Alkitab Mobile SABDA
[VER] : [KARO]     [PL]  [PB] 
 <<  Yohanes 5 >> 

Ipepalem Jesus kalak si penakiten i kolam Betesda

1Jenari mulihken Jesus ku Jerusalem guna ngerayaken wari raya kalak Jahudi.

2I Jerusalem, deherken "Pintu Gerbang Biri-biri," lit sada kolam si igelari Betesda i bas cakap Heber. Kolam e lit lima serambina.

3I bas serambi e nterem kalak si penakiten medem; lit si pentang, lit si cempang bage pe lit si mate serapen. (Itimaina lau e erburak,

4sabap lit paksana lau e erburak ibahan malekat Tuhan si nusur ku bas kolam e. Kalak si tangtangna bengket ku bas kolam e asum launa erburak malem penakitna, amin sakit kai pe ia. Bage me pengakap kalak.)

5Lit pe i je sekalak si nggo telu pulu waluh tahun dekahna ia penakiten.

6Idah Jesus ia ampar i je janah IetehNa maka nggo ndekah ia sakit. Emaka nina Jesus man bana, "Atendu kin gelah malem penakitndu?"

7Ngaloi si penakiten e, "O Tuan, la kap lit kalak si namaken aku ku bas kolam e asum erburak launa; asum kupala-palai ku bas, nggo lit kalak si deban leben asa aku."

8Nina Jesus man bana, "Kekekenlah, angkat amakndu jenari dalanken!"

9Paksa si e pe minter malem penakitna. Iangkatna amakna jenari erdalan ia. Si enda jadi asum wari Sabat kalak Jahudi.

10Emaka nina kalak Jahudi si erkuasa man kalak si nggo malem e, "Wari Sabat kap sekalenda. Rikutken Undang-undangta la banci ibabandu amakndu e."

11Ngaloi ia, "Nina kalak si nggo pepalem aku ndai, 'Angkat amakndu jenari dalanken.'"

12Jenari nungkun kalak Jahudi e, "Ise kin si nuruh kam e?"

13Tapi la itandai kalak si nggo malem e ise si mpepalem ia, sabap nterem kal i je jelma, janah Jesus nggo lawes arah tengah jelma si nterem e.

14La ndekahsa kenca si e, jumpa Jesus ras ia i Rumah Pertoton. Nina Jesus man bana, "Genduari kam nggo malem; olanai bahan si la ngena ate Dibata, gelah ola jadi man bandu keleken asa si nggona."

15Jenari lawes kalak si nggo malem e, iberitakenna man penguasa-penguasa kalak Jahudi maka Jesus kap si mpepalem ia.

16Perbahan si e idarami kalak Jahudi e dalan guna niksa Jesus, sabap ipepalem Jesus kalak si penakiten i bas wari Sabat.

17Tapi nina Jesus man kalak Jahudi e, "BapangKu erdahin kap lalap; emaka Aku pe arus erdahin."

18Megi kata Jesus enda, ergegehna kalak Jahudi ndarami dalan munuh Jesus; sabap iakap kalak Jahudi labo saja undang-undang wari Sabat ilanggar Jesus, tapi ikataken Jesus pe maka Dibata e BapaNa, alu bage ipeseri Jesus bana ras Dibata.

Ituriken Jesus kerna HubungenNa ras Dibata

19Jenari ngerana Jesus man kalak Jahudi e, "Kukataken man bandu: Situhuna kai si ibahan Anak e labo rikutken sura-SuraNa. Kai i IdahNa ibahan BapaNa, e nge si IbahanNa.

20Perbahan Bapa e erkeleng ate nandangi AnakNa, IcidahkenNa man Anak e asa kai si IbahanNa. IcidahkenNa me pe man Anak e si terbeliden, gelah reh mamangna atendu kerina.

21Bagi nggo ipegeluh Dibata mulihi kalak si nggo mate jenari IberekenNa kegeluhen man bana, bage me pe ibereken Anak e kegeluhen man kalak si ndalanken PeratenNa.

22Bapa e labo ngadili ise pe. Tapi kuasa guna ngadili nggo IberekenNa man AnakNa,

23gelah kerina kalak mpehaga Anak e, bagi mpehaga Bapa. Ise la mpehaga Anak e, Bapa si nuruh Anak e pe la ipehagana."

24"Kukataken man bandu maka kalak si megiken katangKu, dingen tek man si nuruh Aku, ialokenna kap kegeluhen si tuhu-tuhu si la erkeri-kerin. Ia lanai iukum tapi nggo pulah i bas kematen nari janah ndatken kegeluhen.

25Kukataken man bandu: Tuhu-tuhu reh me paksana janah nggo seh pe; ibegi si mate me sora Anak Dibata, janah si megisa e nggeluh me.

26Bagi nggo ibereken Bapa kegeluhen man kerina si nasa nggeluh, bage me nggo ibereken Bapa man Anak e kuasa mereken kegeluhen.

27Bage pe ibereken Dibata man Anak e kuasa guna ngadili sabap Anak Manusia e me si isuruh Dibata.

28Ola atendu mamang kerna si enda; sabap reh me paksana maka kerina kalak mate si i bas kuburen megi sora Anak e,

29jenari ndarat me ia kerina i bas kuburen e nari. Kalak si nggo erbahan si mehuli ipekeke guna nggeluh; tapi si jahat perbahanenna ipekeke guna iukum."

30Tole nina Jesus, "Aku la ngasup erbahan kai pe alu gegehKu sisada; Kuadili kalak rikutken perentah Dibata, emaka rembang tengah nge keputusenKu, sabap labo Kubahan bagi ate-ateKu, tapi rikutken peraten si nuruh Aku nge."

31"Adi Aku nurikenca kerna diringKu, la kap teraloken kai si Kuturiken e.

32Tapi lit kap kalak si deban si erberita kerna Aku, janah Kueteh maka kai si iberitakenna e tuhu.

33Nggo isuruhndu persuruhenndu njumpai Johanes, janah nggo ituriken Johanes si tuhuna kerna Aku,

34Aku labo perlu manusia naksiken kerna Aku, tapi Kukataken enda man bandu gelah kam terkelin.

35Johanes bali kap ras lampu si gara dingen ersinalsal, janah nggo meriah ukurndu kentisik ngaloken sinalsalna e.

36Tapi i bas Aku lit saksi belinen asa si isaksiken Johanes, e me: Dahin si Kudahi si ibereken Bapa e man bangKu. Arah dahin si Kudahi, teridah kap maka Dibata nge si nuruh Aku.

37Janah Bapa si nuruh Aku e pe nggo ersaksi kerna Aku. Langa pernah ibegindu SoraNa ntah idahndu AyoNa.

38La ibegindu KataNa, sabap la kam tek man si IsuruhNa.

39Ipelajarindu Pustaka Si Badia sabap iakapndu idatndu me kegeluhen si tuhu-tuhu si la erkeri-kerin i bas Pustaka Si Badia nari. Situhuna Pustaka Si Badia e pe erberita kerna Aku nge!

40Tapi la kam nggit ndahi Aku guna ngaloken kegeluhen e."

41"Labo Kuarapken manusia muji Aku.

42Sabap Kutandai nge kam kerina; Kueteh nge maka i bas ukurndu labo atendu keleng Dibata.

43Aku reh i bas kuasa BapangKu, tapi la Aku ialokenndu. Tapi adi kalak si deban reh i bas kuasana jine ialokenndu ia.

44Perbahan kam ersura-sura gelah ipujiken temanndu manusia, la lit sura-surandu gelah ipujiken Dibata si tuhu-tuhu, emaka la kam banci tek man bangKu.

45Amin bage gia ola iakapndu Aku si ngaduken kam man BapangKu. Tapi Musa si iarap-arapkenndu e nge pagi si ngaduken kam kerina.

46Adi tek kin kam man si Musa, tek nge pe kam man bangKu, sabap Musa pe nuratken kerna Aku nge.

47Tapi adi la kam tek kerna kai si isuratken Musa, emaka la kam tek kerna kai si Kukataken."



 <<  Yohanes 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel