Alkitab Mobile SABDA
[VER] : [MAKASAR]     [PL]  [PB] 
 <<  1 Raja-raja 19 >> 

1Nacaritami Karaeng Ahab mae ri bainenna, sikontu apa le’baka nagaukang Elia, kammayatompa antekamma batena Elia ambuno ngasengi sikontu na’bi Baal.

2Jari akkirimmi kabara’ Izebel mae ri Elia angkana, "Poro nahukkunga’ rewataya, ba’lalo nabunoa’, punna ammuko ri wattu kamma-kammaya anne, natena nakupakamma tongko anjo apa le’baka nugaukang mae ri anjo na’bi-na’bi Baal."

3A’jari malla’mi Elia, sa’genna lari sollanna tena nibunoi. A’lampai siagang palayanna mange ri Bersyeba ri Yehuda. Anjoreng naboli’mi anjo palayanna,

4nampa a’jappa bangkeng ri parang lompoa siallo bujuru’, nampa ammantang irawanganna se’rea poko’ kayu copponga leko’na. Ammempomi anjoreng, naerokangngammi nasa’ring matea. Nakanamo ri Batara, "Tenamo kutahangi, Batara Kialle lalomi nyawaku. Tena na kubajikangngang naboe-boeku!"

5Nampa anra’ba naung ri rawanganna anjo poko’ kayua, sa’genna attinro. Ti’ring nia’mo se’re malaeka’ battu anseroi na nakana, "Ambangungko nai’ Elia, nungnganre!"

6Nacinikimi Elia tammulilina, nampa nia’mo nacini’ ri ampi’ ulunna sibatu roti nitunu siagang je’ne’ lalang ri botolo’. Angnganremi siagang angnginummi, nampa attinro poleang.

7Makapinruanna battumi pole anjo malaekaka anseroi siagang angkana, "Elia, ambangungko nai’, angnganre mako, sollannu akkulle attahang a’jappa bella."

8Ambangummi Elia, nampa angnganre siagang angnginung. A’jari gassimmi nasa’ring, siagang akkullemi a’jappa patampulo allo sallona mange ri Moncong Sinai, tampa’na le’ba’ ampa’nyatai KalenNa Allata’ala.

9A’bangngimi Elia anjoreng lalang ri se’reang kali’bong batu. Nampa Nakanamo Batara ri ia, "Elia, apa nupare’ anrinni?"

10Appialimi Elia angkana, "O Batara, Allata’ala Kaminang Koasaya, tulusu’ anjamaku untu’ iKatte. Mingka umma’ Israel nadakkai parjanjianna ke’nanga siagang iKatte. Nabongkaraki ke’nanga tampa’-tampa’ pakkoro’bangnganga untu’ iKatte nampa nabuno sikamma na’bi-na’biTa. Inakke mami bawang tassesa, nampa kamma-kamma anne eroki ke’nanga ambunoa’!"

11Nakanamo Batara, "Assulukko battu ri antu kali’bonga, siagang ammentengko a’dalle’ mae ri Nakke rate ri monconga." Nampa allalomo Batara anjoreng, nipirioloi ri anging mammiri’ sannaka sarrinna, sa’genna tappuemo sikamma bontoa siagang moncong-moncong batua reppe’mi napakamma. Mingka tena Napa’nyatai KalenNa Batara lalang ri anjo anginga. Ri wattunna sannammo anjo anginga, ta’ge’goso’mi buttaya, mingka tena todong Napa’nyatai KalenNa Batara lalang ri anjo butta ta’ge’gosoka.

12Le’baki anjo sannang sikalimi siagang sinomi. Nampa nia’mo kalangngerang sa’ra ca’di siagang halusu’.

13Nalangngere’na Elia anjo sa’raya, natongko’mi rupanna siagang jubana, nampa assulu’ ammenteng ri bawana anjo kali’bong batua. Nia’mo kalangngerang sa’ra angkana, "Elia, apa nupare’ anrinni?"

14Appialimi Elia angkana, "O Batara, Allata’ala Kaminang Koasaya, tulusu’ anjamaku untu’ iKatte. Mingka umma’ Israel nadakkai parjanjianna ke’nanga siagang iKatte. Narumbangi tampa’-tampa’ pakkoro’bangnganTa siagang nabunoi na’bi-na’biTa. Inakke mami bawang tassesa, siagang kamma-kamma anne eroki ke’nanga ambunoa’!"

15Nakanamo Batara, "Ammoterekko mange ri parang lompoa ri ampi’na Damsyik! Nampa a’lampako mange ri kotaya siagang tiriki minynya’ ulunna Hazael a’jari pammatei ri niangka’na a’jari karaeng Siria.

16Gaukang tommi anjo kammaya mae ri Yehu ana’na Nimsi, sollanna a’jari karaeng Israel. Kammayatompa Elisa ana’na Safat battu ri Abel-Mehola, sollanna a’jari na’bi ansambeangko.

17Inai-nai tena nibunoi ri Hazael, lanibunoi ri Yehu. Siagang inai ta’lappasa’ ri Yehu lanibunoi ri Elisa.

18Mingka nia’ 7.000 tu Israel laKupasalama’, iamintu sikamma tau tuli majarreka mae ri Nakke siagang tenaya nale’ba’ su’ju’ anynyomba ri patung Baal yareka nabaui."

19Jari a’lampami Elia na nagappa Elisa sitabang anjama appa’jeko. Nia’ sampulo anrua ayoka sapi ri dallekanna, na Elisa kale-kalenna appa’jeko ri ayoka ri boko dudua. Ammalona Elia ri ampi’na Elisa, nasungkemi jubana Elia nampa napataba ri salangganna Elisa.

20Jari nabokoimi sapina Elisa nampa lari angngondangi Elia, siagang nakana, "Kipa’bianga’ rolong mange appala’ kana ri tau toaku, nampa kulamminawang ri katte." Appialimi Elia angkana, "Baji’mi, mange mako; tena nakupisangkaiko."

21Ammotere’mi Elisa mange ri kokonna, nampa nasamballe sapi-sapina. Naia pa’jekona napareki a’jari kayu tunuang untu’ ampallui dagenna anjo sapi-sapia. Nampa napa’bage-bageang anjo dagenga mae ri ana’ buana, na nakanremo ke’nanga. Le’baki anjo a’lampami Elisa ampinawangi Elia, siagang a’jarimi pambantuna.



 <<  1 Raja-raja 19 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran