Alkitab Mobile SABDA
[VER] : [MADURA]     [PL]  [PB] 
 <<  Rut 2 >> 

1Na’omi andhi’ bala se anyama Bowas, iya areya balana se lake’ se anyama Elimelekh. Orengnga sogi ban ehormadi oreng.

2E settong are Errut ngoca’ ka Na’omi, "Bu, kaula nyo’ona edi entara ka teggal meleya gar-gaggarra gandum. Tantona badha oreng se poron aderrep kaula." Ca’na Na’omi, "Iya, na’, kassa’ la mangkat."

3Daddi Errut entar ka gal-teggal, noro’ bunte’ reng-oreng se padha anye sambi mele gar-gaggarra gandum. Kabendherran Errut entar ka teggalla Bowas.

4Ta’ saapa abidda dhari jareya Bowas dhateng dhari Betlehem ka teggal jareya pas nyapa ka reng-oreng se anye. "Moga-moga PANGERAN asarengngana ba’na kabbi!" oca’na. "Moga-moga PANGERAN aberkadana panjennengngan," saodda reng-oreng derrebban gella’.

5Bowas atanya ka mandhurra, "Sapa babine’ rowa?"

6Ca’na mandhur jareya, "Ka’dhissa’ oreng manca buru dhateng dhari nagara Mo’ab asareng Na’omi.

7Gella’ nyo’on edi ka abdina noro’a bunte’ reng-oreng se anye meleya gar-gaggaranna gandum. Molae gi’ laggu ta’ ambu sakale se alako, samangken gi’ buru bu-ambu sambi ngaop."

8Bowas ngoca’ ka Errut, "Mara edhingngagi. Ba’na ta’ osa mele gandum e teggalla oreng laen. Mele e dhinna’ bai abareng ban babine’an se ngala’ derrep ka sengko’ rowa.

9Abassagi dha’ emma reng-oreng jareya se anyeya. Ba’na noro’, ja’ u-jau dhari babine’an jareya. Mon ba’na pelka’, enom aeng e nay-pennay se eesse’e lalake’an se ngala’ derrep e dhinna’ rowa. Sengko’ la marenta’agi ka lalake’an jareya ta’ olle la-nyala ka ba’na."

10Errut asojud e adha’na Bowas, pas ngoca’, "Panjennengngan ce’ saena ka abdina. Abdina oreng manca, ta’ pantes narema kabecce’anna panjennengngan."

11Saodda Bowas, "Sengko’ la ngedhing kabecce’anna ba’na ka mattowa bine’na sajjegga lakena ba’na mate. Sengko’ tao ja’ ba’na adina’agi oreng towana ban nagarana dibi’ polana apolonga ban reng-oreng bangsa laen, mangkana ba’na gi’ ta’ kennal ka reng-oreng jareya.

12Moga-moga bi’ PANGERAN, Allahna Isra’il, ba’na eparengngana babales se sapantessa etarema ba’na, sabab ba’na la entar nyare pangaoban ka Salerana."

13Ca’na Errut, "Panjennengngan ce’ saena ka abdina, sanare abdina ta’ padha sareng reng-oreng derrebbanna panjennengngan. Panjennengngan ce’ labana, daddi ate abdina talepor."

14E baktona oreng ngakana, Bowas ngoca’ ka Errut, "Mara ngakan. Ngala’ rotina, pobuwi caossa." Daddi Errut ngakan abareng ban reng-oreng derrebban gella’. Bi’ Bowas Errut eberri’i gandum panggang, ban Errut ngakan sampe’ kennyang. Samarena ngakan, gi’ badha karena.

15Samarena ngakan Errut mele gandum pole. Saellana Errut tadha’ e seddi’anna, Bowas ngoca’ ka reng-oreng se anye, "Mon babine’ rowa mele gar-gaggarra gandum se la egintel, dina, panneng. Ja’ patodhus ban ja’ gigiri. La’-mala’ dhari gandum se la etel-gintel jareya dabu’ sabagiyan, tha-kantha pagaggar, olle epele."

16(2:15)

17Daddi Errut terros mele gandum e teggal jareya sampe’ sar-asar. Saellana jareya gandumma egebba, epakare la’assa malolo, ollena makompol etemmo badha sapolo kilo.

18Errut pas mole ka kottha, ngeba gandum ollena mele jareya pas epatao ka mattowa bine’na bannya’na ollena mele jareya. Lebbina kakanan se ta’ eabi’ e bakto ngakan ban reng-oreng se anye rowa, ebagi ka mattowana.

19Ca’na Na’omi, "Olle dhimma ba’na? E teggalla sapa ba’na alako gella’? Moga-moga oreng se becce’ ka ba’na jareya eparengngana berkat bi’ Pangeran!" Errut abala ka Na’omi ja’ aba’na mele gandum jareya e teggalla oreng se anyama Bowas.

20"Na’, oreng jareya tang bala rapet," ca’na Na’omi. "Oreng jareya se kodu ngoros odhi’na sengko’ ban ba’na. Moga-moga PANGERAN aberkadi oreng jareya. PANGERAN pajat ros-terrosan neptebbi janjina ka oreng se gi’ odhi’ ban ka oreng se la mate."

21Errut pas ngoca’ pole, "Oreng lalake’ ganeka jugan ngoca’ ja’ kaula olle terros mele gandum asareng reng-oreng derrebbanna kantos gandumma lastare eanye sadaja."

22"Iya, na’," ca’na Na’omi, "pajat lebbi becce’ ba’na alako abareng ban babine’an e teggalla Bowas jareya. Mon ba’na alako e teggalla oreng laen, olle daddi ba’na ela-salae oreng e jadhiya."

23Daddi, Errut paggun noro’ babine’an se ederrep Bowas, mele gar-gaggarra gandum sampe’ gandumma la eanye kabbi. Sabatara jareya Errut paggun apolong ban ebu mattowana.



 <<  Rut 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel