Alkitab Mobile SABDA
[VER] : [MADURA]     [PL]  [PB] 
 <<  1 Raja-raja 10 >> 

1Rato nagara Syeba meyarsa parkara kasohoranna Sulaiman, daddi laju meyos ka Yerusalim ngojiya Sulaiman ban partanya’an se rat-malarat.

2Rato jareya abakta pangereng ce’ bannya’na sarta ta-onta se sarat ebuwa’i palappa, mamatan ban emmas ce’ bannya’na. E bakto apanggi ban Sulaiman, rato jareya nanya’agi partanya’an acem-macem sampe’ ta’ nemmo pole se etanya’agiya.

3Partanya’an jareya esaodi kabbi bi’ Sulaiman, tadha’ se malarat monggu ka salerana.

4Rato Syeba meyarsa dibi’ saapa bicaksanana Sulaiman jareya; ngoladi karaton se epaddek Sulaiman,

5tata lakona ba-ponggaba karaton ban pangangguy saragam sarta ko-bengkona. Rato Syeba ngoladi kakanan se eangka’agi, carana reng-oreng aladine e dhalem pesta, ban ban-kurban se eatorragi Sulaiman e Padalemman Socce. Ngoladi jareya kabbi rato nagara Syeba kasambu’ ban tababeggen.

6Dhabuna rato jareya ka Sulaiman, "Sadaja se ekarasan oreng e nagara kaula parkara panjennengngan sareng kabicaksana’annepon panjennengngan pajat lerres sadaja!

7Dha’-adha’na kaula ta’ parcaja, tape saamponna nyakse’e dibi’ sadajana, samangken kaula ampon yakin. Sanyatana se ecareta’agi oreng ka kaula ta’ napa’ saparona dhari se etengale kaula samangken paneka. Kabicaksana’an sareng kasogiyannepon panjennengngan ngalangkonge dhari se ecareta’agi oreng ka kaula.

8Pojur onggu ji-rajina panjennengngan! Pojur onggu ba-ponggaba se ngabdi ka panjennengngan salanjangnga, daddi kengeng mereng dhari panjennengngan dibi’ sadajana pangajaran se bicaksana!

9Molja onggu PANGERAN, Allahna panjennengngan! Panjennengngan epadaddi rato, ka’dhinto daddi tandha ja’ PANGERAN ce’ leburra ka panjennengngan. Panganeserra PANGERAN ka bangsa Isra’il tadha’ ambuna, kantos panjennengngan epadaddi ratona, sopaja panjennengngan bisa’a alampa’agi hokom sareng kaadilan."

10Saellana jareya rato nagara Syeba ngatorragi le-ollena ka Sulaiman, aropa emmas lebbi dhari pa’ ebu kilo, mamatan ban palappa. Saomorra Sulaiman ta’ tao narema palappa se bannya’na padha ban le-ollena rato nagara Syeba jareya.

11(Pal-kapalla Hiram se ngeba le-olle emmas dhari Ofir kaSulaiman, ngeba keya mamatan ban kaju candhana ce’ bannya’na.

12Kaju jareya bi’ Sulaiman ebadhi ca’-raca’na Padalemman Socce ban karaton kalenggiyanna rato; bariya keya kaangguy calempong ban gambus se eangguya para panyanye. Ju-kaju jareya kaju candhana se paleng bagus se tao epadhateng ka Isra’il; saellana jareya oreng Isra’il ta’ tao nangale’e pole kaju se bagussa kantha jareya.)

13Laen dhari hadiya acem-macem se biyasana eparengngagi bi’ Sulaiman, rato nagara Syeba jareya eparenge keya sabarang apa’a bai menorot pamentana. Saellana jareya rato nagara Syeba gubar ka nagarana ban para pangerengnga.

14Sabban taonna Rato Sulaiman narema emmas se bannya’na para’ tello lekor ebu kilo,

15gi’ ta’ kaetong kaontonganna pardagangan, pajegga para sodagar, to-rato Arab ban nor-gubennor Ira’il.

16Sulaiman abadhi tameng ja-raja dhari emmas tempa’an bannya’na dhu ratos meggi’. Bannya’na emmas se ekagabay sabban settong tameng korang lebbi pettong kilo.

17Laen dhari jareya Sulaiman abadhi keya tameng se akene’an dhari emmas tempa’an keya, bannya’na tello ratos meggi’. Bannya’na emmas se ekagabay sabban settong tameng ra-kera dhu kilo. Meng-tameng jareya esaba’ e mandhapa se anyama Mandhapa Alas Libanon.

18Sulaiman abadhi keya korse karaja’an se raja se ekole’e gaddhingnga gaja ban epasange rarenggan dhari emmas morne.

19Korse jareya epasange lengngen, ban e kangan kacerra epobuwi arcana macan. E budhiyanna korse jareya epasange arcana cethagga sape. Korse jareya ngangguy dhak-ondhak, bannya’na dhak-ondhagga nem-ennem.

20E konco’ kacerra ban e konco’ kanganna sabban ondhak badha arcana macan — kabbi badha dhubellas meggi’. Ta’ tao badha korse karaja’an se kantha jareya e karaton dhimma’a bai.

21Pakakas se eangguy ngenom Sulaiman dhari emmas kabbi, ban pakakas se badha e Mandhapa Alas Libanon dhari emas morne kabbi. Tadha’ se ekagabaya dhari salaka, sabab e jamanna Sulaiman oreng nganggep salaka tadha’ argana.

22Sulaiman kaagungan kapal ja-raja sabannya’na se alajar abareng ban pal-kapalla Rato Hiram. Tello taon sakaleyan pal-kapal jareya abali ngeba emmas, salaka, gaddhing, mothak ban mano’ merrak.

23Rato Sulaiman asogiyan ban abicaksana’an dhari rato se kemma’a bai e dunnya reya.

24Reng-oreng sadunnya padha aehteyar kabbi baramma se tatemmowa ban Sulaiman parlo ngedhingngagiya pangajaranna se bicaksana se eparengngagi Allah ka salerana.

25Reng-oreng jareya dhateng ngeba le-olle bang-sebang ka Sulaiman. Badha se ngeba le-olle rang-barang dhari salaka, emmas, kalambi, sanjata, palappa, jaran ban jaran buwadan. Kantha jareya dhari taon ka taon.

26Sulaiman abadhi angkadan perrang se kadaddiyan dhari saebu pa’ ratos kareta perrang ban dhubellas ebu tantara jaran. Sabagiyan esaba’ e Yerusalim ban lebbina esaba’ e tha-kottha laenna.

27E dhalem jamanna pamarenta’anna Sulaiman, e Yerusalim salaka reya eanggep barang biyasa akantha bato, ban kaju comara Libanon ce’ bannya’na akantha kaju ara biyasa.

28Kalaban parantara’anna pangusaha-pangusahana rato, jaran epadhateng dhari Messer ban Kilikiya,

29ban ta-kareta perrang epadhateng dhari Messer. Argana jaran settong saratos saeket pesse salaka, ban argana kareta perrang nem atos pesse salaka. Saellana jareya kalaban parantara’anna pangusaha-pangusaha jareya keya, ran-jaran ban ta-kareta perrang jareya ejuwal pole ka to-rato Het ban to-rato Siria.



 <<  1 Raja-raja 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel