Alkitab Mobile SABDA
[VER] : [MADURA]     [PL]  [PB] 
 <<  Bilangan 11 >> 

1E settong are bangsa Isra’il aserrowan ka PANGERAN polana nemmo kasossa’an sabannya’na. Meyarsa aserrowan reng-oreng jareya, PANGERAN duka, laju madhateng apoy. Apoy jareya alatlat san-kassannagi sampe’ sala settong dhari penggirra parkemahan jareya katonon.

2Reng-oreng Isra’il rat-tharadan menta tolong ka Mosa. Mosa pas nyo’on ka PANGERAN, daddi apoy jareya laju mate.

3Daddi kennengngan jareya enyamae Tabera, sabab e jadhiya apoyya PANGERAN rabbang makatonon kennengnganna reng-oreng Isra’il.

4Badha reng-oreng manca se abareng ban reng-oreng Isra’il e dhalem parjalanan jareya. Reng-oreng manca jareya ce’ terrona ngakana daging, ban reng-oreng Isra’il molae noro’ ango’ngo’an keya, oca’na, "Ja’ sakenga badha se aberri’ juko’ daging ka sengko’!

5E Messer sengko’ ngakan juko’ sampe’ tobuk, ban ta’ osa majar. Gi’ ta’ kabitong temon, somangka, prei, babang mera ban babang pote se ekakan sengko’ e dhissa’!

6Tape sateya aba’ la ta’ andhi’ kakowadan, polana tadha’ se ekakana kajabana manna malolo."

7Manna reya akantha katombar, ne’-kene’, barnana pote abak koneng.

8E baja malem manna jareya gaggar ka kennengnganna parkemahan abareng ban ebbun. Kalagguwanna gu-laggu oreng Isra’il ajalan ka bara’ ka temor, ka dhaja ka lao’ makompol manna jareya. Ollena pas egilis otaba etoto ekagabay teppong, pas eola ekagabay jajan se bunter tor peppe’. Rassana padha ban roti se epanggang ban mennya’ jaitun.

9(11:8)

10Mosa meyarsa reng-oreng Isra’il se ango’ngo’an sambi manjeng akompol e adha’anna labangnga kemahna. PANGERAN duka, daddi Mosa sossa panggaliyanna.

11Atorra Mosa ka PANGERAN, "Aponapa abdidalem me’ epakadi ka’dhinto? Aponapa Junandalem me’ ta’ neser ka abdidalem? Aponapa abdidalem me’ epakon ngoros reng-oreng ka’dhinto?

12Mangkana banne abdidalem se agandhu’ sareng se alahirragi reng-oreng ka’dhinto! Aponapa abdidalem me’ epakadi oreng se nganju sareng ngemban na’-kana’ kene’, ros-terrosan salanjangnga parjalanan ka nagara se sareng Junandalem ejanjiyagi ka bangatowaepon reng-oreng ka’dhinto?

13Ngereng peyarsa’agi, reng-oreng ka’dhinto ango’ngo’ ros-terrosan nyo’on daging. E ka’dhimma abdidalem se manggiya daging se eparengngagiya ka oreng sakaddu’ ra’ra’ ka’dhinto?

14Abdidalem ta’ sanggup ngoros reng-oreng ka’dhinto kadibi’an; taberra’ dhimen!

15Manabi abdidalem epakadiya ka’dhinto ros-terrosan, langkong sae pate’e saos abdidalem, manabi Junandalem bellas ka abdidalem; sopaja abdidalem ta’ pate abit nanggung kasangsara’an ka’dhinto."

16PANGERAN pas adhabu ka Mosa, "Kassa’ ba’na makompol pettong polo oreng se wa-towa se eakone menangka pamimpinna bangsa. Giba kabbi ka adha’na Tang Kemah, soro manjeng e jadhiya e erenganna ba’na.

17Sengko’ torona, acaca’a bi’ ba’na e jadhiya, sabagiyan dhari kakobasa’an se etarema ba’na dhari Sengko’, bi’ Sengko’ ebagiya ka reng-oreng jareya. Daddi reng-oreng jareya ngenneng abanto ba’na, noro’ mekol tanggung jawab e dhalem ngoros bangsa jareya, daddi lalakon jareya ta’ osa etanggung ekadibi’i ba’na.

18Ba’na ngoca’ kantha reya ka ommat Isra’il, ‘Mara kabbi padha nyocce’e aba’ kaangguy lagguna; ba’na bakal ngakana daging. PANGERAN la meyarsa serrona ba’na se terro ngakana daging, bariya keya ba’na se ngoca’ ja’ odhi’na ba’na anyamanan se gi’ badha e Messer. Sateya bi’ PANGERAN ba’na eparengngana daging se ekenneng kakan ba’na.

19Ba’na ngakana daging jareya banne pera’ saare dhu are, otaba lema are otaba sapolo are, banne dhu polo are,

20tape sampe’ sabulan abidda, sampe’ ba’na mabu’ ban aota’an. Jareya polana ba’na nolak PANGERAN se badha e nga’-tengnga’anna ba’na, sarta polana ba’na ango’ngo’an polana se nyengla dhari Messer.’"

21Atorra Mosa ka PANGERAN, "Ommat Isra’il ka’dhinto bannya’epon nem atos ebu oreng. Kadi ponapa Junandalem me’ adhabu marengana daging kantos sabulan abittepon ka oreng se saka’dhinto bannya’na?

22E ka’dhimma se manggiya sape sareng dumba se esambelliya se cokoba makennyang reng-oreng se saka’dhinto bannya’na? Ponapa juko’ se badha e tase’ kerana cokop makennyanga reng-oreng ka’dhinto sadaja?"

23Dhabuna PANGERAN, "Apa Tang kakobasa’an badha batessa? Ba’na bakal duliya nangale’e apa se ekoca’agi Sengko’ jareya bendher otaba enja’!"

24Daddi Mosa pas kalowar, manapa’ ka bangsana sabarang se edhabuwagi PANGERAN. Mosa makompol pamimpin se pettong polo oreng bannya’na, epakon manjeng e sakalenglengnga Kemah Socce.

25PANGERAN pas toron e dhalem ondhem, laju abu-dhabu ka Mosa. PANGERAN mondhut sabagiyan dhari kakobasa’an se la eparengngagi ka Mosa, laju eparengngagi ka pamimpin laenna se bannya’na pettong polo oreng rowa. E bakto kamaso’an kakobasa’an jareya, reng-oreng buru laju ra’-era’an akantha para nabbi, tape ta’ sampe’ abit.

26E antarana pamimpin se pettong polo oreng gella’ badha oreng kadhuwa, nyamana Eldad ban Medad, paggun neng e parkemahan, ta’ entar ka Kemah Socce ban en-laenna. E parkemahan jareya se kadhuwa buru kamaso’an kakobasa’anna Pangeran, pas ra’-era’an akantha para nabbi.

27Pas badha oreng ngodha berka’ abala parkara jareya ka Mosa.

28Yusak, ana’na Nun, se abanto Mosa dhari gi’ ngodhana, mator ka Mosa, "Pakon ambu se kadhuwa ka’issa’."

29Dhabuna Mosa, "Arapa ba’na me’ mekkere sengko’? Sengko’ la’-mala’ ngarep sopaja PANGERAN kasokana marengngagi Errohna ka sakabbinna tang bangsa ban sakabbinna oreng padha ra’-era’an akantha nabbi!"

30Mosa laju abali ka parkemahanna asareng ban reng-oreng pamimpinna ommat Isra’il, se bannya’na pettong polo oreng rowa.

31PANGERAN pas madhateng angen daksakala dhari tase’; angen jareya ngeba mano’ gemmek se ngabber ce’ mandhabba, ta’ sampe’ sameter tenggina dhari tana. No’-mano’ jareya ngabber e attasanna parkemahan, jauna sampe’ pan-barampan kilometer e sakalenglengnga parkemahan.

32E are jareya saare samalem, ban kalagguwanna saare benteng reng-oreng Isra’il padha mega’ mano’ gemmek jareya. Saneyap oreng padha mega’ paleng sakone’na saebu kilo ebang. No’-mano’ se epega’ jareya epakerreng, ebirbir e sakalenglengnga parkemahan.

33Teppa’na dagingnga gi’ bannya’ se ekakana, PANGERAN duka ka bangsa jareya, sarta pas madhateng panyaket se alleyan ka bangsa jareya.

34Daddi kennengngan jareya enyamae Kibrot-Ta’awa se artena "Koburanna Kadhakka’an" sabab e jadhiya kennengnganna koburanna reng-oreng se mate polana dhakka.

35Dhari jadhiya bangsa Isra’il mangkat ka dhaera Hazerot, pas akemah e jadhiya.



 <<  Bilangan 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran