Bahanlah si ngena ate kalak si deban
1Kita si megegeh kinitekenta arus nampati kalak si merampek kinitekenna, guna mersan babanna. Ula dirinta ngenca siukuri.
2Tapi sekalak-sekalak kita arus mperdiateken temanta manusia janah ngukuri kai si mereken kiniulin man bana gelah alu bage erteguhna kinitekenna.
3Sabap Kristus pe labo DiriNa saja IukuriNa, bagi lit tersurat i bas Pustaka Si Badia, "Isak-isak kalak si ngisakken Kam nggo ndabuh man bangku."
4Kerina si tersurat i bas Pustaka Si Badia isuratken ngajari kita gelah erpengarapen erkiteken kesabaren ras pergegeh si ibereken Pustaka Si Badia man banta.
5Mbera-mbera Dibata ulu kesabaren ate dingen ulu pergegeh erbahanca ersada ukurndu kerina erdandanken Jesus Kristus jadi usihenndu.
6Gelah kerina kam, alu ersada sora banci muji Dibata, Bapa Tuhanta Jesus Kristus.
Berita Si Mehuli isehken pe man kalak si labo Jahudi
7Bagi Kristus nggo ngaloken kam, kam pe alokenlah temanndu sapih-sapih kam gelah terpuji Dibata.
8Sabap kukataken man bandu maka Kristus nggo erdahin guna kalak Jahudi lako encidahken maka Dibata setia i bas nehken PadanNa man nininta nai.
9Janah gelah kalak si labo Jahudi pe banci muji Dibata erdandanken perkuah AteNa. Bagi lit tersurat i bas Pustaka Si Badia, "Emaka kukataken bujur man BaNdu, i tengah-tengah bangsa-bangsa si deban, rende me aku muji GelarNdu."
10Tole nina, "O kam kalak si labo Jahudi, meriahlah atendu ras bangsa pilihen Dibata."
11Lit ka pe tole tersurat, "Pujilah Tuhan o kam kerina kalak si labo Jahudi; pujilah Ia o kerina bangsa."
12Bage pe nina Nabi Jesaya, "Turah me tunas i bas urat Isai nari, keke me Ia pagi guna merentah kalak si labo Jahudi, janah man BaNa me kalak si labo Jahudi e erpengarapen."
13Dibata sumbul pengarapen, Ialah ndemi kam alu keriahen ras kemalemen ate, erpalasken kinitekenndu man BaNa, gelah erkiteken gegeh Kesah Si Badia reh tambahna pengarapenndu man BaNa.
Sura-sura Paulus si mbelinna eme meritaken Berita Si Mehuli
14O seninang-seninangku, kugejap tuhu-tuhu maka melala kal si mehuli i bas kam. Kam pe dem alu erbage-bage pemeteh maka kam ngasup siajar-ajaren.
15Tapi i bas surat enda nggo kusuratken piga-piga persoalen man bandu alu terus terang gelah mpersingeti kam mulihken. Pang aku nurutkenca erdandanken lias ate Dibata si nggo IberekenNa man bangku.
16Lias AteNa e nggo ngangkat aku jadi pejabat Kristus Jesus guna kalak si labo Jahudi. Aku erdahin selaku imam si meritaken Berita Si Mehuli si rehna i bas Dibata nari, gelah kalak si labo Jahudi e banci desken sada persembahen si ngena ate Dibata si ikhususken Kesah Si Badia man Dibata.
17Dage megah kuakap i bas persadanku ras Jesus Kristus erkiteken pendahinku guna Dibata.
18Kai si ibahan Kristus arah aku, e ngenca aku pang ngatakenca, eme mabai kalak si labo Jahudi e patuh man Dibata. Patuh ia man Dibata arah kata si kubelasken ras arah perbahanen si kubahan.
19Arah gegeh tanda-tanda sengget si mbelin, bage pe arah gegeh Kesah Si Badia. Bage me i bas aku niari daerah-daerah mulai i Jerusalem nari seh ku propinsi Iliria nggo serser kuberitaken Berita Si Mehuli kerna Kristus.
20Sura-surangku si mbelinna eme meritaken Berita Si Mehuli ku ingan i ja langa pernah ibegi kalak kerna gelar Kristus, gelah ula aku tempa-tempa majekken rumah i babo palas si nggo ipajekken kalak si deban.
21Bagi lit tersurat i bas Pustaka Si Badia, "Kalak si man bana langa iberitaken kerna Ia, idahna me pagi, janah kalak si langa pernah megi, iangkana me pagi."
Paulus ersura-sura ku Roma
22Eme sabapna maka lit rusur abatna man bangku guna reh ndahi kam.
23Tapi genduari nggo dung dahinku i daerah-daerah enda. Janah erkiteken nggo piga-piga tahun dekahna aku ersura-sura ndahi kam,
24ngarap aku maka i bas perdalanenku ku Sepanyol denggo banci aku singgah dingen jumpa ras kam. Janah ateku isampatindu aku i bas perdalanenku ku jah kenca kita ras piga-piga dekah.
25Tapi genduari lawes aku ku Jerusalem guna naruhken penampat man perpulungen si i jah.
26Sabap perpulungen-perpulungen si lit i Propinsi Makedoni ras Akaya nggo ersada arih mereken penampat guna nampati si musil i tengah-tengah perpulungen i Jerusalem.
27Si enda itetapkenna alu ukurna meriah. Janah si tuhuna rutang nge ia nampati kalak si musil e, sabap adi kalak si labo Jahudi e nggo ngaloken keperlun pertendinna i bas kalak Jahudi nari, rutang pe ia nampati kalak Jahudi e alu mereken keperlun kula si tep-tep wari.
28Kenca dung dahinku enda, janah kenca kuendesken buah kiniteken enda man bana, berkat me aku ku Sepanyol, janah i bas perdalanenku ku jah singgah aku i jena.
29Tek aku maka sanga aku reh pagi ndahi kam, dem pagi kubaba pasu-pasu si rehna i bas Kristus nari.
30O senina-seninangku, erdandanken Tuhan Jesus Kristus dingen erdandanken kekelengen si nggo ibereken Kesah Dibata man banta, kupindo man bandu maka ras-ras min kita ertoto man Dibata alu tutus ate guna aku.
31Ertotolah kita gelah aku terkelin i bas bahaya si rehna i bas kalak Judea si la tek man Jesus Kristus, janah anak-anak Dibata si Jerusalem ermeriah ukur ngaloken pendahinku man bana.
32Janah adi bage ate Dibata, reh me aku ndahi kam alu dem keriahen, gelah arah kerehenku e kita ras-ras pekesahken alu senang.
33Dibata sumbul kemalemen ate man banta, nemani kam kerina gelah! Amin.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel