Alkitab Mobile SABDA
[VER] : [KARO]     [PL]  [PB] 
 <<  Markus 9 >> 

1Tole nina Jesus, "Inget katangKu enda! Lit si pulung i jenda, langa mate ope denga idahna Kinirajan Dibata reh alu kuasa."

Jesus ipermuliaken (Mat 17:1-13; Luk 9:28-36)

2Enem wari kenca si ndai Jesus maba Petrus, Jakup ras Johanes ku datas sada deleng si meganjang. I lebe-lebe ajar-AjarNa salih rupa Jesus.

3UisNa mbentar erkilat-kilat. La lit sekalak pe i doni enda si ngasup nucisa seh bage mbentarna.

4Kenca bage idah ajar-ajar si telu kalak ndai nabi Elia ras Musa sangana ercakap-cakap ras Jesus.

5Nina Petrus man Jesus, "O Guru, senang kal i jenda. Ibahan kami saja i jenda telu sapo, sada man BaNdu, sada man Musa janah sada nari man Nabi Elia."

6Enda ikataken Petrus, sabap mbiar ia teluna, lanai ietehna kai si man katanken.

7Jenari reh embun, ilinggemina ia, lit pe sora i bas embun e nari nina, "Enda me AnakKu si Kukelengi, begikenlah Ia!"

8Minter ipernehen ajar-ajar sekelewetna tapi lanai ise pe idahna, seakatan Jesus ras ia teluna.

9Sanga kalak ndai nusur i datas deleng e nari, iperentahken Jesus ajar-AjarNa e nina, "Ola kataken man ise pe kai si nggo iidahndu, ope denga Anak Manusia si isuruh Dibata keke i bas si mate nari."

10Kai si ikataken Jesus ndai ibegiken ajar-ajar, tapi nungkun ia sapih-sapih ia nina, "Kai kin ertina keke i bas si mate nari?"

11Jenari isungkunna Jesus nina, "Ngkai maka ikataken guru-guru agama maka Elia arus leben reh?"

12Erjabap Jesus nina, "Tuhu nge nabi Elia leben reh guna nikapken kerinana. Tapi kuga kin si nggo tersurat kerna Anak Manusia si isuruh Dibata, ma Ia denggo ngenanami mbue kiniseran janah igombang-gombangi kalak?

13Kukataken man bandu maka nabi Elia nggo reh janah ibahan kalak man bana bagi ate-atena, bagi nggo isuratken kerna ia."

Ipepalem Jesus sekalak anak dilaki si setanen (Mat 17:14-21; Luk 9:37-43a)

14Sanga Jesus ras ajar-AjarNa si telu kalak ndai mulihken ndahi ajar-ajar si deban, IdahNa ajar-ajar e ikeleweti jelma si nterem. Piga-piga kalak guru-guru agama sangana ersoal ras ajar-ajar e.

15Kenca idah jelma si nterem Jesus, minter terdejep pusuhna janah kiam ia ngalo-ngalo Jesus.

16Isungkun Jesus ajar-AjarNa nina, "Kai si ipersoalkenndu ras kalak enda?"

17Erjabap sekalak i bas jelma si nterem e nari nina, "O Guru, anakku enda kubaba man BaNdu, sabap iseluki setan ia, seh maka lanai banci ia ngerana.

18Tep-tep kali adi ia iseluki setan e, idampes-dampeskenna bana ku taneh, rugup-ugup babahna, erderik ipenna janah mekeng pe dagingna. Nggo kupindo penampat man ajar-AjarNdu gelah ipelawesna setan e, tapi la ia ngasup."

19Ngaloi Jesus nina man kalak ndai, "O kam kalak si la erkiniteken, asa kai nari dekahna Aku ras kam? Asa kai nari dekahna Aku tahan ras kam? Baba anak e ku jenda."

20Emaka ibaba kalak ndai. Kenca idah setan e Jesus, minter nggirgir anak e, idampes-dampeskenna bana ku taneh, janah rugup-ugup babahna.

21Isungkun Jesus bapa anak e nina, "Asa kai nggo dekahna ia bagenda?" Erjabap bapana, "Kitik-kitikna nari.

22Nggo rusur ia menam mate, sabap megati setan e mbaba ia ku api ras ku bas lau. Emaka mekuah min AteNdu ngenehen kami, sampati min kami adi ngasup Kam."

23"Kai nindu? Adi Aku ngasup?" nina Yesus ngaloi. "Kai pe banci, adi kalak erkiniteken!"

24Minter serko bapa anak ndai nina, "Tek nge aku! Tapi kinitekenku langa cukup. Sampati min aku i bas kinitekenku si kurang."

25Asum idah Jesus maka reh teremna jelma si pulung, emaka IsergangiNa setan e nina, "O setan, si erbahanca kalak pasek ras pekak, ndaratlah i bas anak e, janah olanai bengketi ia!"

26Emaka nderkuh setan e idampes-dampeskenna anak e, jenari ndarat ia. Ndarat setan e emaka anak ndai nggo bali ras mait, seh maka nterem pe kalak ngatakenca maka ia nggo mate.

27Tapi ijemak Jesus anak ndai, IpekekeNa jenari minter ia tedis.

28Kenca Jesus i rumah, sanga Ia ngenca i je ras ajar-AjarNa, nungkun ajar-ajar man BaNa nina, "Ngkai maka la kami ngasup pelawes setan e?"

29Erjabap Jesus, "Alu ertoto (ras erpuasa) ngenca maka terpelawes setan bagi si ndai."

Pedua kaliken ituriken Jesus kerna KematenNa (Mat 17:22-23; Luk 9:43b; Luk 9:44-45)

30Emaka itadingken Jesus ras ajar-AjarNa ingan e, janah berkat ia kempak Galilea. La ate Jesus ieteh ise pe i ja Ia ringan,

31sabap Ia sangana ngajari ajar-AjarNa. Nina man ajar-AjarNa, "Anak Manusia si isuruh Dibata iendesken pagi ku bas kuasa manusia, ibunuh manusia pe Ia; tapi kenca telu wari, mulihi Ia nggeluh."

32La ierti ajar-ajar kerna kata enda, tapi mbiar ia nungkun Jesus.

Ise si mbelinna? (Mat 18:1-5; Luk 9:46-48)

33Seh me Jesus ras ajar-AjarNa i Kapernaum. Kenca seh i rumah isungkun Jesus ajar-AjarNa nina, "Kai si ipersoalkenndu i tengah dalan ndai?"

34Tapi ajar-ajar sinik saja, sabap i tengah dalan ndai ersoal ia sapih-sapih ia kerna ise si mbelinna i bas ia.

35Emaka kundul Jesus, idilona ajar-AjarNa si sepulu dua kalak. Nina man ajar-AjarNa, "Ise atena jadi si arah lebe, arus maka ia arah pudi janah ia pe si ngelai kerinana."

36Jenari idilo Jesus sekalak danak-danak janah ipetedisna i lebe-lebe ajar-ajar. IangkipNa anak e janah nina,

37"Ise si ngaloken danak-danak si bagenda i bas gelarKu, ia kap si ngaloken Aku. Janah ise si ngaloken Aku, labo Aku saja si ialokenna tapi ialokenna pe si nuruh Aku."

Ise si la ngelawan kita temanta kap (Luk 9:49-50)

38Nina Johanes man Jesus, "O Guru, lit idah kami sekalak mpelawes setan i bas GelarNdu. Perbahan labo ia masuk terpukta, emaka ilarang kami."

39Ngaloi Jesus, "Ola ambati ia! Sabap labo lit sekalak pe si erbahan tanda sengget i bas gelarKu, jenari terus ibelaskenna cakap si jahat kerna Aku.

40Sabap ise la ngelawan kita, temanta kap.

41Ingetlah! Ise pe si mereken lau inemen man bandu erkiteken kam pengikut Kristus, tentu ia dat upah."

Si erbahanca erdosa (Mat 18:6-9; Luk 17:1-2)

42"Ntah ise gia si erbahanca maka sekalak jelma lanai erkiniteken man bangKu, ulin irakutken batu penggilingen ku kerahungna, jenari igedapken ia ku bas lawit.

43Bage pe adi tanndu erbahanca kam erdosa, tekteklah e. Sabap ulin kam nggeluh alu sada tan asangken dua tanndu, tapi ku neraka kam, ku api si la ernimpet-nimpet.

44(I je bernga si ngkarati ia la ermate-mate, janah api la ernimpet-nimpet!)

45Adi nahendu erbahanca kam erdosa, keretlah e. Sabap ulin kam nggeluh alu sada nahe asangken dua nahendu tapi kam ku neraka.

46(I je bernga si ngkarati ia la ermate-mate, janah api la ernimpet-nimpet!)

47Janah adi matandu erbahanca kam erdosa, cungkillah matandu e, sabap ulin kam alu sada mata bengket ku bas Kinirajan Dibata asangken dua matandu tapi kam iambekken ku neraka.

48I je bernga si ngkarati ia la ermate-mate janah api la ernimpet-nimpet!

49Sabap kerina manusia isirai pagi alu api.

50Sira tuhu mbelin gunana, tapi adi sira lanai masin, alu kai kin ibanndu maka banci masin mulihi? Lit min tetap sira i bas kam, janah tetaplah kam erdame sapih-sapih kam i bas geluhndu."



 <<  Markus 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran