Alkitab Mobile SABDA
[VER] : [KARO]     [PL]  [PB] 
 <<  Mazmur 74 >> 

Pertoton guna kemerdekan bangsa

1Ende-enden Asap. O Dibata, rasa lalap kin kami ItadingkenNdu? Ngkai maka Kam merawa man BangsaNdu?

2Ingetlah bangsa si IpilihNdu ndube, bangsa si IbebaskenNdu gelah jadi BangsaNdu. Ingetlah Deleng Sion, i je kap Kam ringan.

3Dalani min ingan-ingan si nggo iruntuhken musuh, nggo ikernepkenna si nasa lit i bas RumahNdu.

4Imbang-ImbangNdu nggo ersurak i bas RumahNdu, dingen majekken bendera tanda kemenangen i je.

5Desken tukang si nabah batang kayu, itabahna kayu salu kapakna.

6Icedaina kerina ukiren kayu, alu kapak ras martel.

7Icilukna RumahNdu ngadi-ngadi radas, iliamina ingan nembah man BaNdu.

8Atena maka kerina kami italukenna, jenari icilukina kerina ingan persembahen i negeri enda.

9Nabi-nabi ras tanda kuasa lanai nari lit, sekalak pe la lit si meteh ndigan enda ngadina.

10Ngayak ndigan, o Dibata, MusuhNdu nawai Kam? Rasa lalap kin ia nggombangi GelarNdu?

11Ngkai maka la kami IsampatiNdu? Ngkai maka IpelepasNdu saja kami?

12Kam kap raja kami nai-nai nari, nggo rusur IkeliniNdu kami, o Dibata.

13ItakaNdu lawit alu KuasaNdu nganga lawit IpekpekNdu takalna seh pecah.

14Takal Lewiatan iperperken Kam, IjadikenNdu ia jadi pangan rubia-rubia kerangen.

15Kam erbahanca maka turah ulu lau ras maler lau mbelin, IkerahiNdu lau si la pernah kerah.

16Kam njadikenca suari ras berngi, netapkenca ingan matawari ras bulan.

17Baleng-baleng doni enda ItentukenNdu, IjadikenNdu paksa perlego ras perudan.

18O TUHAN, inget min uga Kam pencekuraki musuh-musuh e, bangsa si la erdibata naling-naling GelarNdu.

19Ula EndeskenNdu BangsaNdu si la ergegeh e ku bas tan kalak si kejam. Ula min kami asa lalap IlupakenNdu, BangsaNdu si musil-musil.

20Inget min perpadanen si IbahanNdu man kami, sabap i bas tep-tep ingan si gelap i bas negeri enda, i je kalak ngelakoken si jahat.

21Ula pelepas mela iakap kalak si tertindih, gelah kalak musil ras mesera muji Kam.

22Kekeken o Dibata, bela min PerkaraNdu sabap gedang-gedang wari Kam icekuraki kalak, si la erdibata.

23Ula min kam lupa sora ImbangNdu si megombang e, sabap reh gejekna ibahanna lalap.



 <<  Mazmur 74 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran