskenNa KesahNa guna nebusi nterem jelma."
Jesus mpepalem Bartimeus si pentang (Mat 20:29-34; Luk 18:35-43)
46Seh me Jesus ras ajar-AjarNa i Jeriho. Asum Jesus ras ajar-AjarNa bage pe ikut jelma si nterem ndarat i Jeriho nari, lit sekalak pemindo-mindo kundul i tepi dalan. Ia pentang, gelarna Bartimeus anak si Timeus.
47Asum ibegina maka si reh e Jesus kalak Nasaret, erlebuh ia, nina, "O Jesus! Anak Daud! Mekuah min AteNdu aku!"
48Nterem jelma ngelarang ia gelah sinik. Tapi reh gangna ia erlebuh nina, "O Anak Daud! Mekuah min AteNdu aku!"
49Ngadi Jesus erdalan jenari nina, "Dilolah ia ku jenda!" Emaka idilo kalak me si pentang ndai nina, "Malem atendu! Tediskenlah! IdiloNa kam."
50Minter itangtangina cabinna, tedis ia jenari idahina Jesus.
51Isungkun Jesus ia nina, "Kai kin atendu Kubahan man bandu?" Erjabap si pentang ndai, "O Guru, ateku min gelah aku erpengidah mulihi."
52Emaka nina Jesus, "Mulihlah, kinitekenndu erbahanca kam malem." Minter ia erpengidah, emaka ikutkenna Jesus, ras ia erdalan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel