1Ri se’reang allo, ri wattu a’jari karaennamo Saul,
2ammilemi 3.000 tu Israel. 2.000 ammantang siagang ia ri Mikhmas siagang ri daera pa’moncongang Betel, siagang 1.000 maraengannaya a’lampai siagang Yonatan ana’na bura’nea mange ri Gibea ri daera suku Benyamin. La’binnaya battu ri anjo ra’yaka, nasuromi ammotere’ massing mae ri balla’na.
3Nampa Yonatan nabunomi panglimana tu Filistin niaka ri Geba, na nalangngere’mo bansa Filistin kabara’na anjo. Nasuro pasa’rami Saul tarompeka ri sikontu pa’rasangang untu’ angkioki tu Ibrania sollanna maju mange a’bundu’.
4Mae ri sikontu bansa Israel napaumi Saul angkanaya le’baki nabuno panglimana tu Filistin, siagang angkanaya sanna’mi birisi’na tu Filistin mae ri tu Israel. Lanri kammana, amminawang turu’mi ra’yaka ri pakkio’na Saul untu’ a’rappungang siagang ia ri Gilgal.
5Na lalanna anjo wattua, a’rappungang tommi tu Filistin untu’ ambunduki tu Israel. Nia’ 30.000 kareta bundu’na ke’nanga, 6.000 tau a’jarang, siagang tantara sanrapang kassika ri tamparang jaina. Appareki kema ke’nanga ri Mikhmas, ri bageang rayanganna Bet-Awen.
6Nampa a’bakkamo ke’nanga maju, ambunduki hebaki tu Israel, sa’genna nia’mi lalang bahaya lompo tu Israel. Accokkomi sipa’gang tu Israelka lalang ri kali’bong batua ri monconga yareka ri alla’-alla’na batu karanga, yareka lalang ri bungunga siagang kalo’bang lalanga ri buttaya.
7Nia’ tommo a’limbang anta’leang ri ba’leanna Binanga Yordan nampa antama’ ri daera Gad siagang Gilead. Saul nia’ iji ri Gilgal, nannekkere’ ngasemmi ra’ya’ niaka ampinawangi.
8Attayammi Saul tuju allo sallona, situru’ pappasanna Samuel mae ri ia. Mingka tena ija nabattu Samuel mange ri Gilgal, nampa appakkaramulamo ra’yaka ambokoi Saul.
9Lanri kammana, nakanamo ri ke’nanga, "Erangi mae anjo koro’bang nitunua siagang koro’bang pappasiamaka." Nampa kalenna ampassareangi anjo koro’bang nitunua.
10Mingka nampami silalonna le’ba’ nagaukang, battumi Samuel. Niruppaimi ri Saul ero’ a’bari sallang.
11Mingka akkuta’nammi Samuel angkana, "Apa anjo le’ba’ nagaukang karaenga?" Appialimi Saul angkana, "Kuciniki ra’yaka appakkaramulami ambokoia’, nampa tenaki’ battu situru’ wattu le’baka kitantukang. Na nampa pole nia’mi tu Filistin a’rappungang ri Mikhmas.
12Nampa kupikkiriki angkanaya gassingka tasalloami nabattu tantara Filistin ambundukia’ anrinni ri Gilgal, na nampa tenapa kule’ba’ appala’ tulung ri Batara. Lanri kammana minjo nakuangngallemo kaputusang untu’ ampassareangi anjo koro’banga."
13Nalangngere’na Samuel anjo, nakanamo ri Saul, "Dongo’ sikali anjo panggaukanta karaeng. Ebara’ angkana kituruki parentaNa Karaeng Allata’ala mae ri katte, ma’nassa laNapattantui Batara angkana ikatte siagang turunganta la’jari karaeng situlusu’na.
14Mingka kamma-kamma anne tenamo nalattahang pamarentahanta. Nasaba’ tena nakituruki parentaNa Batara, laNapilemi Batara se’re tumaraeng ia Nakaerokia untu’ Naangka’ a’jari karaeng mae ri umma’Na."
15Nampa a’lampa Samuel ambokoi Gilgal, na napatulusu’ lampana mange ri Gibea, ri daera Benyamin. Lalanna anjo wattua naparessami Saul pasukanna, nia’ kira-kira 600 tau jaina.
16Kammaminjo, Saul siagang ana’ bura’nena Yonatan, kammayatompa sikamma ana’ buana, akkemami ri Geba, ri daera Benyamin. Nampa tu Filistin akkemai ri Mikhmas.
17Ri ia todong anjo wattua, nia’ tallu pa’rappungang paella’ tu Filistin a’lampa battu ri kemana ke’nanga untu’ a’lampa angngella’. Sipa’rappungang makase’rea a’lampa mangei ri Ofra ri daera Syual.
18Sipa’rappungang makaruaya a’lampa mangei ri Bet-Horon, siagang sipa’rappungang maraengannaya pole a’lampa mangei ri pa’baeng-baeng a’dalle’ mangea ri Lappara’ Zeboim siagang ri parang lompoa.
19Ri sikontu pa’rasangang Israel tena tukang bassi, lanri tena nanikellai tu Ibrani ri tu Filistin appare’ pa’dang siagang poke.
20Jari musti a’lampai tu Israel mange ri tu Filistin punna ero’ nakantisi’ pa’jekona, bingkunna, pangkulu’na, siagang kandauna.
21Ongkoso’na iamintu se’re doe’ pera’ ca’di untu’ angkantisiki pangkuluka siagang ampakabajiki pa’ba’bala’ sapia; na rua doe’ pera’ ca’di untu’ angkantisiki pa’jekoa yareka bingkunga.
22Iami anjo saba’na, na ri anjo allo pa’bundukanga ri Mikhmas, tena manna sitau tu Israel ammallaki pa’dang yareka poke, pantaranganna Saul siagang ana’ bura’nena iamintu Yonatan.
23Appare’mi balla’ jaga tu Filistin untu’ ampartahangkangi se’rea alla’ moncong ri Mikhmas.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel