Nehemia naluken kalak si ngelawan pendahinna
1Kenca Sanballat megi maka kami kalak Jahudi nggo mulai majekken tembok e mulihi, merawa kal atena janah iuru-uruna kami.
2I lebe-lebe teman-temanna ras tentera Samaria nina, "Kai ka kin si ibahani kalak Jahudi si la ergegeh enda? Ipajekkenna ka kin atena mulihi kota e? Banci kin akapna arah mpersembahken persembahen ndungi dahin e i bas sada wari? Banci kin ibahanna gedung batu i bas sampah-sampah si nggo meseng nari?"
3Tobia si sangana tedis deherken ia pe ngerana nina, "Kai pe ibahanna labo tuhu! Biang pe lompat ku das minter nge meruntuh tembokna ah!"
4Emaka ertoto aku ningku, "O, Dibata kami, begikenlah uga penguru-nguruna kami. Bahanlah maka penaling-nalingna e ndabuh mulihi ku takalna. Pelepaslah maka kasa sikerajangenna keri irampasi kalak, janah bahanlah maka ia ibuang ku negeri si deban.
5Ula alemi kejahatenna janah ula lupaken dosa-dosana, sabap nggo megombang ia man kami si sangana mbangun."
6Dage iterusken kami me pekena tembok e, janah lanai ndekahsa nggo dung setengah asa ganjangna, sabap ergiah-giah ukur bangsa e erdahin.
7Kenca Sanballat, Tobia, bage pe kalak Arab, kalak Amon, ras kalak Asdot megi maka dahin kami pekena tembok Jerusalem terus erdalan alu mehuli, janah bagin-bagin tembok si rontas pe nggo itutupi, emaka merawa kal atena.
8Emaka erpekat ia kerina lako nerang Jerusalem gelah guntar,
9tapi ertoto kami man Dibata janah isuruh kami kalak gelah tetap erjaga-jaga suari ras berngi nandangi kalak ndai.
10I bas kalak Juda lit sada ende-enden bagenda: "Nggo ngelabuh kita ngangkati baban si mberat; janah melala denga kal batu si man pindahenken. Uga denga ninta majekken tembok e?"
11Iakap musuh maka labo kami erpemeteh, janah labo idah kami ia ope denga ia seh i tengah-tengah kami lako munuhi kami dingen pengadi dahin e.
12I bas paksa ku paksa kalak Jahudi si ringan i tengah musuh-musuh kami reh mpersingeti kami kerna rencana musuh-musuh e ngelawan kami.
13Erkiteken si e kusuruh bangsa e erpedang, erlembing, ras erpanah, janah kusuruh ia erjaga rikutken terpuk-terpukna arah pudi tembok si langa dung.
14Kuidah maka bangsa e mbiar, emaka kukataken man bana kerina ras man peminpin-peminpinna bage pe man pegawai-pegawaina, "Ula kam mbiar man musuh-musuhta. Inget uga belinna ras gegehna Tuhanta, emaka erjuanglah guna senina-seninanta sada bangsa, guna anak-anakndu, ndeharandu ras rumahndu."
15Musuh-musuh kami megi maka nggo tereteh man kami kerna perpekatenna janah sadar ia maka Dibata nggo naluken rencanana. Kenca bage mulih ka kami kerina pekena tembok e.
16Mulai paksa e nari setengah si ras aku erdahin janah setengah nari ka tedis erjaga-jaga erpaken baju besi, dingen erlembing, erampang-ampang, ras erpanah. Peminpin-peminpin kami pegegehi ukur kalak
17si sangana erdahin pekena tembok kota e. Kalak si dahinna ngangkati bahan-bahan bangunen e pe erdahin alu sada tan, janah alu tanna si sada nari njemak senjata.
18Janah kerina tukang batu nggenditken pedang i bas awakna. Kalak si tugasna ngembus terompet tanda bahaya tedis deherken aku.
19Kukataken man bangsa e bage pe man pegawai-pegawaina ras man peminpin-peminpinna ningku, "Dahin e merap tuhu-tuhu i bas sada ingan si mbelang seh maka ndauh kita sirang sada ras si debanna i babo tembok e.
20Emaka adi ibegindu sora terompet, minter kam pulung ku sekelewetku. Dibatanta kap si erperang guna kita."
21Dage tep-tep wari, mulai erpagi-pagi si lampas nari seh teridah bintang i bas bernginna setengah kami erdahin i bas tembok e, janah setengah nari tedis erjaga-jaga alu erlembing.
22Kidekah e kukataken man kalak si ertugas maka ia ras kerina kalak si nampati ia arus erberngi i Jerusalem, gelah banci ikawal kami kota sanga berngi jenari erdahin paksa suari.
23Berngi pe la kutangtangi pakenku, janah bage ka pe ibahan teman-temanku, suruh-suruhenku ras pengawalku. Janah katawari pe sikap ibahan kami senjata kami kerina.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel