1Ri ampi’na balla’ kakaraenganna Ahab ri Yizreel, nia’ se’re koko anggoro’, niarenga Nabot patanna.
2Ri se’reang allo nakanamo Ahab ri Nabot, "Sareamma’ anjo koko anggoro’nu nasaba’ ambani anjo kokoa battu ri balla’ kakaraengangku. Erokka’ a’lamung gangang-gangang anjoreng. Lakusareko koko anggoro’ la’bi bajika sambenna, yareka punna erokko lakuballi situru’ anggarang siratannaya."
3Appialimi Nabot angkana, "Anne koko anggoroka sossorang battu ri boe-boeku. Lanri Allata’ala, tena kukkulle ampassareangi ri katte".
4Lussa’mi siagang larromi pa’mai’na karaenga nalangngere’na anjo kananna Nabot ri ia. Ammotere’mi nampa anra’ba ri katinroanna taeroka assaile siagang taerokai angnganre napakamma.
5Izebel, bainenna, battumi akkuta’nang ri ia angkana, "Angngapa nulussa’ kamma? Angngapa nutaeroka angnganre?"
6Appialimi Ahab angkana, "Tena nasannang pa’maikku ri Nabot. Kupalaki ri ia sollanna ero’ ambalukangi koko anggoro’na ri nakke, yareka kusambei koko anggoro’ maraeng punna anjo nakaeroki, mingka teai!"
7Appialimi Izebel angkana, "Sai ikau karaeng Israel! Ambangung mako nungnganre kamma-kamma anne. Pakasannangi nyawanu, nasaba’ lakusareko anjo koko anggoro’na Nabot!"
8Annulisi’mi sura’ Izebel lalang arenna Ahab nampa nabonei segele’na karaenga anjo suraka. Nampa nakiring anjo suraka mae ri pamimping-pamimping siagang tutoa-toana masarakaka ri Yizreel.
9Iaminne bonena anjo suraka, "Pa’la’bangi sollanna appuasa ra’yaka siagang suroi ke’nanga a’rappungang. Lalang ri anjo pa’rappunganga sarei Nabot pammempoang kaminang mala’birika.
10Suroi rua tau ja’dala’ andallekangi siagang natudui angkanaya le’baki natunrai Allata’ala siagang karaenga. Nampa erangi assulu’ ri pantaranganna kotaya, siagang sambilai batu sa’genna mate!"
11Nigaukammi anjo parentana Izebel ri sikamma pamimpinna siagang tutoa-toana masarakaka ri Yizreel.
12Napa’la’bammi sollanna appuasa ra’yaka. Nampa nasuro ke’nanga a’rappungang, nampa nisare Nabot tampa’ kaminang mala’biri’.
13Nia’mo rua pajaba’ ammempo assidallekang siagang Nabot. Na ri dallekanna tujaia nitudumi angkanaya natunrai Allata’ala siagang karaenga. Lanri kammana anjo nierammi assulu’ ri pantaranganna kotaya nampa nisambila batu sa’genna mate.
14Nampa nipabattumo anjo kabara’ nibunona Nabot mange ri Izebel.
15Tasalloai natarimana Izebel anjo kabaraka, nakanamo ri Ahab, "Matemi Nabot. Kamma-kamma anne a’lampamako angngallei anjo koko anggoro’ tenaya naero’ nabalukang ri kau."
16A’lampami linta’ Ahab mange angngallei anjo koko anggoroka, nampa napa’jarimo kalenna pata.
17Nakanamo Batara ri Elia, anjo na’bi battua ri Tisbe,
18"Kamma-kamma anne Ahab, anjo karaeng Samaria, niaki lalang ri koko anggoro’na Nabot, eroki naalle anjo kokoa na’jari kalenna pata. Jari, a’lampako mange anjoreng,
19pabattui mae ri ia angkana iNakke, Batara akkana kammA’ anne, ‘Le’bakko ammuno, anrampasakko pole! Lanri kammana anjo, cera’nu lanilepaki ri kongkong, ri tampa’na kongkong-kongkonga allepaki cera’na Nabot!’"
20Nacini’na Ahab anjo Elia, nakanamo, "E musu, kale’bakkanna nugappa tonja’!" Appialimi Elia angkana, "Kammatojengi, nasaba’ sanna’ lompona pattujunta anggaukangi apa ja’dalaka ri dallekanNa Batara,
21jari iaminne Nakananga Batara mae ri katte, ‘LaKupabattui bala lompoa mae ri kau. LaKupakabellako, siagang sikamma bura’-bura’nea lalang ri kaluarganu, toa yareka rungka, laKupa’lanynya’ ngasengi.
22Kaluarganu la’jari sangkammai kaluargana Karaeng Yerobeam ana’na Nebat siagang sangkammai kaluargana Karaeng Baesa ana’na Ahia, lanri ikaumi a’jari passabakkang nadoraka tu Israel sa’genna napakabattu larroKu.’
23Na ri sesena Izebel, Nakana Batara angkanaya maya’na lanikanrei ri kongkong lalang ri kota Yizreel.
24Inai-nai kaluarganu mate ri kotaya, lanikanrei ri kongkong, siagang inai-nai mate ri pantaranganna kotaya lanikanrei ri jangang-jangang."
25Tena niakka tau lompo pattujunna anggaukangi kaja’dallanga ri dallekanNa Batara sangkamma nagaukanga Ahab. Yangaseng anjo kaja’dallanga nagaukangi lanri nipangarui ri Izebel, bainenna.
26Ahab nagaukangi dosa-dosa sannaka hinana: anynyombai barhala sangkamma nagaukanga tu Amori, iamintu tau le’baka nibongka ri Batara assulu’ battu ri pa’rasangang Kanaan ri wattunna napantamakki Israel anjo pa’rasanganga.
27Le’baki Elia a’bicara, nakekke’mi pakeanna Ahab siagang ammakemi kaeng karung salaku pammatei ri sesse’ lalanna, nampa appuasa. Manna ri wattunna tinro ammake tonji pakeang karung, siagang punna a’jappai tuli susana tanja’na.
28Nakanamo Batara ri Na’bi Elia,
29"Le’ba’mi nucini’ antekamma batena Ahab ampakatunai kalenna ri dallekangKu? Lanri kammana anjo, tena nalaKupabattu balaya ri tallasa’na ija. Ri wattu ana’napi nampa Kupabattu anjo balaya mae ri kaluargana."
<< 1 Raja-raja 21 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel