Alkitab Mobile SABDA
[VER] : [MAKASAR]     [PL]  [PB] 
 <<  1 Tawarikh 10 >> 

1A’bunduki tu Filistin siagang tu Israel. Anjorengi ri monconna Gilboa ke’nanga a’bundu’. Jai tu Israel mate anjoreng. Na ia niaka ammantang siagang Karaeng Saul siagang ana’-ana’na larimi.

2Mingka nipinawangi ke’nanga ri tu Filistin, sa’genna nia’ tallu ana’ bura’nena Saul nibuno, iamintu Yonatan, Abinadab, siagang Malkisua.

3Teai sipato’ heba’na bunduka ri ampi’na Saul, nakalenna nitaba todong ri pana-pana battua ri musunna, sa’genna loko’mo.

4Jari nakanamo Saul mae ri ana’ rungka angngerangai sanjatana, "Bi’bu’mi antu pa’dannu na nupatobo’ ri nakke sollanna tena nanapare’ karek-karenanga’ tu Filistin, tenaya Batarana." Mingka taerokai anjo ana’ rungka angngerangai pa’danna antoboki Saul lanri sanna’ malla’na. Lanri kammana naallemi Saul kalenna anjo pa’danga nampa natobo’ kalenna.

5Nacini’na anjo tu rungkaya angkanaya matemi Saul, nabuno tommi kalenna siagang anjo pa’danga, sa’genna mate.

6Jari matemi Saul siagang tallu ana’ bura’nena. Kala’busammi pamarentana.

7Ri wattunna nalangngere’ sikamma tu Israel niaka ammantang ri lappara’na Yizreel angkanaya larimi tantarana Israel, siagang angkanaya matemi Saul siagang ana’-ana’na, larimi ke’nanga nanabokoi kota-kota pammantanganna ke’nanga. Nampa naempoimo tu Filistin anjo kota-kotaya.

8Ammukona ri wattunna battu tu Filistin ero’ angngalleangi apa-apanna sikamma anjo tau matea, nabuntulu’mi maya’na Saul siagang tallua ana’ bura’nena, ia matea ri monconna Gilboa.

9Napasulu’mi baju bundu’na Saul, nampa nasamballe kallonna na naerang ulunna. Nampa nia’mo tau nasuro ke’nanga mange ri sikontu pa’rasangang Filistin untu’ ampabattui anjo kabara’ bajika mae ri anjo bansaya siagang rewatana ke’nanga.

10Niboli’mi anjo baju bundu’na Saul lalang ri se’reang balla’ panynyombanna ke’nanga, siagang nigentungi ulunna ilalang ri balla’ Dagon, iamintu rewatana ke’nanga.

11Ri wattunna nalangngere’ pandudu’na Yabesh ri Gilead anjo apa le’baka nagaukang tu Filistin mae ri Saul,

12a’lampami siapa are tau kaminang barania ri ke’nanga mange angngallei maya’na Saul siagang ana’-ana’na, nampa naerang mange ri Yabesh. Natarawammi ke’nanga anjo mayaka ri tujunna se’re poko’ kayu lompo. Le’baki anjo appuasami ke’nanga tuju allo sallona.

13Matei Saul lanri amminrai mae ri Batara, siagang tena naturuki sikamma parentaNa. Tena nappala’ pitunju’ ri Batara, mingka appala’ maei ri roh-rohna tu matea. Iaminjo saba’na nanihukkung ri Batara, siagang nipassareang kakaraenganna mae ri Daud ana’na Isai.

14(10:13)



 <<  1 Tawarikh 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel