Alkitab Mobile SABDA
[VER] : [MADURA]     [PL]  [PB] 
 <<  1 Raja-raja 15 >> 

1E taon se kapeng ballu bellas e dhalem pamarenta’anna Rato Yerobeyam e Isra’il, Abiyam jumenneng rato Yehuda

2ban marenta tello taon abidda e Yerusalim. Ebuna iya areya Ma’akha, pottrana Abisalom.

3Abiyam agabay dusa akantha ramana, ta’ esto onggu ka PANGERAN, Guste Allahna, banneyan ban Daud, juju’na.

4Tape, demi Rato Daud, PANGERAN, Allah se esemba Daud, marenge Abiyam pottra lalake’ se aganteya salerana marenta e Yerusalim ban ajaga sopaja kottha jareya ta’ sampe’a gaggar ka moso.

5PANGERAN alampa’agi se kantha jareya polana Daud masenneng panggaliyanna, ban ta’ tao ngenthengngagi papakonna, kajabana e dhalem parkarana Uriya oreng Het rowa.

6Perrang e antarana Rehabeyam ban Yerobeyam se emolae e jamanna Rehabeyam gi’ terros ta’ endha’ ambu saabidda jaman pamarenta’anna Abiyam.

7Careta laenna parkara Abiyam la ecathet e dhalem ketab Sajarana To-rato Yehuda.

8Abiyam seda ban esareyagi e Kottha Daud, ban egante pottrana se anyama Asa.

9E taon se kapeng dhu polo e jaman pamarenta’anna Rato Yerobeyam e Isra’il, Asa jumeneng rato Yehuda.

10Se marenta abidda pa’ polo settong taon e Yerusalim. Agung bine’na iya areya Ma’akha, pottrana Abisalom.

11Padha ban Daud, bangatowana, Asa masenneng panggaliyanna PANGERAN.

12Del-sondellan se atugas e kennengnganna panyemba’an ka diba e man-dhimman epanyengla kabbi, ban la-brahala se ekagabay bi’ to-rato se marenta sabellunna epamosna kabbi dhari saantero nagara.

13Agung bine’na, Ma’akha, epaambu daddi rato ebu, sabab agabay arcana brahala se messom kaangguy Asyera, dewina kalandhuwan Asa magujur brahala jareya, pas eobbar e Cora Kidron.

14Maske ta’ sakabbinna kennengnganna panyemba’anna brahala epaancor bi’ Asa, tape salerana teptep esto ka PANGERAN saomorra.

15Emmas ban salaka se eatorragi ramana ka PANGERAN, ebakta kabbi ka Padalemman Socce, bariya keya emmas ban salaka tor-atorra dibi’.

16Rato Asa dhari Yehuda ban Rato Baesa dhari Isra’il ros-terrosan aperrang saabidda se kadhuwa jareya padha neggu’ kakobasa’an.

17Baesa nyerrang Yehuda ban makoko kottha Rama kaangguy notop jalan kalowar maso’na Yehuda.

18Daddi Rato Asa laju mondhut sakabbinna emmas ban salaka se gi’ badha e Padalemman Socce ban karaton pas ekeremmagi ka Damsyik ka Benhadad rato Siria, pottrana Tabrimon, iya areya bajana Heziyon. Rang-barang jareya epakon aterragi ka om-kaom oreng agung karaton, etoro’e pessen kantha reya,

19"Ngereng sampeyan sareng kaula padha akanca akadi oreng towana sampeyan sareng oreng towa kaula gi’ dhimen. Kaula ngeremmagi emmas sareng salaka menangka tor-ator. Kaula ngarep sampeyan kasokana mapegga’ hubungan sareng Baesa rato Isra’il, sopaja rato Isra’il ka’issa’ narega tantarana dhari dhaera kakobasa’an kaula."

20Benhadad narema pangajagga Asa jareya laju makon ra-parwirana ban tantarana alorok tha-kottha Isra’il. Reng-oreng jareya makala Iyon, Dan, Abel-Bet-Ma’akha ban Kinerot e seddi’na Talaga Galilea sarta saantero baba Naftali.

21E bakto Baesa meyarsa parkara jareya, laju ambu se makoko kottha Rama pas meyos ka Tirza ban kaangguy sabatara bakto ta’ aperrang pole.

22Saellana jareya, reng-oreng sanagara Yehuda ta’ kalaban ele-pele, bi’ Rato Asa epakon ngangko’ bato ban kaju se bi’ Rato Baesa eangguy makoko kottha jareya. Bato ban kaju jareya bi’ Asa eangguy makoko kottha Mizpa ban Geba, iya areya settong kottha e baba Benyamin.

23Careta laenna parkara Rato Asa, iya areya kapahlawananna ban tha-kottha se epakoko, la ecathet e dhalem ketab Sajarana To-rato Yehuda. E bakto towana Asa nyandhang panyaket e padana dhu kalaja.

24Saellana seda, laju esareyagi e pasareyanna to-rato e Kottha Daud; Yosafat, pottrana epagante, daddi rato.

25E taon se kapeng dhuwa’ e dhalem pamarenta’anna Rato Asa e Yehuda, Nadab pottrana Yerobeyam jumenneng rato e Isra’il ban marenta sampe’ dhu taon abidda.

26Nadab jareya padha ban ramana se marenta sabellunna, iya areya agabay dusa ka PANGERAN ban daddi lantaranna oreng Isra’il alako dusa keya.

27Baesa, pottrana Ahiya, dhari suku Isakhar akomplot ngamoso Nadab, Nadab laju epate’e e bakto ngeppong kottha Gibeton abareng ban pasukanna e baba Filistin.

28Kadaddiyan jareya e taon se kapeng tello’ e dhalem pamarenta’anna Rato Asa e Yehuda. Daddi Baesa laju jumenneng rato Isra’il agante Nadab.

29Ta’ saapa abidda saellana daddi rato, Baesa laju mate’e sakabbinna balana Yerobeyam. Menorot apa se la edhabuwagi PANGERAN kalaban parantara’anna abdina, Nabbi Ahiya dhari Silo, la-balana Yerobeyam epate’e kabbi, tadha’ settong se ceccera.

30Yerobeyam la agabay dusa ban daddi lantaranna oreng Isra’il noro’ alako dusa keya. Kalaban cara se kantha jareya Yerobeyam maduka PANGERAN, Allah se esemba oreng Isra’il.

31Careta laenna parkara Nadab la ecathet e dhalem ketab Sajarana To-rato Isra’il.

32Saabidda pamarenta’anna Rato Baesa e Isra’il, ros-terrosan badha perrang e antarana Baesa ban Rato Asa dhari Yehuda.

33E taon se kapeng tello’ e dhalem pamarenta’anna Rato Asa e Yehuda, Baesa pottrana Ahiya jumenneng rato marenta saantero Isra’il. Rato Baesa marenta e Tirza pa’ lekor taon abidda.

34Akantha ramana se marenta sabellunna, Rato Baesa alako dusa keya ka PANGERAN sarta daddi lantaranna oreng Isra’il alako dusa keya.



 <<  1 Raja-raja 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran