Alkitab Mobile SABDA
[VER] : [MADURA]     [PL]  [PB] 
 <<  Daniel 4 >> 

1Reya’ pangomomanna Rato Nebukadnezar se epakerem ka reng-oreng dhari sakabbinna bangsa, suku bangsa ban basa sadunnya: "Salam!

2Sengko’ terro nyareta’agiya parkara kaajiban ban mo’jijat se la elampa’agi Allah Se Mahatenggi ka sengko’.

3Raja onggu mo’jijat se elampa’agi Salerana! Makasambu’ ate onggu kaajiban se ebadha’agi Salerana! Allah bakal jumennengnga rato salanjangnga. Salerana kobasa saabidda."

4Sengko’ nyaman ban aman enneng e tang karaton ban odhi’ ta’ kakorangan pa-apa.

5Tape e settong malem teppa’na sengko’ tedhung, sengko’ amempe nangale’e pangaton se talebat maketter tang ate.

6Sengko’ pas ngolok reng-oreng se ter-penter se badha e Babil, bi’ sengko’ esoro nerrangngagi apa artena mempe jareya.

7Tape e bakto kang-tokang ramal, kon-dhukon seher, reng-oreng se andhi’ elmo ban para ahli bintang dhateng ban bi’ sengko’ la ebalai parkara tang mempe jareya, reng-oreng jareya tadha’ settonga se bisa nerrangngagi artena.

8Dhi-budhina dhateng Daniyel se ejulugi Beltsazar menorot nyamana tang diba. Daniyel erabuwi errohna ba-diba se socce. Bi’ sengko’ Daniyel ebalai keya parkara tang mempe jareya, ca’na sengko’,

9"He Beltsazar, pamimpinna reng-oreng se andhi’ elmo, sengko’ tao ja’ ba’na erabuwi errohna ba-diba se socce, sampe’ tadha’ roseya se ta’ ekataowe ba’na. Edhingngagi tang mempe reya, ban terrangngagi apa artena.

10Parappa’na sengko’ tedhung, sengko’ nangale kajuwan se tombu e nga’-tengnga’anna bume.

11Kajuwan jareya ce’ tenggina, bungkana raja ban koko. Konco’na gan langnge’, sampe’ bisa etangale bi’ sakabbinna oreng e bume.

12Un-dhaunna cengngar ban buwana ce’ lebba’na, cokop kaangguy ekakan oreng sadunnya. Run-burun alas dhung-tedhungan ngaop e baba’anna ban no’-mano’ alebun e ka-cangkana. Ban sakabbinna mahlok bisa ngakan buwana.

13Parappa’na sengko’ mekker parkara pangaton jareya, sengko’ nangale’e badha malaekat toron dhari sowarga; katonna te-ngate ban aga-jaga.

14Malaekat jareya adhabu epakaja, ‘Poger kajuwan rowa ban ketthok ka-cangkana; pangalotor un-dhaunna ban tabur wa-buwana. Agga run-burun alas se dhung-tedhungan e baba’anna ban no’-mano’ se alebun e ka-cangkana.

15Tape panneng bungkella e dhalem tana. Tale’e bi’ rantay besse ban dimbaga pas dina e talon. Dina me’ olle bacca kaebbunan ban odhi’ apolong bi’ ban-keban sarta bu-tombuwan.

16Dina akkalla manossana me’ olle aoba daddi akkalla keban pettong taon abidda.

17Jareya potosanna sengko’ kabbi, para malaekat se te-ngate ban aga-jaga. Maksodda sengko’ ban kat-malaekat laenna iya reya sopaja reng-oreng e dhimma’a bai padha ngakone, ja’ Allah Se Mahatenggi kobasa ka karaja’anna manossa ban karaja’an jareya eparengngagi ka sapa’a bai se epele Salerana, la’-mala’ ka oreng se paleng tadha’ artena sakale!’

18He Beltsazar, jareya tang mempe. Sateya mara koca’agi artena ka sengko’. Tadha’ settonga oreng se penter e tang karaja’an se bisa ngoca’agi jareya ka sengko’, tape ba’na bisa, sabab ba’na etorone errohna ba-diba se socce."

19Ngedhing jareya, Daniyel se ajuluk Beltsazar, takerjat ban cengngeng sakejja’. Daddi sengko’, Rato Nebukadnezar ngoca’ kantha reya ka Daniyel jareya, "Beltsazar, ba’na ja’ ketter polana tang mempe ban artena jareya." Beltsazar nyaot, "Guste, kadi ponapa saena ja’ sakenga pa-ponapa se eramallagi e dhalem sopennaepon junandalem gapaneka kadaddiyan ka so-mosoepon junandalem, banne ka junandalem.

20Kajuwan se eoladi junandalem ka’dhissa’ ce’ tenggina, kantos konco’epon napa’ ka langnge’, sareng etengale sadajana oreng e bume.

21Un-dhaunnepon cengngar sareng buwaepon lebba’ kantos cokop kaangguy eteddha oreng sabume. Run-burun alas dhung-tedhungan ngaop e baba’anna, sareng no’-mano’ alebun e ka-cangkana.

22Guste, kajuwan se tenggi sareng koko gapaneka junandalem dibi’. Kaagungannepon junandalem atamba kantos gan langnge’, sareng kakobasa’annepon junandalem sajan lebar kantos ka konco’epon bume.

23Junandalem jugan ngoladi malaekat toron dhari sowarga sambi adhabu, ‘Poger ban pate’e kajuwan reya, bungkella dina e dhalem tana. Tale’e bi’ rantay besse ban dimbaga, pas dina e talon. Dina me’ olle bacca kaebbunan ban odhi’ akompol bi’ run-burun alas pettong taon abidda.’

24Guste, ka’dhinto arteepon pangaton gapaneka, sareng ka’dhinto se epotossagi Allah Se Mahatenggi parkara junandalem dibi’.

25Junandalem badhi eojuga dhari masarakattepon manossa, laju apolonga sareng ban-keban e talon. Pettong taon abittepon junandalem badhi adha’ar rebba akadi sape sareng asaren e tana e babana langnge’ kantos bacca kaebbunan. Saamponnepon gapaneka junandalem badhi ngakowa ja’ Allah Se Mahatenggi kobasa ka karaja’annepon manossa, ban karaja’an gapaneka eparengngagi ka pasera’a saos se epele Salerana.

26Para malaekat makon sopaja bungkellepon kajuwan gapaneka epanneng e dhalem tana. Gapaneka arteepon junandalem badhi jumennengnga rato pole saamponnepon junandalem ngakone ja’ Allah ngobasane saantero dunnya.

27Daddi saena junandalem atoro’ ka babala’anna abdidalem. Junandalem ja’ abadhi dusa pole, namong kodu alampa’agi pa-ponapa se sae sareng adil, sareng kodu bellas ka oreng mesken. Kalaban sapaneka junandalem badhi teptebba senneng."

28Jareya kabbi kadaddiyan ka sengko’, Rato Nebukadnezar.

29Dhubellas bulan saellana jareya, teppa’na sengko’ lan-jalanan e bun-kebbunan e tang karaton e ondhak attas neng e Babil,

30sengko’ ngoca’, "Abas, bagus onggu kottha Babil reya! Sengko’ se maddek kottha reya epadaddi ibu kotthana nagara kaangguy abukteyagi tang kakobasa’an ban kakowadan, kaagungan ban kamolja’an!"

31Sengko’ gi’ ta’ mare acaca kantha jareya, pas ngedhing sowara dhari langnge’, "Rato Nebukadnezar, edhingngagi reya! Kakobasa’anna ba’na menangka rato la ekala’ dhari ba’na.

32Ba’na eojuga dhari masarakadda manossa, ban odhi’a apolong bi’ ban-keban e talon. Pettong taon abidda ba’na bakal ngakana rebba akantha sape. Ba’na bakal ngakowana ja’ Allah Se Mahatenggi kobasa ka karaja’anna manossa ban karaja’an jareya eparengngagi ka sapa’a bai se epele Salerana."

33E bakto jareya keya ca’-oca’ jareya daddi kanyata’an. Sengko’, Nebukadnezar, eojuk dhari masarakadda manossa ban ngakan rebba akantha sape. Tang badan bacca kaebbunan, tang obu’ lanjang akantha buluna ellang, ban tang koko lanjang akantha cakarra mano’.

34E bakto pettong taon la lebat, sengko’ adhanga ka langnge’, ban sengko’ pas enga’ pole. Daddi sengko’ pas amolja’agi Allah Se Mahatenggi. Salerana se odhi’ langgeng jareya bi’ sengko’ epoji ban emolja’agi. Allah bakal jumennengnga rato salanjangnga. Salerana kobasa saterrossa.

35Sa-bangsa e dunnya tadha’ artena. Allah ngobasane malaekat e sowarga ban reng-oreng e bume. Tadha’ oreng se bangala alaban ka kasokanna, tadha’ se bangal atanya apa se elampa’agi Salerana.

36E bakto tang engeddan la abali pole, kamolja’an, kaagungan ban kasohoranna tang karaja’an epabali pole ka sengko’. Sengko’ etarema bi’ para tang ponggaba ban para tang pangraja, sarta’anna sengko’ pas epabali ka tang karaja’an, la’-mala’ kaagunganna sengko’ alebbiyan dhari lamba’na.

37Daddi sateya sengko’ moji, matenggi ban amolja’agi Rato Sowarga. Sabarang se elampa’agi Salerana bendher ban adil, ban Salerana sanggup ngababa’agi oreng se sombong.



 <<  Daniel 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran