Alkitab Mobile SABDA
[VER] : [MADURA]     [PL]  [PB] 
 <<  1 Raja-raja 19 >> 

1Rato Ahab nyareta’agi ka Izebel rajina, sabarang se elampa’agi Eliya, bariya keya baramma Eliya se mate’e sakabbinna bi-nabbina Ba’al.

2Izebel pas makon oreng ka Eliya, epakon ngoca’ kantha reya, "Mandar sengko’ eokoma bi’ para diba, la’-mala’ mandar sengko’ epateyana, mon lagguna baja teya ba’na gi’ ta’ narema babales dhari sengko’ epakantha bi-nabbina Ba’al se epate’e ba’na rowa."

3Eliya tako’, daddi pas buru me’ olle ta’ epate’e; Eliya buru ka Bersyeba e Yehuda asareng ban sarengnga. E jadhiya sarengnga edina’agi,

4pas alomampa ka ra-ara saare benteng abidda sarta laju ambu e babana kajuwan se rampa’. Eliya alenggi e jadhiya pas arassa terro seda’a bai. "Abdidalem ampon ta’ kowat, GUSTE," atorra ka PANGERAN. "Ngereng pondhut nyaba abdidalem. Abdidalem ta’ abecce’an dhari bangatowa abdidalem!"

5Eliya pas marobbu terros tatedhung e baba’anna kajuwan jareya. Pas badha malaekat adulit sambi adhabu, "Mara jaga, Eliya, mara ngakan."

6Eliya le-toleyan, pas ngoladi e seddi’na serana badha roti panggang settong ban gendhi aesse aeng. Roti jareya edha’ar, aengnga eenom, pas bu-marobbu pole.

7Malaekadda PANGERAN rabu pole sambi adulit Eliya pas adhabu, "Mara jaga, Eliya, mara ngakan, me’ olle ba’na kowat ajalanan jau."

8Eliya abungo, pas adha’ar ban ngenom. Badanna pas kowat sarta kellar alomampa sampe’ pa’ polo are abidda ka Gunong Sinay, kennengnganna Allah anyata’agi Salerana.

9E jadhiya Eliya kelem e dhalem guwa. Dhabuna PANGERAN ka Eliya, "Eliya, apa se elakone ba’na e jadhiya?"

10Saodda Eliya, "GUSTE Pangeran, Allah Se Mahakobasa, abdidalem ros-terrosan alako namong kaangguy Junandalem saos. Namong ommat Isra’il ta’ neptebbi parjanjiyannepon sareng Junandalem. Ba-mezbaepon Junandalem epagujur, bi-nabbiepon Junandalem epate’e. Se gi’ odhi’ namong abdidalem, ban samangken ka’dhinto abdidalem epateyana jugan."

11"Mara kalowar dhari guwa jareya," dhabuna PANGERAN, "pas manjeng addhep ka Sengko’ e attas gunong." Saellana jareya PANGERAN pas lebat e jadhiya, ejangadha’i angen se ce’ tandhessa sampe’ mo’-gumo’ melka ban nong-gunong bato bella. Tape PANGERAN ta’ anyata’agi Salerana e dhalem angen jareya. Saellana jareya angen jareya ceddu, pas badha lendhu, tape e dhalem lendhu jareya PANGERAN ta’ anyata’agi Salerana keya.

12Samarena lendhu jareya pas dhateng apoy, tape PANGERAN tadha’ keya e dhalem apoy jareya. Saellana jareya kabadha’an pas seppe, e dhalem kabadha’an se seppe jareya badha sowara se alos lemma’ manes.

13E bakto meyarsa sowara jareya, Eliya notobi mowana ban jubana, sarta pas kalowar laju ngadek e lobangnga guwa jareya. Pas badha sowara se adhabu kantha reya, "Eliya, apa se elakone ba’na e jadhiya?"

14Saodda Eliya, "GUSTE Pangeran, Allah Se Mahakobasa, abdidalem ros-terrosan alako namong kaangguy Junandalem saos. Namong ommat Isra’il ta’ neptebbi parjanjiyannepon sareng Junandalem. Ba-mezbaepon Junandalem epagujur, bi-nabbiepon Junandalem epate’e. Se gi’ odhi’ namong abdidalem, ban samangken ka’dhinto abdidalem epateyana jugan."

15Dhabuna PANGERAN, "Kassa’ abali ka ra-ara e seddi’na Damsyik. Pas entar ka kottha sarta selen mennya’ ka cethagga Hazael menangka tandha pangangkadan epadaddi rato Siria.

16Bariya keya Yehu ana’na Nimsi pakantha jareya me’ olle daddi rato Isra’il, ban Elisa ana’na Safat dhari Abel Mehola me’ olle daddi nabbi se aganteya ba’na.

17Pa’-sapa’a se ta’ epate’e Hazael, bakal epateyana bi’ Yehu, ban pa’-sapa’a se lolos dhari Yehu, bakal epateyana bi’ Elisa.

18Tape pettong ebu oreng Isra’il bi’ Sengko’ epasalamedda, iya areya reng-oreng se paggun esto ka Sengko’ ban ta’ tao nyemba ka arcana Ba’al otaba nyeyom arca jareya."

19Eliya pas mangkat manggi’i Elisa se parappa’na ananggala. Sape se eangguy ananggala e adha’na Elisa badha dhubellas meggi’ ban Elisa dibi’ ngangguy pasanganna sape se dhi-budhi. E bakto Eliya lebat e seddi’na Elisa, jubana ebukka’ pas ebarbar esandhangngagi ka bauna Elisa.

20Elisa berka’ nyerser Eliya, sapena edina’agi sambi ngoca’ "Abdina nyo’ona edi dhimen, gi’ ameda ka oreng towa, salastarena abdina pas ngerenga panjennengngan." Saodda Eliya, "Iya, kassa’. Sengko’ ta’ alaranga."

21Elisa abali ka teggalla, pas nyambelli pe-sapena. Kajuna nanggalana ekagabay apoy epangola’a dagingnga jareya. Dagingnga sapena jareya pas egi-bagi ka reng-orengnga, bi’ reng-oreng jareya pas ekakan. Saellana jareya Elisa pas noro’ Eliya, long-nolonge.



 <<  1 Raja-raja 19 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran