1Saellana jareya Daud atanya ka PANGERAN, "Ponapa abdidalem kodu entar ngobasane sala settong dhari kottha e Yehuda?" "Iya," dhabuna PANGERAN. "Kottha se ka’dhimma?" ca’na Daud. "Hebron," dhabuna PANGERAN.
2Daddi Daud meyos ka Hebron abareng ban rajina se kadhuwa, iya areya: Ahino’am babine’ Yizre’el, ban Abigail randhana Nabal babine’ dhari Karmel rowa.
3Bariya keya reng-orengnga ban ana’ binena bang-sebang padha noro’, kabbi pas padha enneng e Hebron ban e sabingkerra.
4Saellana jareya reng-oreng Yehuda pas entar ka Hebron, Daud pas epajumenneng rato Yehuda. E bakto meyarsa ja’ oreng Yabes e Gileyad la ngoburragi jinazana Saul,
5Daud pas makon oreng manapa’ pessenna kantha reya, "Moga-moga ba’na eberkadana bi’ PANGERAN, sabab ba’na la noduwagi kaestowanna ba’na ka ratona kalaban ngoburragi jinazana.
6Daddi, moga-moga PANGERAN kasokana noduwagi kataresna’anna ban kaestowanna ka ba’na. Sengko’ becce’a keya ka ba’na polana kabecce’anna ba’na jareya.
7Ba’na pakowat atena, pabangal akantha pahlawan! Saul, ratona ba’na la seda, tape bi’ oreng Yehuda sengko’ la elanti’ epadaddi ratona."
8Panglimana tantarana Saul, iya areya Abner ana’na Ner, buru abareng ban Isyboset pottrana Saul, ka Mahana’im e temorranna Songay Yordan.
9E jadhiya bi’ Abner Isyboset epajumenneng rato se ngobasane dhaera Gileyad, Asyuri, Yizre’el, Efraim ban Benyamin, la’-mala’ sa Isra’il.
10E bakto epajumenneng rato Isra’il jareya Isyboset aomor pa’ polo taon, ban se marenta e jadhiya dhu taon abidda. Tape suku Yehuda teptep esto ka Daud,
11ban Daud marenta Yehuda alenggi neng e Hebron sampe’ pettong taon satengnga abidda.
12E settong are Abner ban reng-orengnga Isyboset mangkat dhari Mahana’im ka kottha Gibeyon.
13Bariya keya Yowab (ebuna anyama Zeruya), abareng reng-orengnga Daud mangkat ka kottha jareya. Reng-oreng se amosowan jareya dhep-adhebban e taman Gibeyon, Abner ban reng-orengnga toju’ e tenggangan e penggir dhinna’na taman Gibeyon, dineng Yowab ban reng-orengnga toju’ e tenggangan e penggir dhissa’na.
14Abner laju ngoca’ ka Yowab, "Mara, reng-orengnga ba’na addu ban reng-orengnga sengko’!" "Iya, mara," ca’na Yowab.
15Daddi dhubellas oreng dhari suku Benyamin se abakkele Isyboset laju maju, bariya keya dhubellas oreng dhari reng-orengnga Daud.
16Reng-oreng jareya saleng gumba’ obu’na ban saleng soddu’ tabu’na ban mosona bang-sebang, sampe’ kabbi padha mate abareng. Lantaran jareya kennengngan e Gibeyon jareya enyamae "Talon Peddhang".
17Saellana jareya reng-orengnga Abner ban reng-orengnga Daud laju padha aperrang ce’ rammena, Abner ban tantara Isra’il epakala bi’ orengnga Daud.
18Ana’na Zeruya se katello badha e jadhiya, iya areya Yowab, Abisai ban Asa’el. Asa’el paberka’na santa’ akantha keddang,
19daddi Abner laju eserser terros. Panyerserra ta’ luk-bilugan ka kangan otaba ka kacer.
20Abner atole ka budhi laju atanya, "Ba’na, Asa’el?" "Iya," saodda.
21"Ella sengko’ ja’ serser terros," ca’na Abner. "Pega’ sala settong dhari tang parjurit rowa, pas kala’ sanjatana!" Tape Asa’el terros nyerser Abner.
22Abner ngoca’ pole, "Ella sengko’ ja’ serser terros! Dhaggi’ sengko’ tapaksa mate’e ba’na. Baramma sengko’ se ngadhebbana Yowab kaka’na ba’na rowa?"
23Tape Asa’el ta’ endha’ ambu, daddi Abner laju ngontallagi tombagga ka budhi, tombak jareya ngenneng ka tabu’na Asa’el terbas sampe’ ka balikadda. Asa’el robbu ban mate e jadhiya keya. Saneyap oreng se napa’ ka kennengnganna Asa’el se robbu jareya padha ambu e jadhiya.
24Tape Yowab ban Abisai terros nyerser Abner. E bakto compet are se kadhuwa jareya napa’ ka Gumo’ Ama, se badha e temorra Giyah, e lorong se nojju ka ra-ara beddhi Gibeyon.
25E jadhiya reng-oreng suku Benyamin agabung pole ban Abner, pas ngator barisanna e konco’na settong gumo’.
26E jadhiya Abner aera’ ka Yowab, "Ponapa sampeyan sareng kaula paneka kodu aperrang ros-terrosan? Ponapa sampeyan ta’ apangrasa ja’ perrang paneka namong madhateng kasossa’an? Kaula paneka taretanna sampeyan sabangsa. Kantos bila sampeyan se anante’a sabellunna marenta’agi ka reng-orengnga sampeyan sopaja ambu ta’ nyerser tan-taretan sabangsana dibi’?"
27Yowab nyaot, "Demi Allah se odhi’, ja’ sakenga sampeyan ta’ adhabu sapaneka, tanto reng-oreng kaula terros nyerser sampeyan sampe’ lagguna gu-laggu."
28Yowab laju nope tarompet menangka tandha sopaja padha’a ambu se nyerser oreng Isra’il, daddi perrang jareya laju ambu.
29Abner ban reng-orengnga samalem benteng abaris lebat e Cora Yordan, laju alengka Songay Yordan, ban saellana ajalan terros saare benteng kalagguwanna, laju napa’ ka Mahana’im.
30Saellana ambu se nyerser Abner, Yowab laju makompol sakabbinna reng-orengnga. Salaenna Asa’el etemmo badha sanga bellas oreng se elang.
31Reng-orengnga Daud la mate’e tello ratos sabidak oreng pasukanna Abner dhari suku Benyamin.
32Saellana jareya Yowab ban pangerengnga ngoburragi jinazana Asa’el e tana koburanna kalowargana e Betlehem. Saellana jareya reng-oreng jareya laju ajalan samalem benteng ban napa’ ka Hebron e bakto para’ seyang.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel