Amsal 31 (MADURA)

[VER] : [MADURA] [PL] [PB]

<< Amsal 31 >>

1Areya’ ca’-oca’ se edhabuwagi ebu Lemuwel, rato Masa ka pottrana,

2"Na’, buwana tang ate, se lahir ollena tang du’a. Apa se ekoca’agiya sengko’ ka ba’na?

3Ja’ wang-mowang kakowadan ka oreng babine’. La bannya’ rato se ancor polana babine’.

4Kaenga’e Lemuwel! Ngenom anggur ban mato ka nom-enoman kerras, ta’ pantes monggu ka pangobasa.

5Sabab, mon rato ngenom nom-enoman kerras, tanto pas loppa ka hokom ban ta’ marduli ha’na oreng se ta’ andhi’ kakowadan.

6Nom-enoman kerras reya kaangguy oreng se nyangsara ban sossa atena.

7Reng-oreng jareya ngenom terro loppa’a ka kameskenanna ban ka kasossa’anna.

8Tolonge oreng se ta’ bisa nolong aba’na dibi’. Pasalamettagi ha’na oreng se ta’ bisa apa-rapa.

9Aperrang kaangguy reng-oreng jareya, mara daddi hakim se adil. Pasalamettagi ha’na oreng mesken ban oreng se tatendhes."

10Bine se cakep malarat sareyanna; bine se kantha jareya alarangan dhari enten ban barleyan.

11Lakena ta’ kera kakorangan pa-apa, sabab la parcaja ka binena jareya.

12Babine’ se kantha jareya ta’ tao agabay sala ka lakena, saomorra becce’ ka lakena jareya.

13Babine’ jareya bajeng makompol rame ban buluna dumba, terros etennon tadha’ ambuna.

14Dhari jauna babine’ jareya madhateng kakanan, padha ban se ejalannagi pal-kapalla dagang.

15Gi’ petteng la jaga nyadhiya’agiya kakanna saessena bengkona, sarta gi-magiya lalakon ka reng-barengnga.

16Babine’ jareya nyare tana pas ebelli, pas namenne kebbun anggur dhari hasella lakona.

17Babine’ jareya nyadhiya’agi badanna alalakona salar-kellarra.

18Babine’ jareya tao sabarang se elakone madhateng kaontongan; mon alalakon sampe’ ce’ malemma.

19Bennang epente, kaen etennon.

20Ta’ cerre’ ka oreng se kakorangan, bagus atena ka oreng se marlowagi partolongan.

21Babine’ jareya ta’ kobater mon la mosem cellep, sabab la nyadhiya’agi kalambi panas kaangguy saessena bengkona.

22Babut e bengkona gabayanna dibi’, bariya keya kalambina se dhari kaen linen bungo terrong se bagus.

23Lakena oreng se kalonta nyamana, sala settong dhari pamimpin e kotthana.

24Kalambi ban sabbu’ ekagabay, pas ejuwal ka sodagar.

25Babine’ jareya ehormat ban ekatako’e oreng, ta’ kobater ngadhebbi bakto e budhi are.

26Pacacana lemma’ manes ce’ alossa; ca’-oca’na bicaksana.

27Mon alalakon ce’ bajengnga, ta’ nga-satengnga ngoros kabutowanna roma tatanggana.

28Babine’ jareya ehormat bi’ na’-ana’na, sarta ealem bi’ lakena.

29"Bannya’ babine’ se becce’," ca’na lakena, "tape ba’na se paleng becce’ dhari sakabbinna."

30Roba se raddin ta’ ekenneng parcaja, raddinna mowa bisa elang; tape babine’ se ta’at ka PANGERAN pantes ealem salanjangnga.

31Bales kabecce’anna, jareya babine’ se patot ehormadi e man-dhimman.

<< Amsal 31 >>

Bahan Renungan: SH - RH - ROC