Alkitab Mobile SABDA
[VER] : [MADURA]     [PL]  [PB] 
 <<  1 Samuel 23 >> 

1E settong are badha se abala ka Daud ja’ oreng Filistin nyerrang kottha Kehila ban arampas gandum se gi’ buru eanye.

2Daud laju nyo’on petodu ka PANGERAN, "Ponapa abdidalem kodu nyerrang oreng Filistin?" "Iya," dhabuna PANGERAN, "kassa’ serrang ban pasalamet reng-oreng kottha Kehila."

3Tape reng-orengnga Daud mator, "E Yehuda ka’dhinto saos sadaja padha katako’an; ponapa pole manabi kodu nyerrang tantara Filistin e Kehila."

4Daddi Daud nyo’on petodu ka PANGERAN aggi’, ban PANGERAN adhabu, "Ta’ osa kobater. Kassa’ serrang kottha Kehila, sabab tantara Filistin jareya bi’ Sengko’ epassra’agiya ka ba’na."

5Daddi Daud ban reng-orengnga padha mangkat ka Kehila, terros alorok kottha jareya; bannya’ oreng Filistin se epate’e, bariya keya ebinna se erampas. Daddi oreng kottha jareya la epabebas bi’ Daud.

6E bakto Abyatar pottrana Ahimelekh buru ka Daud, sarta noro’ Daud ka Kehila, Abyatar jareya nyambi efod keya.

7E bakto Saul narema kabar ja’ Daud badha e Kehila, ca’na panggaliyanna, "Bi’ Allah Daud reya la eparengngagi ka sengko’. Sateya Daud jareya la tajebbak sabab maso’ ka dhalem kottha se badha pagar alassa ban ngangguy labang saketheng."

8Saul laju meyos ka Kehila abakta tantarana, ngepponga Daud ban reng-orengnga.

9Tape Daud la ngagali ja’ Saul aneyat jahat ka salerana. Daddi laju adhabu ka Imam Abyatar, "Kanna’ efod jareya giba dha’ enna’."

10Saellana jareya Daud laju adu’a, "Adhu, Guste PANGERAN, Allahna Isra’il, abdidalem mereng ja’ Saul aneyat meyosa ka Kehila ngancora kottha ka’dhinto lantaran abdidalem, abdiepon Junandalem.

11Ponapa reng-oreng Kehila badhi massra’agiya abdidalem ka Saul? Ba’ lerressa kabar gapaneka, Guste? Guste PANGERAN, Allahna Isra’il, kasokana Junandalem apareng oneng ka abdidalem." Dhabuna PANGERAN, "Iya, Saul entara ka jadhiya."

12Daud laju adhabu pole, "Ponapa reng-oreng Kehila badhi massra’agiya abdidalem sareng reng-oreng abdidalem sadajana ka Saul?" Dhabuna PANGERAN, "Iya."

13Daddi Daud ban reng-orengnga se bannya’na ra-kera nem atos oreng laju padha ondur dhari Kehila pas le-ngalle dhari kennengngan se settong ka settonganna. E bakto Saul meyarsa ja’ Daud la ondur dhari Kehila, pas burung se nyerrangnga ka jadhiya.

14Saellana jareya Daud alenggi e pangetegganna e wa-guwa e pagunongan e sagara beddhi Zif. Bi’ Saul eserser terros, tape Allah ta’ kasokan massra’agi Daud ka rato jareya.

15Maske bariya Daud tako’ keya, sabab Saul amaksod mateyana salerana. E settong bakto Daud badha e Hores, e sagara beddhi Zif.

16Yonatan meyos ka jadhiya makokowa kaparcaja’anna Daud ja’ salerana bakal elindhungana Allah.

17Dhabuna Yonatan, "Ampon, ta’ osa tako’. Sampeyan ta’ kera gaggar ka tanangnga rama. Rama ampon ngagali onggu ja’ sampeyan se badhi jumenneng rato Isra’il, jugan kaula badhi kengenga pangkat e baba’anna sampeyan."

18Saellana jareya Daud ban Yonatan mabadha parjanjiyan parsahabadan e ajunanna PANGERAN. Yonatan pas gubar ka dalemma, dineng Daud paggun alenggi e Hores.

19Saellana jareya badha reng-oreng dhari Zif se padha ngadhep ka Saul e Gibeya laju mator kantha reya, "Daud ngetek e dhaera abdidalem e dhalem wa-guwa e seddi’na Hores, e attassa Gumo’ Hakhila e lao’anna sagara beddhi Yehuda.

20Abdidalem oneng, ja’ junandalem ce’ terrona se mega’a Daud; daddi, ngereng meyos ka dhaera abdidalem. Tanggung masthe junandalem ahasel mega’ Daud gapaneka."

21Dhabuna Saul, "Moga-moga ba’na eberkadana bi’ PANGERAN lantaran aberri’ kabecce’an ka sengko’!

22Kassa’ tenggu pole me’ olle ta’ kalero; talektegi pagu-onggu badha e dhimma Daud jareya ban sapa se nangale’e Daud jareya e jadhiya. Sengko’ ngedhing ja’ Daud jareya ce’ salenterra.

23Daddi pareksa patete wa-guwa se tao ekennengnge pangetegganna, pas abali dha’ enna’ ka sengko’. Saellana jareya sengko’ pas entara ka jadhiya abarengnga ban ba’na, ban mon Daud gi’ badha e jadhiya, bi’ sengko’ esareya, maske sengko’ kodu nyaloksak saanterona nagara Yehuda!"

24Daddi reng-oreng jareya laju mangkat abali ka Zif ajangadha’i Saul. E bakto jareya Daud ban reng-orengnga badha e ra-ara beddhi Ma’on, e cora se seppe e dhaera bagiyan lao’na ra-ara beddhi Yehuda.

25Saul ban tantarana rabu nyare’e Daud, tape la badha oreng se malae Daud, daddi Daud la buru ka gunong bato e ra-ara beddhi Ma’on terros alenggi e jadhiya. Saellana ngaonenge parkara jareya, Saul laju nyerser Daud.

26Saul ban tantarana lebat e penggirra gunong se bagiyan dhinna’ dineng Daud ban reng-orengnga lebat e penggir dhissa’na. Daud duli buru dhari Saul se la molae ngeppong mega’a salerana ban reng-orengnga.

27Tape o-tao laju badha otosan se ngadhep ka Saul laju mator, "Ngereng junandalem duli abali, guste! Nagaraepon junandalem sareng abdidalem eserrang oreng Filistin!"

28Saul pas ambu se nyerser Daud, sarta laju terros aperrang bi’ oreng Filistin. Lantaran jareya kennengngan jareya enyamae Gunong Pamesa’an.

29(24-1) Dhari jadhiya Daud meyos ka dhaera En-Gedi, pas ngetek e wa-guwa.



 <<  1 Samuel 23 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel