Ende-enden kemenangen Daud (2Sam 22:1-51)
1Kata-kata Daud persuruhen Dibata, si iendekenna man TUHAN tupung TUHAN engkelini ia i bas Saul ras musuh-musuh si deban nari.
2Lanai tanggung keleng ateku man BaNdu TUHAN, Kam kap sumbul geluhku.
3TUHAN kap pengawalku, Ia kap bentengku si nteguh, Dibatangku kap si engkelini aku emaka i bas Ia, teneng kap aku. Ia desken ampang-ampang perang si engkawali aku, IjagaNa aku, gelah tetap teneng aku.
4Erlebuh aku kempak TUHAN, jenari IkeliniNa aku i bas musuh-musuhku nari. Pujilah TUHAN!
5Tinali kalak mate ngelileti aku. Galumbang kebenen nggedapken aku.
6Tinali doni kematen nggo ngelilet aku, kuburen nganga bagi siding i adepenku.
7I bas kesusahen erlebuh aku man TUHAN, mindo penampat kulebuh Dibatangku. I bas kemah si Badia nari IbegikenNa sorangku, perserkongku seh kempak Dibatangku.
8Emaka mugur-ugur dingen nggirgir doni enda; palas deleng-deleng kumeter mundu-undu erkiteken rawa Dibata.
9Asap erdipul arah lubang IgungNa, api ras rara ndaraten arah BabahNa.
10IcaingkenNa langit, jenari nusur Ia, embun mbiring lit i teruh NaheNa.
11Kabang Ia ngersak mahluk erkabeng; i datas kabeng angin erdalan Ia.
12Itamburina BaNa alu kegelapen, embun mekapal dem udan meder engkeleweti Ia.
13Baho ras rara api ndarat iher kilap i adep-AdepenNa nari, itembusna embun si gelap e.
14Kenca bage erlenggur TUHAN i langit nari; terbegi sora Dibata si Meganjangna.
15IpanahkenNa panahna marpar imbang-ImbangNa, tupung reh perkas ngerbul ia kerina.
16Kelbung lawit talang, palas doni lanai ketamburen, tupung IsergangNdu o TUHAN ImbangNdu alu RawaNdu.
17Idadaken TUHAN TanNa bangku i datas nari, i bas lau si mbages nari IrintakNa aku ku das.
18IpulahiNa aku i bas musuhku si megegeh nari, i bas kerina kalak si ernembeh ate man bangku. Ndauh ia gegehen asangken aku.
19Tupung aku i bas kiniseran iserang musuh aku, tapi ikawali TUHAN aku.
20IsampatiNa aku maka pulah i bas bahaya nari, IkeliniNa aku erkiteken keleng AteNa.
21TUHAN mereken upah si mehuli bangku, sabap kulakoken si bujur, ipasu-PasuNa aku erkiteken la kubahan salah.
22Nggo kuikutken Undang-undang TUHAN Dibatangku la pernah kutundalken.
23Kerina Undang-UndangNa kuperdiateken, kerina PerentahNa la kusilahken.
24IetehNa maka la aku erdalan arah si lepak dingen kujaga diringku gelah la erbahan salah.
25Perbahan kulakoken si bujur, IberekenNa upah si mehuli man bangku IetehNa maka la lit kubahan kesalahen.
26O TUHAN, Kam bujur kempak kalak si tutus man BanNdu, KiniulinNdu serta man kalak si serta.
27Kempak kalak si badia, badia PerbahanenNdu, tapi kalak jahat ImusuhiNdu.
28IkeliniNdu si meteruk ukur, tapi IpeterukNdu kalak megombang.
29O TUHAN IberekenNdu bangku SinalsalNdu, IlesapkenNdu kegelapenku.
30Kam mereken gegeh man bangku naluken musuh-musuhku. Kam mere kuasa bangku ngkuasai benteng-bentengna.
31Perbahanen Dibata serta, padan TUHAN terarapken kap. Ia desken ampang-ampang perang, man kalak si ernalem man BaNa.
32Sabap la lit Dibata seakatan TUHAN, Dibata ngenca benteng kami.
33Ia me Dibata si erbahanca aku megegeh, si erbahanca maka i bas dalanku la lit kebiaren.
34Ipegegehina nahengku bagi nahe belkih, ipedauhna kebiarenku i das deleng-deleng.
35IberekenNa bangku pelajaren perang, emaka panah si megegehna pe banci kupake.
36O TUHAN perbahan IkawaliNdu aku, ka terkelin; aku sabap KuasaNdu, aku jadi kalak si mehamat.
37IjagaNdu aku maka la tertaban, IkawaliNdu maka la aku guling.
38Kuelis imbang-imbangku dingen talu kubahan, adi langa ia kernep kerina langa kungadiken.
39Kudampesken ia kerina keke pe lanai banci, ampar ia i teruh nahengku.
40IberekenNdu bangku gegeh erperang, IberekenNdu aku naluken imbang-imbangku seh menang.
41IbahanNdu maka kiam musuh i adep-adepenku nari, kalak si ernembeh ate bangku kukernepken kerina.
42Serko ia mindo penampat, tapi la lit si nampati, erlebuh ia man TUHAN tapi ia IaloiNa.
43Kututu ia maka bali ras abu iembus angin, kudedehi ia maka bali ras kubang i duru dalan.
44IpulahiNdu aku i bas bangsa-bangsa si perubat-rubat nari, IjadikenNdu aku jadi raja man bangsa-bangsa, bangsa si la kin pernah kutandai jadi rayatku.
45Bangsa si deban nembah i adep-adepenku, tupung ibegina gelarku mis ia patuh.
46Nggo bene ukurna, alu nggirgir ndarat ia i bas bentengna nari.
47TUHAN nggeluh kap! Pujilah Penampatku! Beritakenlah kemulian Dibata si nelamatken aku.
48IberekenNa bangku kemenangen naluken musuh-musuhku, ItalukenNa bangsa-bangsa i teruh kuasangku.
49Aku ikelini TUHAN i bas musuh ras kalak jahat nari, dingen iberekenna kemenangen naluken imbangku.
50Emaka kupuji TUHAN i tengah bangsa-bangsa, kuendeken ende-enden pujin man BaNa. <18:51> - Dibata mereken kemenangen si mbelin man RajaNa, tetap Ia erkeleng ate man raja PilihenNa, eme Daud ras kesusurenna, seh ku si ndekah-ndekahna.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel