Alkitab Mobile SABDA
[VER] : [MADURA]     [PL]  [PB] 
 <<  Bilangan 19 >> 

1Dhabuna PANGERAN ka Mosa ban Harun,

2"Kabala atoran-atoran reya ka bangsa Isra’il: Ngala’ sape bine’ se mera se tadha’ calena ban se gi’ ta’ tao eangguy ko’-ngangko’.

3Sape jareya passra’agi ka Imam Eleyazar. Keban jareya kodu egiba ka lowarra parkemahan pas esambelli e adha’anna imam.

4Imam Eleyazar pas kodu ngala’ dharana keban jareya sakone’, dhara jareya ketessagi pettong kale sambi addhep ka Kemah Socce.

5Sakabbinna bagiyanna keban jareya, iya areya kole’na, dagingnga, dharana ban essena tabu’na, kodu eobbar e adha’anna imam.

6Saellana jareya imam kodu ngala’ kaju aras sakone’, hisop sagundhung ban tale mera, jareya kabbi ontallagi ka dhalem apoy se eangguy ngobbar sape jarowa.

7Saellana jareya imam jareya kodu nyassa kalambina, pas mandhi. Samareana, imam jareya olle maso’ ka dhalem parkemahan, tape imam jareya gi’ najjis sampe’ compet are.

8Oreng se ngobbar sape jareya kodu nyassa kalambina keya pas mandhi; oreng jareya gi’ najjis keya sampe’ compet are.

9Saellana jareya oreng se ta’ najjis kodu makompol abu bar-obbaranna sape gella’, pas esaba’ e kennengngan se ta’ najjis e lowarra parkemahan. Abu jareya sempen e jadhiya sopaja ekenneng angguy ommat Isra’il kaangguy agabay aeng opacarana panyocceyan kaangguy palebbaranna dusa.

10Oreng se makompol abuna sape jareya kodu nyassa kalambina, tape gi’ najjis sampe’ compet are. Atoran jareya angguy salanjangnga, kaangguy oreng Isra’il ban bariya keya oreng manca se neptep e antarana oreng Isra’il."

11Pa’-sapa’a ngenneng nyedding mayyit daddi najjis pettong are abidda.

12Mon la olle tello are ban pettong are, oreng jareya kodu nyocce’e aba’na ngangguy aeng opacara, buru daddi berse. Tape mon saellana olle tello are ban pettong are oreng jareya ta’ nyocce’e aba’, oreng jareya paggun najjis.

13Oreng se ngenneng nyedding mayyit ban ta’ nyocce’e aba’ jareya najjis, sabab gi’ ta’ eserame aengnga opacara. Oreng jareya manajjis Kemah Socce, daddi ta’ eanggep ommadda Allah pole.

14Mon badha oreng mate e dhalem settong kemah, pa’-sapa’a se badha e dhalem kemah jareya otabana se maso’ ka jadhiya, daddi najjis pettong are abidda.

15Gendhi ban polo’ se tadha’ kodhungnga daddi najjis kabbi keya.

16Pa’-sapa’a se ngenneng nyedding ka mayyidda oreng se mate polana epate’e oreng, oreng se mate biyasa e teggal, daddi najjis pettong are abidda. Bariya keya oreng se nyedding makam otaba tolangnga oreng mate.

17Mon nyocceyana oreng se najjis jareya, kodu ngala’ abu bar-obbaranna sape bine’ se mera sakone’ kaangguy malebbar dusana. Abu jareya kodu emaso’agi ka dhalem polo’, pas epobuwi aeng se ekala’ dhari aeng se agili.

18E dhalem parkara se nomer settong gella’, iya areya mon badha oreng mate e dhalem kemah, oreng se ta’ najjis kodu ngala’ hisop sagundhung, cabbur ka dhalem aeng gella’, aengnga laju ketessagi ka kemah jareya ban ka sabarang se badha e jadhiya, bariya keya ka reng-oreng se badha e jadhiya. E dhalem parkara se kapeng dhuwa’, iya areya mon oreng ngenneng nyedding ka mayyit, makam otaba tolangnga oreng mate, oreng se ta’ najjis kodu ngetesse oreng jareya bi’ aeng gella’ padha ban parkara se kapeng settong.

19Oreng se najjis jareya kodu eketesse e are se kapeng tello’ ban e are se kapeng petto’. E are se kapeng petto’ jareya opacara nyocce’e oreng se najjis gella’ la mare. Oreng jareya pas kodu nyassa kalambina sarta terros mandhi. Molae compet are oreng jareya la daddi berse pole.

20Oreng se najjis tape ta’ nyocce’e aba’na, pagguna najjis polana gi’ ta’ eserame aeng opacara. Oreng jareya manajjis Kemah Socce, ban ta’ eanggep ommadda Allah pole.

21Atoran jareya kodu eangguy salanjangnga. Oreng se ngetessagi aeng opacara gella’ kodu nyassa kalambina keya; oreng se ekenneng aeng jareya daddi najjis sampe’ compet are.

22Barang se esedding oreng se najjis daddi najjis, ban oreng se nyedding oreng jareya daddi najjis sampe’ compet are.



 <<  Bilangan 19 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran