Alkitab Mobile SABDA
[VER] : [KARO]     [PL]  [PB] 
 <<  Yakobus 1 >> 

1Surat enda i bas aku nari, Jakup, persuruhen Dibata ras Tuhan Jesus Kristus. Mejuah-juah man bandu kerina anak-anak Dibata si merap i taneh perlajangen.

Kiniteken dingen kepentaren

2O senina-seninangku, sangap min iakapndu bandu adi reh erbage-bage percuban ngkenai kami.

3Sabap ietehndu adi kinitekenndu tetap tahan ngalaken percuban-percuban e, kam jadi kalak megenggeng.

4Tetaplah kam megenggeng seh kinigenggengenndu serta, maka kam dewasa i bas kai-kai pe, dingen la kekurangen.

5Tapi adi lit i bas kam si kurang kepentarenna, ertotolah ia man Dibata si mereken kepentaren man bandu. Sabap Dibata kap mereken kepentaren man kerina jelma alu melumbar dingen dem perkuah ate.

6Tapi ertoto arus tek, ula monce-once. Kalak si monce-once bali kap ras gelumbang i lawit si ibentuken angin ku jah ku jenda.

7Kalak si bage ertupang ukurna; la ia ngasup muat keputusen i bas kerina si ibahanna. Emaka la pada iarapkenna ndatken kai pe i bas Tuhan nari.

8(Yak 1:7)

Kemusilen dingen kebayaken

9Megahlah iakap kalak musil adi ipeganjangken,

10bage pe megahlah iakap kalak bayak adi ipeteruk. Sabap kalak bayak kernep me pagi bagi bunga dukut.

11Asum matawari reh ganjangna, wari pe reh lasna, melus dukut e, emaka nartar bungana janah bene pe jilena. Bage me pe kalak bayak, kernep me sanga ndahiken dahinna.

Ujin dingen percuban

12Malem me ate kalak si megenggeng sanga ikenai erbage-bage percuban. Sabap kenca menang i bas percuban e, ialokenna me ulih kemenangenna, e me kegeluhen si nggo ipadanken Dibata man kalak si ngkelengi Dibata.

13Adi lit kalak ikenai percuban, ula min nina, "Percuban enda rehna i bas Dibata nari." Sabap Dibata la banci icubai si jahat, janah ise pe labo icubai Dibata.

14Tapi kalak kena percuban adi ia tergoda jenari kena siding sura-surana si jahat.

15Janah adi sura-surana si jahat e ipejangjang, tubuh me dosa. Adi dosa e nggo ilakoken, buahna e me kematen.

16Ula kam tertipu o senina-senina si kukelengi!

17Kerina pemere si mehuli ras serta rehna i Surga nari; pemere e ipesusur Dibata, si njadiken kerina si ersinalsal i langit. Dibata tetap nge; labo Ia erdauhna i bas kita nari seh maka ItadingkenNa awih-awih si gelap i sekelewetta.

18Rikutken PeratenNa kita nggo IpekuanakNa arah KataNa si tuhu-tuhu, gelah kita si meganjangna i bas kerina si IjadikenNa.

Megi dingen ndalankenca

19O senina-seninangku, ingetlah! Kerina arus metinggel, tapi ula minter ngerana, dingen ula sukah merawa.

20Rawa manusia labo ngasup erbahan si mehuli si ngena ate Dibata.

21Emaka pedauhlah i bas kam nari kebiasan-kebiasan si melket ras lagu langkah si jahat. Alokenlah alu meteruk ukur kata si isuanken Dibata i bas pusuhndu, sabap kata e ngasup nelamatken kam.

22Ula tipu bandu alu megi-megi KataNa saja, tapi dalankenlah kai si iajarken Kata e.

23Kalak si megi Kata e tapi la idalankenna, bali me ia ras kalak si ercurmin, janah idahna uga rupana jine.

24Ipepayona dirina, jenari lawes ia, janah minter lupa ia kuga rupana.

25Kalak si mperdiateken pedah Dibata alu mehuli, si terus mpergermetkenca, si la megi-megi saja, kalak si bage ipasu-pasu Dibata i bas kerina pendahinna. Sabap pedah Dibata e serta kap dingen ngasup mbebasken manusia.

26Ise kin erpengakap maka ia kalak si eragama? Adi la ijagana dilahna sia-sia me ia eragama e, janah itipuna dirina.

27Agama si tuhu-tuhu dingen si mehuli rikutken pengakap Dibata Bapanta e me: pekena-kena anak-anak melumang ras kalak si nggo mbalu si lit i bas kiniseran, bage pe njaga diri gelah ula icedaken doni enda.



 <<  Yakobus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran