1Yakub adikane tra-pottrana, laju adhabu, "Mara padha dha’ enna’ kabbi, neng e seddi’anna sengko’. Bi’ sengko’ ebala’ana kabbi apa se bakal kadaddiyana ka ba’na e budhi are:
2Mara akompol kabbi, na’-ana’na Yakub, mara padha edhingngagi dhabuna Isra’il, eppa’na ba’na.
3Ruben, tang ana’ se sareyang, ba’na reya tang kakowadan, ana’ se dha’-adha’ ollena sengko’ menangka oreng lake’. Ba’na se paleng gaga’ ban se paleng kowat e antarana tang na’-ana’.
4Ba’na padha ban banjir raja, tape ba’na ta’ bakal daddiya se paleng penting, sabab ba’na tedhung ban tang seller, macemmer katedhunganna eppa’na.
5Simeyon ban Lewi sataretan; sanjatana padha eangguy ngalakone kakerrasan.
6Sengko’ ta’ ro’-noro’a e dhalem parembaganna se ta’ ekaedhing oreng laenna, bariya keya sengko’ ta’ noro’a e dhalem kompolanna se padha asakongkellan, sabab tang ana’ se kadhuwa jareya mate’e oreng kalaban napso amara sarta madippang theng-bantheng pera’ parlo nyare kasennengnganna atena.
7Amarana se kadhuwa jareya ce’ paranana, ban peggella atena daddi sababba se kadhuwa jareya talebat kejjemma, daddi bakal ekennenga babastonna Pangeran. Toronanna bi’ sengko’ epacar-kalacera sanagara Isra’il, epatapencara e antarana sa-bangsa.
8Yehuda, ba’na bakal ealemma bi’ tan-taretanna, ba’na nyekkella le’erra so-mosona, tan-taretanna ba’na bakal asojuda kabbi ka ba’na.
9Yehuda padha bi’ macan se mate’e mosona, laju abali ka rongkangnga; akaleya’ laju marobbu tedhunga, tadha’ oreng se bangala ca-nganca.
10Yehuda bakal neggu’a tongkedda karaja’an, na’ potona bakal marenta’a salanjangnga. Sa-bangsa bakal majara pajek ka nagarana sarta asojud mator sandika e adha’anna.
11Hemarra ban budhu’na epangger ka bungkana anggur, ka bungkana anggur se paleng bagus, kalambina esassa bi’ anggur se mera akantha dhara.
12Matana mera polana ngenom anggur, gigina pote polana ngenom susu.
13Zebulon bakal ako-bengkowa e seddi’na tase’; penggir serengnga daddiya palabbuwanna pal-kapal, batessa nagarana bakal napa’a ka Sidon.
14Isakhar tadha’ bidana ban hemar se tedhung ngonjur ban karanjang buwadanna se gi’ cekka’ e kangan kacerra badanna.
15Kennengngan jareya etangale’e ce’ bagussa, nagara jareya talebat leburra, daddi pas ngendha’ narema buwadan e balikadda epaksa epadaddi dunor epalako ce’ berra’na.
16Ba’na, Dan, bakal marenta’a bangsana toronanna ba’na daddiya suku se padha ban ku-suku Isra’il laenna.
17Ba’na bakal padha’a ban olar e penggir lorong, olar se mandi opassa e penggir jalan, se ngekke’ tombedda jaran sampe’ se nompa’ labu ajungkelang ka baba.
18Adhu, GUSTE, abdidalem anante’ kasalameddan paparengngepon Junandalem.
19Gad, ba’na bakal eserranga gal-bigal, tape ba’na bakal alabana sarta abigal reng-oreng se abigala ba’na jareya.
20Asyer, nagarana ba’na ngasellagiya kakanan ta’ sakera-kera, kakananna ba’na man-nyaman padha ban dha’aranna rato.
21Naftali padha ban manjangan, se berka’ sanyamanna e dhalem alas, dhu’-budhu’na ce’ leburra abasanna.
22Yusup padha ban hemar se gi’ ngodha e seddi’na somberra aeng, padha ban hemar alas se ka’-berka’ e lambungnga gunong.
23Bi’ mosona eserrang ce’ kejjemma, eserser ngangguy gandhiba ban pana.
24Tape gandhibana Yusup paggun ce’ kokona, lengngenna kowat parana, polana partolonganna Allah Se Mahakobasa, Allah se esemba Yakub, se ajaga ban se nolonge Isra’il salanjangnga.
25Se nolonge ba’na Allah se esemba eppa’na, Allah Se Mahakobasa se aberkadi ba’na, se apareng ojan dhari langnge’ ban aeng dhari dhalem bume, se apareng ebin ban dhu’-budhu’na.
26Se apareng gandum ban bang-kembangan. Berkadda Allah alebbiyan dhari essena nong-gunong se ce’ towana. Moga-moga berkat jareya torona ka Yusup, ka dhaina tang ana’ se paleng istimewa e antarana tan-taretanna.
27Benyamin padha ban pate’ alas se galak; mon gi’ laggu nyargep mangsana, bila malem laju egi-bagi."
28Jareya suku Isra’il, se dhubellas bannya’na, sarta dhabuna eppa’na ka pottrana bang-sebang menangka dhabu dhi-budhina e bakto apesa’a.
29Saellana jareya Yakub laju abaseyat ka tra-pottrana, "Sateya sengko’ akompola ban tang bangsa se la mate. Mon sengko’ la mate, bendhem pakompol ban para tang bangatowa e guwa se badha e teggalla Efron oreng Het rowa,
30iya areya se badha e Makhpela, e bagiyan temorra Mamre, e nagara Kana’an. Guwa ban teggal jareya ebelli Ibrahim dhari Efron, ekagabaya tana koburan.
31Ibrahim ban rajina, Sarah, esareyagi e jadhiya, bariya keya Ishak ban rajina, Ribka; Liya bi’ sengko’ ebendhem e jadhiya keya.
32Guwa ban teggal jareya la ebelli dhari oreng Het. Daddi sengko’ bendhem e jadhiya keya, ya."
33Saellana mare se ayat-baseyat jareya, Yakub marobbu, laju seda.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel