1Dhabuna PANGERAN ka Mosa,
2"Olok Harun ban na’-ana’na ka adha’anna labangnga Tang Kemah Socce, ngeba pangangguyya imam, mennya’ upacara, sape lake’ se gi’ ngodha settong kaangguy kurban pangamponanna dusa, dumba lake’ dhadhuwa’ ban roti se ta’ eragi’i sabudhak.
3Saellana jareya ommat Isra’il soro akompol kabbi e adha’na labangnga Tang Kemah jareya."
4Mosa alampa’agi sabarang se epakonnagi PANGERAN jareya. E bakto ommat Isra’il la padha akompol e jadhiya kabbi,
5Mosa adhabu, "Se ejalannagiya sengko’ sateya reya papakonna PANGERAN."
6Mosa laju makon Harun ban tra-pottrana nyander ka seddi’anna sarta nyocce’e aba’na bang-sebang.
7Saellana jareya Mosa masangngagi pangangguyya imam ka Harun: kameja, sabbu’ ban juba. Bariya keya efod se etaleyagi ka tengngana ngangguy sabbu’ dhari kaen se alos.
8Saellana laju epangagem totobba dhadha, ban e dhalemmanna totobba dhadha jareya epasange Urim ban Tumim.
9Serana esurbane, ban surbanna epasange jamang emmas, se nandha’agi ja’ Harun la daddi kaagunganna PANGERAN. Jareya kabbi elampa’agi Mosa menorot papakonna PANGERAN ka salerana.
10Mosa pas mondhut mennya’na opacara se pas ebuliddagi ka Kemah Socce ban parabudda. Kalaban cara se kantha jareya kabbi eatorragi ka PANGERAN malolo.
11Mennya’ jareya eketessagi sakone’ pettong kale ka attassa mezba ban parabudda, bariya keya ka cemmong ban dhasarra. Kalaban cara se kantha jareya kabbi eatorragi ka PANGERAN malolo.
12Saellana jareya Mosa nahbissagi Harun kalaban cara nyelen mennya’na opacara jareya sakone’ ka serana.
13Samarena jareya tra-pottrana Harun laju epakon nyander ka seddi’anna sarta pas epangagem kameja ban sabbu’. Serana padha esurbane akantha se edhabuwagi PANGERAN ka salerana.
14Saellana jareya Mosa laju mondhut sape lake’ se gi’ ngodha kaangguy kurban pangamponanna dusa. Harun ban tra-pottrana nompangngagi astana e cethagga sape jareya.
15Sape jareya bi’ Mosa pas esambelli, dharana epondhut sabagiyan, ebuliddagi bi’ garigi’na ka dhu’-tandhu’ e saneyap padduna mezba. Kalaban cara se kantha jareya mezba jareya eatorragi ka PANGERAN malolo. Lebbina dharana eserammagi ka dhasarra mezba. Kantha jareya carana mezba jareya esocceyagi ban eatorragi ka PANGERAN malolo.
16Dhari sape se esambelli jareya Mosa mondhut sakabbinna gaji se notobi essena tabu’na, bingselan ban gajina, sarta bagiyanna atena se paleng bagus. Jareya kabbi eobbar e attassa mezba.
17Karena sape jareya, kole’na, karena essena tabu’na, tamaso’ perro’na, laju eobbar e lowaranna parkemahan akantha se edhabuwagi PANGERAN ka salerana.
18Saellana jareya Mosa mondhut dumba lake’ kaangguy kurban obbaran, Harun ban tra-pottrana laju nompangngagi astana e cethagga dumba jareya.
19Bi’ Mosa dumba jareya esambelli, ban dharana eserammagi ka sakalenglengnga penggirra mezba.
20Dumba jareya laju ethok-ketthok, essena tabu’na ban sokona ebacco bi’ aeng. Cethagga, gajina, ban karena dagingnga eobbar kaangguy kurban obbaran e attassa mezba akantha se edhabuwagi PANGERAN ka salerana. Bauna kurban obbaran jareya masenneng panggaliyanna PANGERAN.
21(8:20)
22Mosa laju mondhut dumba lake’ settong aggi’ kaangguy kurban pantahbisanna imam. Harun ban tra-pottrana nompangngagi astana e cethagga dumba jareya.
23Bi’ Mosa dumba jareya laju esambelli. Dharana epondhut sakone’, ebuliddagi ka karna kanganna Harun, ka pol-empolanna asta kanganna sarta pol-empolanna pada kanganna.
24Tra-pottrana Harun pas epakon nyander ka seddi’anna, dharana dumba gella’ ebuliddagi keya sakone’ ka karna kanganna, ka pol-empolanna asta kanganna, sarta pol-empolanna pada kanganna. Salebbina dharana eserammagi ka sakalenglengnga penggirra mezba.
25Mosa mondhut gajina dumba jareya, bunto’na se bannya’ gajina, sakabbinna gaji se notobi essena tabu’na, bagiyanna atena se paleng bagus, bingselan ban gajina sarta pokang kanganna.
26Dhari cettheng se aesse roti se ta’ eragi’i se la eatorragi ka PANGERAN, Mosa mondhut roti settong se kandel se eola ban mennya’ sarta roti se tepes settong. Roti jareya esaba’ e attassa gajina ban pokang kanganna.
27Jareya kabbi esaba’ e astana Harun ban tra-pottrana, bi’ Harun ban tra-pottrana pas eatorragi menangka kurban kusus ka PANGERAN.
28Saellana jareya kakanan buru bi’ Mosa epondhut dhari reng-oreng jareya, pas eobbar e mezba, epabareng ban kurban obbaran kaangguy kurban pantahbisan. Bauna kurban jareya masenneng panggaliyanna PANGERAN.
29Mosa laju mondhut dhadhana dumba jareya, pas eatorragi menangka tor-ator kusus ka PANGERAN. Jareya bagiyanna Mosa dhari dumba lake’ se ekurbannagi kaangguy opacara pantahbisanna imam. Jareya kabbi bi’ Mosa elampa’agi menorot se edhabuwagi PANGERAN ka salerana.
30Saellana jareya Mosa mondhut sabagiyan dhari mennya’na opacara ban sabagiyan dhari dhara se badha e attassa mezba, laju eketessagi ka Harun ban tra-pottrana sarta ka rasoganna. Kalaban opacara jareya reng-oreng jareya sarta rasoganna bi’ Mosa eatorragi ka PANGERAN malolo.
31Dhabuna Mosa ka Harun ban tra-pottrana, "Ola daging kurban jareya e adha’anna labangnga Kemah Socce, pas kakan e jadhiya ban rotina kurban pantahbisan se badha e dhalem cettheng rowa, menorot se epakonnagi bi’ PANGERAN.
32Lebbina daging ban rotina pas obbar pasampe’ tadha’.
33Ba’na ta’ olle ajalanan dhari Kemah Socce pettong are abidda sampe’ opacara pantahbisanna ba’na mare.
34Menorot dhabuna PANGERAN apa se elakone sengko’ ban ba’na are teya kodu ejalannagi terros sopaja sa-dusana ba’na esapora’a.
35Pettong are abidda, seyang ban malem, ba’na kodu neng e adha’anna labangnga Kemah kaangguy ngalakone pa-apa se epakonnagi PANGERAN. Mon ba’na ta’ atoro’, ba’na bakal mateya. Kantha jareya dhabuna PANGERAN ka sengko’."
36Harun ban tra-pottrana laju alampa’agi kabbi se epakonnagi PANGERAN kalaban parantara’anna Mosa jareya.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel